Nyuma y’imyaka 28 arokotse Jenoside ni umugabo, arafasha imiryango 400

  • NTAWITONDA JEAN CLAUDE
  • Mata 11, 2022
  • Hashize imyaka 2
Image

Imyaka 28 irashize mu Rwanda hahagaritswe Jenoside yakorewe Abatutsi yahitanye abasaga miliyoni mu gihe cy’iminsi 100, ariko ibisari by’amateka yasigiye barokotse ntibishobora gukurwaho n’igihe gishize uko cyaba kingana kose.

Rwagasore w’imyaka 38 y’amavuko, ni umwe mu barokotse Jenoside yakorewe Abatutsi mu 1994 yabaye afite imyaka 10, bimwe mu byo atazibagirwa ni uburyo yiboneye se umubyara yicwa urw’agashinyaguro atemagurwa n’abicanyi.

Gusa nubwo atazigera yibagirwa ibyabaye, ku rundi ruhande yanyuze mu buzima bugoye ariko ntiyatakaza icyizere cyo kubaho, none ubu ni umugabo ufite umuryango umukomokaho ndetse akaba afite n’indi miryango isaga 400 yunganira mu buzima bwabo bwa buri munsi.

Ati: “Nari mfite imyaka 10 y’amavuko itsinda ry’abantu bagera kuri 12 ryaje mu rugo, njya kwihisha inyuma y’uruzitiro. Nabibonye n’amaso yanjye, icyo gihe mushiki wanjye na we yarishwe, marume na sogokuru babaga iwacu bose biciwe hamwe.”

Rwagasore yarokokanye na nyina wasigaranye ihungabana yakomoye ku buryo yabonye umuryango we wicwa, n’uburyo yarokotse urupfu nyuma yo gukubitwa bamusiga ari intere bakeka ko yapfuye.

Mu kiganiro yagiranye n’Imvaho Nshya, Rwagasore yasobanuye inzira y’umusaraba yanyuzemo muri Jenoside na nyuma yaho, bikamubera umusingi wo kongera kubaho, kwiyubaka no kubaka abandi.

Rwagasore mu mashuri abanza

Ati: “Muri ibi bihe bikomeye twibuka abacu bazize Jenoside yakorewe Abatutsi, nibuka inzira y’umusaraba nanyuzemo nyuma yo kubura abagize umuryango wanjye barimo data umbyara. Bakimara kwica papa nahunganye na mama n’umuvandimwe yari ahetse, duhungira ku Kimisange, dukomereza ahitwa i Butamwa mu rufunzo rwari ruhari, muri uko kwiruka duhunga nagiye  nkomeretswa n’ibisasu byavuzaga ubuhuha mu Mujyi wa Kigali.”

Rwagasore akomeza avuga ko baraye mu rufunzo igihe kinini, baza kurokorwa n’umuntu yabwiwe nyuma ko yari Burugumesitiri utaravugaga rumwe n’umugambi wa Leta y’icyo gihe wo gutsemba Abatutsi.

Ati: “Yari atuye i Gikondo ari umuturanyi wacu, yaratumenye asaba ko batatwica, ubwo twahise tuva aho twerekeza i Nyamirambo nanavuga ko ari yo narokokeye.”

Ubwo Ingabo za FPR Inkotanyi zahagaritse Jenoside yakorerwaga Abatutsi mu Mujyi wa Kigali, Rwagasore na nyina wari ahetse uruhinja, bagarutse iwabo i Gikondo, basanga harabaye amatongo.

Uko yacuruje ikarito, akajya avomera abantu, asubira ku ishuri

Jenoside irangiye Rwagasore na nyina basanze barasenyewe bacumbika mu baturanyi, batangira kubaho mu buzima busharira.

Yagize ati: “Ku myaka 11 nari mu buzima bugoye, umubyeyi nari nsigaranye na we afite ihungabana rikomeye yasigiwe na Jenoside, anafite umwana w’uruhinja ntibyari byoroshye. Mu buzima bugoye natangiye amashuri abanza, aho nayafatanyaga no gucuruza ubunyobwa n’imigati kugira ngo ndebe icyabeshaho umuryango wanjye.”

Yakomeje avuga ko arangije amashuri abanza ku nkunga y’Umuryango Compassion byabaye ngombwa ko aba mu buzima bubi  yise ‘ubumayibobo’, ariko aharanira icyabeshaho umuryango we. Kuva mu 1996 kugeza mu 2000 yarwanye n’ubuzima bwo kwiyubaka no kubaka umuryango we.

Rwagasore yabanje guhuza ishuri no gucuruza ikarito kugira ngo umuryango we ubashe kubona ibyo kurya

Ati: “Ubuzima bwakomeje gukomera pe! Ku buryo mama yafuriraga abantu nanjye ntangira gucuruza ikarito dushakira imibereho umuryango, cyane ko abo twanganaga benshi bayobotse itabi mu rwego rwo kwirengagiza ibihe bikomeye.  Ariko naje gutekereza mbona nta buzima nabamo ntarize, nahisemo gusubira mu ishuri nyuma y’imyaka ine. Nagiye ku kigo cyahoze ari Islamique de Gikondo, nkajya mvomera abantu kugira ngo mbone amafaranga y’ishuri ndetse n’ayo kubeshaho mu rugo, kuko icyo gihe kubona amazi muri Gikondo byari urugamba rukomeye.”

Rwagasore yakomeje kurwana n’ubuzima aza kurangiza icyiciro rusange cy’amashuri yisumbuye abifashijwemo n’ Ikigega cya Leta kigenewe gutera inkunga abarokotse Jenoside yakorewe Abatutsi batishoboye (FARG), akomereza icyiciro cya kabiri cy’ayisumbuye mu mategeko kuko yifuzaga gutanga ubutabera mu Banyarwanda, umwe mu bana babubuze.

Imiryango irenga 400 yungukira ku mbuto yasaruye ku muruho

Muri ibi bihe Abanyarwanda n’inshuti z’u Rwanda bibuka ku nshuro ya 28 Jenoside yakorewe Abatutsi, Rwagasore yishimira ko ataheranywe n’ibibazo n’agahinda, ubu akaba yarabashije kwiyubaka akubaka n’abandi nk’uko byari mu nzozi ze.

Umuryango yashinze usigaye wita ku bana n’imiryango yabo irenga 400

Binyuze mu muryango “Best Family Rwanda” yashinze, kuri ubu  abasha gusabana n’abandi babuze imiryango yabo ndetse nabagizweho ingaruka na Jenoside yakorewe Abatutsi.

Yakomeje amashuri makuru muri Kaminuza Nkuru y’u Rwanda, asoza amasomo mu bijyanye n’amategeko mu mwaka wa 2010.

Ati: “Nyuma y’urusobe rw’ibibazo nanyuzemo n’ibyo nahuye na byo, ubu ndi umuntu w’umugabo, mfite umuryango ugizwe n’umugore n’abana 3, ndetse n’Umuryango utegamiye kuri Leta nashinze mu 2001 ubu urakomeye mu Rwanda, utanga ubufasha n’ubuvugizi ku bababaye n’abatishoboye kuko nzi uko biryana.”

Rwagasore usigaye yunganira abantu mu by’amategeko (Umwavoka), ndetse uwo muryango yashinze ukora ubuvugizi n’ubukangurambaga bugamije guhindura imibereho y’abana bato n’imiryango yabo.

Uyu muryango ukorera mu Turere twa Kibukiro na Gasabo wemewe n’amategeko mu mwaka wa 2008; wagiye ubona abaterankunga batandukanye ku buryo kuri ubu  ufasha abantu bagera kuri 400.

Asigaye ayobora imishinga mpuzamahanga mu Rwanda

Rwagasore asigaye akorana n’imishinga myinshi igamije kuzamura iterambere ry’Abanyarwanda.

Muri yo harimo umushinga w’Abanyamerika ‘Under His Umbrella’, ukorera mu Karere ka Busegera ukaba umaze kubaka ibigo by’amashuri i Musenyi na Nyamata, wanafashije imiryango igera kuri 600.

Hari n’undi mushinga witwa ‘His Hand on Africa’ ugiye kubaka Ibitaro bya Bugesera n’ibindi bitaro bitandukanye mu Rwanda, bizafasha kurengera ubuzima bw’Abanyarwanda.

Mu rugendo rwo kwiyubaka kandi, Rwagasore yakomeje gushyira imbaraga mu bikorwa bifitiye Igihugu akamaro no muri ibi bihe u Rwanda ruhangaye no kurwanya icyorezo cya Koronavirusi COVID-19.

Yakoze umushinga yise ‘Twohereze’ wo gutanga serivisi mu bihe hari himakajwe gahunda ya Guma Murugo, aho yagemuriraga abataturage ibicuruzwa bitewe n’ibyo batumije ku ikoranbuhanga.

Rwagasore arasaba abarokotse Jenoside yakorewe Abatutsi kudaheranwa n’agahinda ahubwo bakubura amaso bakareba imbere kuko ari heza, ari na ko baharanira ubuzima bufite intego.

Arashimira byimazeyo ubwitange bwaranze Ingabo za FPR Inkotanyi mu kurokora u Rwanda, mu rugamba zayobowemo na Nyakubahwa Perezida wa Repubulika Paul Kagame rwari urwo gutanga ubuzima bwabo ngo Igihugu cyongere gushibuka bundi bushya.

Rwagasore iyo yibutse ubuzima yanyuzemo ashima Imana n’Inkotanyi zabohoye u Rwanda, akongera kubaho
Rwagasore (iburyo) na bagenzi be batangiranye Umuryango Best Family Rwanda
Nyuma ya Jenoside Rwagasore aha yari amaze kuba umusore ari kumwe na mama ndetse na murumuna we
Rwagasore arahirira kuba Umwavoka
Rwagasore yoroye n’ihene mu rwego rwo gukomeza kubungabunga udufaranga yakoreraga

Arashimira byimazeyo ubwitange bwaranze Ingabo za FRP Inkotanyi mu kurokora u Rwanda

  • NTAWITONDA JEAN CLAUDE
  • Mata 11, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE