Nyaruguru: Umuhanda ugana Nshili ubangamiye kugeza umusaruro w’icyayi ku isoko

  • AKIMANA JEAN DE DIEU
  • Ukuboza 13, 2023
  • Hashize amezi 6
Image

Bamwe mu bahinzi b’icyayi bakorana n’uruganda rwa Nshili Kivu Tea Factory barasaba gusanirwa umuhanda wa Munini werekeza i Nshili kuri uru ruganda kuko wangiritse, bikadindiza abahinzi mu kugeza umusaruro wabo ku isoko.

Mu kiganiro n’Imvaho Nshya bavuga ko hashize igihe bagaragariza inzego zitandukanye ko bafite impunge zo kugeza umusaruro w’ibyo bahinga ku isoko harimo n’isoko mpuzamahanga bagemuraho icyayi.

Nsengiyumva Silas avuga ko umuhanda Nshili- Munini ukagera i Ruheru wangiritse cyane ku buryo ukwiye gusanwa kugira ngo horoshywe ubuhahirane bw’abakorera ubuhinzi ku ishyamba rya Nyungwe na Nyabimata.

Ati: ”Turasaba ko uyu muhanda uva hano i Nshili werekeza ku Munini wangiritse cyane ku buryo udafatiwe hafi ushobora guhagarika ubuhahirane n’abaturage bakora ubuhinzi n’ibindi bikorwa ku ishyamba rya Nyungwe n’ibindi bice bitandukanye”.

Perezida wa koperative Kothenk ihinga icyayi, Habineza Fidele avuga ko nk’abahinzi bakorera muri koperative bafite impungenge z’umusaruro wabo ushobora kutagera ku isoko mpuzamahanga bagahomba kubera umuhanda mubi utoroshya ubuhahirane.

Yagize ati: “Nkatwe abahinzi dukorera muri Koperative ya Kothenk dufite impungenge z’uko umusaruro tubona ushobora kutazabasha kugera ku isoko, uruganda rwacu dukorana rugemuraho icyayi cyamaze gutunganywa kuko uyu muhanda dufite ntabwo woroshya ubuhahirane cyane iyo imvura yaguye“.

Umuyobozi Mukuru w’uruganda rwa Nshili Kivu Factory, Hakizayezu Marc avuga ko hashize igihe kirekire bagaragariza inzego ko bafite imbogamizi z’umuhanda uva ku ruganda ukagera ku Munini ushobora gutuma umusaruro wabonetse utagera ku isoko mpuzamahanga bagemuraho icyayi i Nairobi muri Kenya.

Ati: “Ni byo turabona umusaruro ariko umuhanda dufite ntabwo udufasha kubera ko warangiritse cyane, twagiye tubigaragariza inzego zitandukanye kugira ngo zidufashe uyu muhanda uva ku Munini ugana hano ku ruganda ukorwe kuko hari igihe dushobora kumara icyumweru kirenge tutarageza icyayi ku isoko kubera uyu muhanda werekana ibimenyetso by’uko ushobora guhagarika ubuhahirane n’ibindi bice by’Igihugu”.

Umunyamabanga Nshingwabikorwa w’Akarere ka Nyaruguru, Kamana Diane wari uhagarariye ubuyobozi mu munsi mukuru w’umuhinzi w’icyayi avuga ko iki kibazo bakizi ariko bagiye kukiganiraho n’izindi nzego kugira ngo gishakirwe igisubizo gihamye umuhinzi ahinge kandi abone amafaranga y’ibyuya bye.

Uru ruganda ruvuga ko rwabashije kwinjiza imisoro ingana n’amafaranga y’u Rwanda miliyari imwe na miliyoni magana atanu (1.500.000.000 frw) bikaba byaraturutse ku bwiyongere bw’umusaruro wazamutseho 20% bivuye ku 10% ndetse bemeza ko muri uyu mwaka wa 2023-2024 umusaruro uzazamuka ku kigero 10%.

Uyu musaruro iyo ubonetse ugarukira abahinzi bagahembwa buri mwaka, gusa uyu muhanda basaba mu gihe utatunganywa neza ngo umusaruro woherezwe ku isoko byabashyira mu gihombo.

  • AKIMANA JEAN DE DIEU
  • Ukuboza 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE