Nyaruguru: Barataka gusiragizwa n’abayobozi b’inzego z’ibanze

  • AKIMANA JEAN DE DIEU
  • Mutarama 10, 2024
  • Hashize amezi 2
Image

Sakindi Paulin aherutse kurega uwo yakekaga ko yamwibye, ageze ku Kagari bamusaba kubanza kugaragaza Mituweli kuko ikibazo cye batakijyamo atabanje kwishyura ubwisungane mu kwivuza.

Yarabinginze ngo babanze bamukemurire ikibazo azabe yihyute mituweli mu cyumweru gikurikiyeho barabyanga.

Sakindi ni umwe mu mu baturage bo mu Murenge wa Busanze babangamiwe n’uko basiragizwa igihe cyose bagiye gusaba serivisi zihutirwa rimwe na rimwe.

Yagize ati: “Njyewe baherutse kunyiba njya kurega uwanyibye bambwira ko ngomba kubanza kugaragaza ko natanze Mituweli kandi koko ntabwo nari narayitanze kuko ubushobozi bwambanye buke kubera n’uburwayi nagize. Nabasabye ko nashaka ubishobozi nkazayitanga mu cyumweru kizakurikiraho barampakanira ndataha mpita mbireka nkomeza kurengana.”

Aba baturage bavuga ko babuzwa kubona serivisi mu gihe bitoroshye ko ibyo basabwa kuba bujuje muri gahunda za Leta bidashobora ko babibonera rimwe, uhereye kuri Mituwelim umusanzu wa EjoHeza, ubwishingizi bw’amatungo n’ibihingwa, amafaranga y’isuku, ay’ifunguro ry’abanyeshuri n’ibindi.

Niyonzima Anicet avuga ko abaturage benshi bajya gusaba serivisi mu Tugari tw’Umurenge wa Busanze basabwa kugaragaza aho batangiye imisanzu itandukanye uwo basanze atarayitanze bakamwihorera.

Yagize ati: “Twebwe twarumiwe kuko abayobozi bacu bigaragara ko badusiragiza bitwaje ko hari ibyo tutujuje kandi muri iki gihe biragoye kuko umuturage asabwa byinshi ushobora no gusanga bitabonekera rimwe, bigatuma rero yasaba indi serivisi ntayibone kuko hari ibyo atarabasha kubona”.

Mukanyandwi Brigitte avuga ko bibaje kubona umuturage asiragizwa kandi yari yizeye guhabwa serivisi.

Yagize ati: “Biratubabaza kubona umuturage yarenganywa yajya gusaba ubufasha bwo kurenganurwa bakagusiragiza bakagusaba ko hari ibyo ugomba kubanza kuzuza kandi nta bushibozi ufite bwo kubikora ako kanya ari ibintu ugomba gushakisha.”

Umunyamabanga Nshingwabikorwa w’Umurenge wa Busanze Ndamuramya Fidele, avuga ko nta muturage usabwa kubanza kugira ibyo yuzuza kugira ngo ahabwe serivisi.

Yavuze ko umuturage uzasaba serivisi akayimwa haba ku Mukuru w’Umudugudu cyangwa mu Kagari agomba kubivuga uwabikoze akabiryozwa, kuko umuturage agomba kurenganurwa ku karengane kose yaba yakorewe.

Umuyobozi w’Akarere ka Nyaruguru wungirije Ushinzwe Iterambere ry’Ubukungu Gashema Janvier, avuga ko umuturage agomba guhabwa serivisi nta nkindi kigendeweho kuko kumusiragiza ko hari ibyo atujuje ntaho byanditse mu mategeko cyangwa amabwiriza.

Yagize ati: “Buri muturage wese agomba guhabwa serivisi nta kindi gihereweho keretse ko hari serivisi zizwi zigomba kubanza kwishyurwa biciye ku irembo kandi iyo wujuje ibisabwa uhabwa serivisi ariko ntubanza gusabwa ko ugura serivisi za Mituweli n’ibindi biramutse bihari byaba ari ukugora abaturage.”

Akomeza avuga ko hari serivisi umuntu ahabwa yamaze kuzishura ariko nta muntu ufite uburenganzira bwo kwima cyangwa gusiragiza umuturage kuko hari ibyo atujuje bigatuma ataha amara masa kandi yari yaje gusaba ubufasha ku kibazo kimukomereye kandi twijeje abaturage ko tugiye kubikurikirana tukamenya ukuri kwabyo.

Mu bihe bitandukanye abaturage batuye mu bice bitandukanye bakunda kuvuga ko badashabwa serivisi mu gihe bayisabye.

Mu bushakashatsi buherutse gukorwa n’Ikigo cy’Igihugu cy’Imiyoborere mu Rwanda ki gipimo cy’imiyoborere ibereye abaturage n’imitangire ya serivisi hashingiwe ku byifuzo by’abaturage cyagaragaje ko muri uyu mwaka wa 2023.

Akarere ka Nyaruguru kaje ku mwanya wa 19 n’amanota 76.2% mu gihe mu mwaka wari wabanje wa 2022 bari bafite amanota 77.8% bigaragara ko amanota yagabanyutse ndetse abaturage 16.4% ntibishimiye uburyo bahabwamo serivisi.

  • AKIMANA JEAN DE DIEU
  • Mutarama 10, 2024
  • Hashize amezi 2
TANGA IGITEKEREZO
lg says:
Mutarama 11, 2024 at 8:27 am

Niki gituma amategeko ashyirwaho ndetse hagashyirwaho nibihano kubatayubahiriza nuko abantu benshi batakumwa ngo bakore ibyo basabwa badatinya ibyo bihano bazahabwa ushaka guhabwa services wemererwa namategeko aliko wowe udakora ibyo amategeko agusaba!! umuturage utishoboye afite uburyo yoroherezwa kubona ibyo akeneye abandi halimo abahitamo kuyajyana mutubari aho kwishyura Mutuelle umuturage utishyura Mutuelle bigaragara ko ashoboye kuyitanga aba yishe amategeko nta services ubundi nawe yagombye gusaba kugira abana bakarwarira mu nzu utaha uli umusinzi uretse na services ahubwo bakwiye no kujya babafunga utishoboye uwo we agomba gufashwa kubona ibyo akeneye kwivuza nibya mashuli yabana ibyo ningombwa buriya naba bakire mubona bamwe batanga imisoro kubwo gutinya ibihano byitegeko ubundi ntibabikora babishaka atari itegeko no mungo zimwe imigenderano wasanga ali umwanda gusa itegeko ni ryubahwe aho kwikoma inzego zibanze twahawe twegejwe zaje ngo zidufashe ntizaje ngo duhangane

Andika igitekerezo

AMATEGEKO AGENGA IYANDIKA RY'IGITEKEREZO CYAWE