Nyaruguru: Abatujwe mu Mudugudu w’Icyitegererezo wa Munini barakirigita ifaranga

  • Imvaho Nshya
  • Ugushyingo 4, 2023
  • Hashize amezi 4
Image

Abaturage batujwe mu Mudugudu w’Icyitegererezo wa Munini uherereye mu Karere ka Nyaruguru batujwe na Perezida wa Repubulika y’u Rwanda Paul Kagame baravuga ko basigaye bakirigita ifaranga nyuma yo korozwa amatungo magufi, bakaba babimushimira.

Batangarije Imvaho Nshya ko kuva mu mwaka ushize batujwe muri uyu mudugudu bamaze kugirisha ingurube n’ifumbire izikomokaho asaga miliyoni 17 z’amafaranga y’u Rwanda bakaba baratangiye kwiteza imbere bakanemeza ko bazitura abandi.

Mukanyarwaya Placidie avuga ko yaje aseta ibirenge kubera ko yumvaga atakwimurwa, ahageze babahaye inzu nziza.

Yagize ati: “Naje mu mudugudu watwubakiwe nseta ibirenge kubera ko numvaga ntashaka kuva aho nabaga nubwo hashyiraga ubuzima bwanjye mu kaga, ariko nabonye ari byiza nkanda ku gikura umuriro ukaka ndetse twahawe ingurube none zatangiye kuduha amafaranga ku buryo ayo nabonyemo yamfashije gutangira umushinga wo gucuruza mu gasoko baduhaye”.

Nkurunziza Eugene avuga ko bakimara guhabwa inzu batiyumvishaga uko bazabaho ariko amatungo magufi bahawe yabafashije kubona ifumbire ndetse ziranororoka ku buryo bagurishije bakabona amafaranga yo kwikenuza.

Yagize Ati” Tumaze gutuzwa hano twumvaga bibaye ihurizo ku buzima bwacu kubera imibereho yo mu midugudu ariko bakimara kuduha amatungo magufi twabonye ko ubuzima buhindutse tubonye amatungo magufi twarayoroye tuyafata neza arororoka turagurisha tubona amafaranga yo kwikenura ubu twatangiye kwiteza imbere”.

Mukangenzi Marie Jeanne avuga ko ashimira Umukuru w’Igihugu wabahaye umudugudu mwiza ndetse bagahabwa imirima n’amatungo.

Ati: “Dushimira Umukuru w’Igihugu cyacu Paul Kagame kuko yaduhaye ahantu heza ho kuba hadukwiye kuko aho twabaga hari habi cyane mu manegeka kandi anaduha amatungo yororotse cyane tubona ifumbire duhingisha ku buryo nayo tuyigurisha abandi bakaduha amafaranga. Numva nanjye nzashaka umuturage nakoroza ku itungo nanjye nahawe rikaba ryaramaze kunyungukira ntituye naba nkoshereje uwanyoroje”.

Umukozi Ushinzwe ubworozi mu Murenge wa Munini akaba anakurikirana ubworozi bw’Ingurube zahawe imiryango yatujwe muri Mudugudu w’Icyitegererezo wa Munini, Dusabimana Dieudonne avuga ko ubwoko bw’ingurube bahawe bwororoka kandi abaturage babigize ibyabo bazifata neza ku buryo mu mezi atandatu ya mbere izi ngurube zabwaguye ibyana 160.

Yagize ati: “Twahawe ubwoko butatu bw’ingurube ari bwo Diloc, Live White, Fietro kandi abaturage bakoze ibishoboka byose bazifata neza natwe tubaterera intanga ku buryo zororotse cyane mu mwaka umwe bari bamaze kubona umusaruro ungana n’ingurube 380 bahereye kuri 48 zingana n’imiryango yatujwe muri uyu mudugudu kuko mu mezi atanduatu yari yabanje zari zabwaguye izigera ku 160”.

Akomeza avuga ko usibye ingurube zabwaguye n’ifumbire yabafashije kongera umusaruro bigera naho basagura bakagurisha ku bandi baturage bahinga bayikenera kugira ngo bayihingishe.

Mu mwaka ushize bagurishije ingurube 179 mu ngurube 385 zibinjiriza amafaranga y’u Rwanda agera kuri 17.233.900 hasigaye ingurube 206 naho imwe yarapfuye maze Sosiyete ya Radiant yabahaye ubwishingizi irabishyura ariko 8.314.850 yahawe abaturage biteza imbere naho 8.919.050 ashyirwa muri Koperative.

Muri aba banyamuryango uwafashe amafaranga macye yakiriye ibihumbi 36 000 naho uwabonye menshi yabonye 386.000 mu gihe hari ingurube 4 zabaye ingumba nazo zagurishijwe zikavamo amafaranga 1.440.200.

Muri uyu Mudugudu w’Icyitegererezo wa Munini (IDP Munini) watujwemo imiryango 48 yabaga muri Ntuyenabi ku mpamvu zo kubarindira ubuzima ndetse no kubegereza ibikorwa by’iterambere bakaba banakora ubuhinzi burimo ibitunguru, beterave, amashu, intoryi kandi abaturage 20 batagiraga ubutaka bahawe imirima mu gishanga cy’Agaseke bahingamo ibirayi naho abandi bataragerwaho bakazahabwa imirima mu materasi.

AKIMANA JEA DE DIEU

  • Imvaho Nshya
  • Ugushyingo 4, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE