Nyaruguru: Abasabwa amafaranga ngo bahabwe ubufasha bakangurirwa gutanga amakuru

  • AKIMANA JEAN DE DIEU
  • Mutarama 9, 2024
  • Hashize ukwezi 1
Image

Bamwe mu baturage batuye mu Murenge wa Busanze, mu Kagali ka Kirarangombe bavuga ko ubufasha bagenerwa ngo bivane mu bukene butabageraho kubera ko abakora urutonde rw’abazihabwa babasaba amafaranga, ariko ubuyobozi bukaba bubasaba gutanga amakuru icyo kibazo kigakurikiranwa.

Abo baturage bavuga ko ngo kugira ngo bahabwe ubufasha babanza gupfumbatiza abakora urutonde ndetse ko hari naho uru rutonde rushyirwaho abitabye Imana.

Mu Kiganiro bagiranye n’Imvaho Nshya bavuga ko ibi bibazo bigaragara cyane mu gihe bahawe imirasire y’ubuntu ndetse n’imbabura zigabanya ibicanwa, amatelefoni n’ibindi bagasaba ubuyobozi kubegera bukamenya ibibazo baterwa n’abayobozi babi.

Mukamurenzi ni izina ryahawe uwemeye guha Imvaho Nshya amakuru, avuga ko iyo haje ubufasha bugenerwa imiryango ikennye kurusha indi hari bamwe mu bayobozi basaba abaturage kugira amafaranga bishyura.

 Ati: “Twebwe duhora twibaza impamvu haza ubufasha bugenewe abakennye kurusha abandi bikarangira dusabwe gutanga amafaranga kugira ngo badushyire ku rutonde rw’abazabuhabwa, ariko ntitumenye aho byarengeye kandi twaranasabwe gutanga amafaranga”.

Minani (ni izina yahawe) we avuga ko mu Kagali ka Kirarangombe ho mu Mudugudu wa Gisenyi nta muturage ushobora kubona ubufasha atishyuye kandi hari n’ubwo amazina y’abatakiriho.

Yagize ati: “Nta muturage ushobora guhabwa serivisi zigenerwa abatishoboye atabanje gutanga amafaranga hagati ya 500 n’ibihumbi 3000 kuko hano birazwi rwose ubufasha buhabwa abishyuye. Ikindi gitangaje ni uko hari n’igihe twumva basomye urutonde tukibura hakagaragaraho abantu bapfuye kera bikatwereka uburimanganya buba bwakozwe n’abayobozi n’ubwo atari bose”.

Kankesha Euralie avuga ko bibabaje kubona Leta ishaka kuvana abantu mu bukene maze bakazitirwa na bamwe mu bayobozi bakweduye ibifu mu gucuza abaturage.

Yagize ati: “Twebwe twifuza abayobozi batugeza ku iterambere ntabwo twifuza abaducucura n’ibyo twari dufite kandi ari bo bakwiye kureberera abafite amikoro make, ariko niba bibananiye Akarere kaze kadufashe kabirukane hashyirweho abayobozi bazakorera abaturage bakumva ibyifuzo byacu, bakadufasha kuva mu bukene aho kudusubiza inyuma kurusha naho twari tugeze”.

Umunyamabanga Nshingwabikorwa w’Umurenge wa Busanze, Ndamuramya Fidele yabwiye Imvaho Nshya ko iki kibazo cy’abaturage basabwa gutanga amafaranga atakizi ariko ko kigiye gukurikiranwa.

 Ati: “Ibyo kwakwa amafaranga ntabwo tubizi ndetse nta n’umuturage uratubwira ko bamwatse amafaranga ariko turabikurikirana tunabimenye neza. Gusa uwo bazaka amafaranga, azavuge uwo yayahaye abiryozwe. [….] hari abaterankunga bazana bimwe mu bikoresho bitandukanye birimo nkunganire bigasaba abaturage kubanza gutanga amafaranga kugira ngo babihabwe babe batanze uruhare rwabo”.

Akomeza avuga ko impamvu umuntu ashobora gusangwa ku rutonde kandi yarapfuye biterwa n’uko abakora urutonde rw’abaterankunga bashobora kujya mu budehe bagafatayo urutonde rushobora kugaragaraho abantu bapfuye batarandukuzwa mu bitabo by’irangamimerere.

Umuyobozi w’Akarere ka Nyaruguru wungirije ushinzwe iterambere ry’Ubukungu, Gashema Janvier avuga ko nta muyobozi ukwiye gufata amafaranga y’umuturage kugira ngo amuhe serivisi kuko hari amabwiriza agena uko serivisi zishyurwa kandi ntabwo tuzihanganira abayobozi bakora gutyo tugiye gukurikirana iki kibazo.

Yagize ati: “Mu by’ukuri nta muyobozi ukwiye gusaba amafaranga umuturage, kuko hari serivisi zizwi zishyurwa kandi naho zishyurirwa harazwi ariko natwe ntabwo twakwihanganira abayobozi bakora gutyo kuko ntabwo baba bakorera abaturage batumweho”.

Akomeza yibutsa abaturage ko serivisi zisabirwa ku rubuga rwa Irembo bityo uzabaka amafaranga atabahaye icyemezo bazabivuga akabiryozwa, kuko ibyo ni bimwe mu byangiza ihame ry’Imiyoborere myiza kandi abakora gutya ibihano birateganyijwe.

Abaturage bo mu Kagali ka Kirarangombe bavuga ko batuye mu bilometero 3 uvuye ku mupaka uhana imbibi n’u Burundi bakanemeza ko kugera ku Biro by’Akarere ka Nyaruguru bakora urugendo rw’ibilometero 23,5 (23.5Km), bakaba basaba ko ubuyobozi bw’Akarere bwajya bubegera kenshi kugira ngo babugezeho ibibazo baterwa na serivisi mbi bahabwa n’ababayobora ku rwego rw’Umudugudu, Akagali n’Umurenge wa Busanze.

  • AKIMANA JEAN DE DIEU
  • Mutarama 9, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE