Nyaruguru: Abangirijwe imitungo n’umuyoboro w’amazi basaba ingurane

  • AKIMANA JEAN DE DIEU
  • Werurwe 18, 2024
  • Hashize ukwezi 1
Image

Abaturage bo mu Mirenge ya Muganza na Nyabimata basaba ubuyobozi kubaha ingurane y’ibyabo byangijwe n’umuyoboro w’amazi wa Kilometero 37 489 wacishijwe mu masambu yabo ndetse hakanubakwamo ibigega by’amazi.

Bamwe muri bo babwiye Imvaho Nshya ko batabonye ingurane bavuga ko bangirijwe imyaka ntibahabwe ingurane kandi hari bagenzi babo bayihawe.

Mukamana Scholastique avuga ko bamuranduriye ibishyimbo byagombaga kumutunga.

Yagize ati: “Uyu muyoboro w’amazi wangije ibishyimbo nari narahinze barabirandura ku buryo nateganya ko byantungira umuryango ariko byarangiye ntabonye ingurane kandi naragombagaga kubona umusaruro wamfasha”.

Umuturage witwa Kamari Jean Paul avuga ko uyu muyoboro watumye isambu ye ihuriramo ibigega byakira amazi akarandurirwa imyaka.

Ati: “Njyewe isambu yanjye yubatswemo ibigega ntarahabwa ingurane kandi aho byubatswe baharanduye imyaka yanjye yagombaga kumfasha kwihaza mu biribwa kurushaho ndetse barambariye ariko amaso yaheze mu kirere ndifuza ko nanjye nahabwa amafaranga yanjye nanjye nkagerageza kwirwanaho.”

Umuyobozi w’Akarere ka Nyaruguru, Dr Emmanuel Murwanashyaka avuga ko abaturage bangirijwe ibikorwa byabo bakwiye kwegera ubuyobozi bw’akarere aho bakomoka bakabumenyesha ibyangijwe hagakorwa ututonde rwabo.

Ati: “Hari abaturage bagiye bahabwa ingurane mu bihe bitandukanye ariko niba hari abaturage babagaragarije ko bafite ibibazo byo kuba batarabonye ingurane birashoboka kuko bakubaruriye ntutange ibyangombwa byose usabwa ntabwo wabona amafaranga, kimwe nuko hari abo usanga bafite imitungo ihuriweho bisaba guteranya imiryango yabo nibegere ubuyobozi bubafashe.”

Yongeyeho ko ku bufatanye na WASAC bagiye kwegera abaturage bamenye ikibazo cya buri wese n’ibyo bakwiye kugaragaza kugira ngo uwo basanze yarangirijwe ashyirwe ku rutonde yishyurizwe ingurane ye ikwiye.

Muri iyi Mirenge yombi hashyizwe imiyoboro 2 yubatswe mu Murenge wa Muganza harimo; umuyoboro wa Kirekire -Tangabo I ufite uburebure bw’ibilometero 6,650 (6,650km), Kirekire -Tangabo II ufite uburebure bw’ibilometero 18,650 (18,650km) ndetse n’umuyoboro witwa Kirekire- Nyabimata ufite ibilometero 12,189 (12,189km).

  • AKIMANA JEAN DE DIEU
  • Werurwe 18, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE