Nyanza: Isoko rya kijyambere bemerewe mu myaka 5 ishize ntirirubakwa

  • Imvaho Nshya
  • Nzeri 18, 2023
  • Hashize amezi 8
Image

Hashize imyaka ijya kuba 5 abarema n’abakorera mu isoko rya Nyanza riherereye mu Murenge wa Busasamana babwiwe ko bazubakirwa isoko rya Kijyambere aho risanzwe riri, bemeza ko ribangamiye ubucuruzi bwabo binatuma bimwe mu byo bacuruza byibwa naho ibindi bikangirika.

Mu kiganiro bahaye Imvaho Nshya bavuga ko babangamiwe n’imiterere y’iri soko ribatera igihombo ariko Akarere kakavuga ko inyigo yakozwe ndetse bagikusanya ubushobozi bwo kubaka iri soko.

Mukagakwaya Solange avuga ko hashize igihe kirekire ubuyobozi bubabwiye ko bafite igitekerezo cyo kubaka isoko rigezweho ariko amaso yaheze mu kirere ndetse iryo bakoreramo ribateza igihombo kimwe n’umutekano w’ibicuruzwa byabo.

Yagize ati: “Ndi umucuruzi w’imbuto ariko hashize imyaka hafi 5 niba nibuka neza ubuyobozi bw’Akarere butwemereye ko bugiye gukora inyigo bakatwubakira isoko rigezweho ariko twarategereje turaheba kandi ibicuruzwa byacu birangirika kandi n’umutekano wabyo ntabwo tuba tuwizeye bidutera igihombo kuko hari ibyo ducuruza bihita byangirika”.

Munana Tharcisse avuga ko bigoye abacuruzi bacuruza imboga ndetse n’ibindi bintu bishobora kubora kubera imiterere y’iri soko bagasaba ko akarere gakwiye kwihutisha imirimo yo kubaka isoko kuko mu bihe bitandukanye batubwiye ko inyigo yakozwe ahubwo ntabwo tuzi icyatumye imirimo idatangira.

Yagize ati: “Iri soko ryacu dukoreramo riratugora rimwe na rimwe dutaha tutizeye umutekano w’ibicuruzwa byacu kubera ubujura buhari kuko ntabwo ricungwa neza, ariko igihombo kikagaragara cyane ku bantu bacuruza ibintu bibora vuba birimo imboga, imineke, inyanya n’ibindi umuntu agura ahita abikoresha ariko hubatswe isoko ryiza batwemereye kandi hashize igihe umuntu yanagura ibyuma bikonjesha, tukajya tubikamo ibintu bipfa tunizeye umutekano wabyo ariko ubu dukorera mu bihombo sinakubeshya rwose”.

Umuyobozi w’Akarere ka Nyanza, Erasme Ntazinda avuga ko iri soko ryakorewe inyigo kandi barimo gushaka abafatanyabikorwa kugira ngo bafatanye n’Akarere kuryubaka, gusa turebye ku nyigo yakozwe twasanze nibura dukeneye miliyari zisaga 2,5 z’amafaranga yu Rwanda kugira ngo hubakwe isoko ryiza rya kijyambere ryacungwa neza kurushaho abacuruzi bagakora akazi kabo neza.

Ati: “Ni byo koko iri soko ryatinze kubakwa ndetse hashize igihe kirekire abarikoreramo bifuza kubakirwa isoko rya kijyambere ariko kandi natwe ntabwo twicaye twakoze inyigo maze igaragaza ko rizubakwa n’amafaranga asaga miliyari 2,5 z’amafaranga y’u Rwanda kugira ngo tube dufite isoko ryiza rifite umutekano kandi rifite byose umuntu yakwifuza bitavangavanze nibura buri gice gifite ibyakigenewe”.

Akomeza avuga ko hari abo bakirimo kuganira ngo haboneke ubushobozi kandi hari abemeye ko bazashoramo imari.

Uyu ni umushinga mugari twebwe tutakwishoboza twenyine nk’Akarere ahubwo biradusaba gufatanya n’Abikorera bagashoramo imari kandi turabizeza ko natwe tuticaye ikibazo gihari tukibona, igisigaye ni ukwegeranya ubwo bushobozi imirimo igatangira.

Abakorera muri iri soko bavuga ko mu gihe uyu mushinga uzaba watangiye gushyirwa mu bikorwa na bo biteguye gutanga uruhare rwabo kugira ngo wihute bace ukubiri n’ubujura no kwangirika kw’ibicuruzwa byabo n’imicungire yaryo izaba inyuze mu mucyo kandi hakiyongeramo ibikorwa remezo bitandukanye ndetse n’Umujyi ukagira isura nziza.

AKIMANA JEAN DE DIEU

  • Imvaho Nshya
  • Nzeri 18, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE