Nyanza: Hakenewe umufasha mu kubaka Gare ya miliyari 3 Frw

  • Imvaho Nshya
  • Ukwakira 3, 2023
  • Hashize amezi 8
Image

Hashize igihe ubuyobozi bw’Akarere ka Nyanza bwemeje ko imirimo yo kubaka Gare igezweho abagenzi bategeramo imodoka izatangira vuba, ikazubakwa ku muhanda w’ahazwi nko ku bigega mu kibanza kiri aherekeza mu Mujyi wa Nyanza.

Ubuyobozi bw’Akarere ka Nyanza buhamya ko bukomeje gushakisha umufatanyabikorwa ubafasha kubaka iyo Gare biteganyijwe ko izuzura itwaye akayabo ka miliyari eshatu z’amafaranga y’u Rwanda.

Mu kiganiro, Ntazinda Erasme, Umuyobozi w’Akarere ka Nyanza, yahaye Imvaho Nshya yemeje ko izo miliyari 3 z’amafaranga zikenewe zizifashishwa mu kubaka imbuga y’aho imodoka zajya ziparika zaba izivuye i Kigali cyangwa i Huye, ndetse n’inzu ngari y’ubucuruzi  izakorerwamo ibikorwa bitandukanye.

Ntazinda yemeje ko ibikorwa byo gushaka abafatanyabikorwa bikomeje kugira ngo bazafatanye n’Akarere gushyira mu bikorwa uwo mushinga utegerezanyijwe amatsiko menshi, cyane ko ikigo abagenzi bategeramo imodoka gihari kidakwiye ndetse ari gito  ugereranyije n’urujya n’uruza rugikorerwamo.

Yagize ati: “Turacyashaka abafatanyabikorwa kugira ngo twubake ikigo abagenzi bazajya bategeramo imodoka kuko hariya mubona hakoreshwa ntabwo twahita muri Gare kuko mwabonye ko nta modoka 10 zahahurira ngo zibone aho ziparika ni hatoya cyane”.

Akomeza avuga ko inyigo y’ibanze yakozwe yagaragaje ko hakenewe amafaranga asaga miliyari 3 kugira ngo hubakwe Gare nziza ijyanye n’igihe.

Yagize ati: “Kugeza ubu iby’ibanze byarakozwe kuko n’inyigo yayo twarayikoze dusanga ishobora gutwara asaga miliyari 3 bitewe n’ihindagurika ry’ibiciro ku isoko ariko turacyavuga n’abashoramari bakwiye kwishyira hamwe bakabasha gukora uyu mushinga mugari uzaba ufite inzu z’ubucuruzi n’aho imodoka zizajya ziparikwa ariko ntabwo twicaye turacyabikoraho”.

Gare ya Nyanza ihari ivugwaho kuba idashobora kwakira imodoka zihagije

Abaturage bo mu Karere ka Nyanza bavuga ko aka Karere gakunze gusurwa na benshi kubera ibikorwa by’ubukerarugendo byiganjemo ibishingiye ku muco n’amateka, bityo kubona gare igezweho na byo bizarushaho gutanga umusaruro.

Minani Prosper avuga ko nta gushidikanya iyo gare izafasha ba mukerarugendo.

Yongeraho ko ahasanzwe hakoreshwa hegereye isoko rya Nyanza mu Murenge wa Busasamana hadashobora guparikwa imodoka eshanu mu mwanya umwe, kubera ubuto bwaho.

Yemeza ko iki gikorwa remezo kije cyafasha mu kuzamura ubwiza bw’uyu Mujyi no kuwagura.

Mukarugenda Jacqueline avuga ko ubuyobozi bukwiye kwihutisha iyi mirimo yo kubaka gare nziza yajya ifasha abakora ingendo akavuga ko usanga hakorera kompanyi zitwara abagenzi gusa zo mu majyepfo iyo zigusize birakuyobera.

Yagize ati: “Hakwiye kwagura igikorwa kugira ngo imirimo yo kubaka Gare yihutishwe, kuko yajya ifasha abakora ingendo bakanyura i Nyanza kuko n’imodoka zaba nyinshi abantu ntibategereze cyane kuko usanga imwe igusize utegereza indi yakuzura ugatangira kubunza imitima uti ndaharaye”.

Mu myaka 4 ishize Akarere ka Nyanza kavugaga ko hari imishinga itandukanye harimo kubaka Gare ya Nyanza, isoko rya Kijyambere rya Nyanza, Sitade ya Nyanza n’ibindi hagamijwe kwegereza abaturage ibikorwa remezo byabafasha kubona serivisi hafi yabo ndetse bakanabona ibikorwa by’imyidagaduro.

Iyi Gare ya Nyanza izubukwa mu kibanza kirimo inzu y’uwabaye umwami wa Nyuma w’ u Rwanda Kigeli V Ndahindurwa, biteganyijwe ko hazagabanywamo kabiri kugira ngo ahari iyi nzu hazanakoreshwe mu bikorwa by’Ubukerarugendo.

Biteganyijwe ko Gare izubakwa muri iki kibanza giherereye ahitwa ku Bigega

AKIMANA JEAN DE DIEU

  • Imvaho Nshya
  • Ukwakira 3, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE