Nyanza: Barembejwe n’Abatikuzi’ babariganya inkunga bahabwa na Give Directly

  • Imvaho Nshya
  • Ukwakira 3, 2023
  • Hashize amezi 8
Image

Bamwe mu baturage bo mu Karere ka Nyanza bari mu bagenerwabikorwa b’Umuryango Give Directly ufasha abatishoboye uboherereza amafaranga kuri telefoni bavuga ko barembejwe n’abitwa Abatikuzi babambura ubwo bufasha binyuze mu kubaha inguzanyo ku nyungu zihanitse mbere y’uko ya nkunga ibageraho.

Abavuganye n’Imvaho Nshya  mu Kagali ka Kadaho, Umurenge wa Cyabakamyi ho mu Karere ka Nyanza, bagaragaje uburyo inzozi zo kuva mu bukene binyuze mu nkunga itangwa n’Umuryango Give Directly babona zibaca mu myanya y’intoki kubera abo Batikuzi baza kubaha inguzanyo bishyura ku nyungu iri hagati ya  50-70% bamaze guhabwa aya mafaranga yo kubafasha kuva mu bukene.

Abo baturage bavuga ko Umuryango Give Directly uhereza umuryango amafaranga y’u Rwanda miliyoni n’ibihumbi 175 mu gihe urubyiruko rutishoboye rwo ruhabwa amafaranga y’u Rwanda 600 000.

Bivugwa ko abo biswe Abatikuzi babakorera ubwambuzi bushukana bakusanya amakuru y’aho abaturage bazafashwa batangiye kubarurwa, ubundi bakabaha inguzanyo mbere y’uko bahabwa ya nkunga bagasezerana n’abagenerwabikorwa ko bagomba kwishyura ubwo bazaba bahawe ya mafaranga.

Kubera ubukene bw’amafaranga abo baturage baba bafite, bemera kwakira ya nguzanyo ariko bakabona ko bibeshya mu gihe cyo kuyishyura, kuko bisanga ya mafaranga agiye mu maboko y’abatikuzi bo bagasigara amara masa.

Uwahawe izina rya Thomas avuga ko Abatikuzi bahari kandi bakora umunsi ku munsi nk’abakozi bahoraho kandi bajya mu Kagari kaba kagiye gukurikiraho hatangwa iyi nkunga yo kubafasha kuva mu bukene.

Yagize ati: “Abatikuzi barahari kandi si abaturage bakomoka muri uyu Murenge, bakomoka ahantu tutazi,  baza bajya mu Kagari kagiye gukurikiraho batanga amafaranga y’inkunga. Mu bigaragara rero ntacyo amafaranga azamarira abayahabwa kuko niba aguhaye ibihumbi 100 umwishyura ibihumbi 150 bivuze ko ushyiraho 50%”.

Uwahawe izina rya Melanie avuga ko iyo Abatikuzi baje bakabwira umuturage ko bagiye kumuguriza amafaranga arayakira bakanamutegeka uko azabishyura; abo mu byiciro byo hasi basabwa kuzishyura urwunguko rwo hagati ya 50% na 70%.

Yagize ati: “Njyewe bangezeho bampa ibihumbi 200 tuvugana ko nzabaha urwunguko rwa 70% bivuze ko nishuye hafi ibihumbi 290; niba bampaye igice cya mbere ibihumbi 350 nahise nsigarana ibihumbi 60 unasanga n’ayo baguhaye ntacyo wayakoresheje mu by’ukuri kubera ingano yayo”.

Mukagakwaya Esperance w’Imyaka 36 na we yavuze ko aya mafaranga bahabwa na Give Directly, bagorwa n’uko aza mu byiciro ari na yo mpamvu bagwa mu bishuko byo gufata inguzanyo zimeze nka banki lamberi.

Yagize ati: “N’ubundi tuba dusanzwe twibereye mu bukene, iyo ubonye uguha make yo kurya urayacakira ukayarya, ariko buriya bayatangiye rimwe byafasha kuko wakoramo agashinga ukagura agatungo kazakugoboka nyuma y’igihe runaka”.

Umunyamabanga Nshingwabikorwa w’Umurenge wa Cyabakamyi Burezi Eugene, yabwiye Imvaho Nshya ko bamaze kumenya iki kibazo cyaba biswe Abatikuzi kandi hari uwafashwe afite indangamuntu z’abantu 6 yari yaramaze guha inguzanyo na telefoni 3 zatanzwe n’uwo Muryango.

Yagize ati: “Ni byo twamenye aya makuru ndetse dufata umwe muri aba bamamyi bitwa “Abatikuzi” akaba yari afite indangamuntu z’abantu 6 yari yarahaye amafaranga ndetse na telefoni 3 zatanzwe muri iyi gahunda, kandi yanashyikirijwe inzego bireba kugira ngo zimukurikirane kuko aba akora ubwambuzi bushukana”.

Akomeza avuga ko aba Batikuzi benshi muribo badakomoka mu Karere ka Nyanza ahubwo bakomoka mu Turere twa Huye na Rusizi akavuga ko banavuganye na Give Directly bayisaba kujya yihutisha inkunga kugira ngo uwamaze gushyirwa ku rutonde ajye ayihabwa byihuse.

Give Directly ni Umuryango wiyemeje guhuza abagiraneza n’abo bafasha aho baba bari mu bice bitandukanye ku Isi babaha amafaranga bohererezwa kuri telefoni nta handi iyo nkunga inyuze.

Uyu muryango ukorera mu bihugu 11, aho mu Rwanda honyine ingo zibarirwa mu 200 000 ari zo zimaze kubona iyo nkunga itangwa ku miryango iba ituye ahantu ihamaze nibura amezi 6 kandi igahabwa mafaranga mu bice bibiri harimo 30% bahabwa ku ikubitiro na 70% bakayahabwa nyuma y’amezi hagati y’atatu n’atandatu.

Mu bindi bihugu ukoreramo harimo Repubulika Iharanira Demokarasi ya Congo (RDC),  Kenya, Liberia, Malawi, Mozambique, Morocco, Nigeria, Uganda, USA na  Yemen.

Uwahawe amafaranga nta kindi asabwa uretse kumva inama zabo akazishyira mu bikorwa, kandi n’iyo bimunaniye nta nkurikizi n’imwe imubaho.

AKIMANA JEAN DE DIEU

  • Imvaho Nshya
  • Ukwakira 3, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE