Nyamasheke: Umukecuru w’imyaka 82 yahiriye mu nzu arokorwa akiri muzima

  • Imvaho Nshya
  • Ugushyingo 12, 2023
  • Hashize amezi 7
Image

Mujawamariya Angélique w’imyaka 82 wo mu Mudugudu wa Ruhinga ya 2, Akagari ka Kagatamu, Umurenge wa Bushenge, Akarere ka Nyamasheke, yari ahiriye mu nzu aryamye, ariko ku bw’amahirwe abagenzi bahitaga bamutabara inzu itaramukongokeraho.

Iyo nzu y’imbaho yari isakajwe amabati 72, yafashwe n’inkongi ahagana saa sita z’amamywa yo ku wa Gatandatu tariki ya 11 Ugushyingo, ibyarimo byose bikaba byakongotse uretse uwo mukecuru wahamagawe n’abagore bacuruza isambaza mu ngo.

Abaturage bo mu Mudugudu wa Ruhinga ya 2 babwiye Imvaho Nshya ko uwo mukecuru yari yiryamiye yanasinziriye kuko n’akavura kajojobaga, maze inzu ye ifatwa nk’inkongi bikekwa ko yaturutse ku nsinga z’amashanyarazi.

Umunyamabanga Nshingwabikorwa w’Akagari ka Kagatamu Murekatete Jeanne, yemeje iby’ayo makuru yongeraho ko abagore bagendaga bacuruza isambaza mu baturage ari bo babonye ko icumba umwotsi mwinshi n’umuriro utangiye kugaragara.

Bahise bakeka ko uwo mukecuru yaba arimo, bamukomangira ku rugi cyane bamuhamagara arumva, abyutse yumva ibintu bituragurika cyane mu gisenge cyayo (plafond) arebye asanga inzu igeze kure ishya, ni ko kwihutira kuyivamo.

Abo bagore bagerageje kwinjiramo ngo barebe ko hari ikindi baramura ariko biba iby’ubusa kuko umuriro wari umaze kuba mwinshi muri iyo nzu y’imbaho.

Bavuze ko baramuye ibintu bike cyane mu gihe, umukecuru we yasigaye amanjiriwe kuko ibyari mu nzu byose bibarirwa agaciro ka miliyoni 8.5 z’amafaranga y’u Rwanda byahiye bigakongoka.

Gitifu Murekatete yagize ati: “Twagerageje gutabara, turazimya ariko umuriro uturusha imbaraga, n’akavura gake kagwaga ntacyo kari kumara, icyakora ku bw’amahirwe umukecuru ntiyahiramo avamo ari muzima. 

Harakekwa insinga z’amashanyarazi kuko byatangiriye hejuru muri pulafo bituragurika, hagakekwa ko nk’izo nsinga zari zitujuje ubuziranenge, cyangwa hari nk’aho imbeba zaziriye zigashishuka zakoranaho umuriro  ugahita uza ugatwika inzu yose.”

Abaturanyi b’uyu Mukecuru basabye ubuyobozi bw’Akarere ka Nyamasheke gutanga isakaro byihuse kuko bo ubwabo biyemeje gushaka ibiti bakamugondera indi nzu yabamo mu gihe cya vuba.

Gitifu Murekatete yavuze ko bagiye gusaba umuganda w’abaturage, akanasaba Akarere kubaha ubufasha bw’amabati n’imisumari, bakongera kumwubakira

Umukecuru yarokowe n’abagore bahitaga bicururiza isambaza

Avuga ko inzu nyinshi muri ibi bice zubakishwa imbaho kuko nta bundi buryo babona, cyane ko  igitaka cyaho kidafata ku buryo kitavamo amatafari ya rukaraka.

Ikindi kibitera ngo ni uko nk’umutingito wa 2008 n’iyakurikiyeho, byagaragaye ko inzu z’imbaho ntacyo zabaye cyane mu gihe iz’amatafari zasenyukaga. Gusa baba bazisize vidanje ku buryo umuriro ukoraho imbaho zikagurumana, kuzimya  no kugira icyo ukuramo  bikananirana.

Aka Kagari kari kamaze igihe Imidugudu yako myinshi iri mu kizima, amashanyarazi bakaba barayabonye mu mwaka ushize.

Gitifu Murekatete avuga ko bishoboka ko abashyize insinga mu nzu y’uwo mukecuru n’izindi zifatwa n’inkongi z’umuriro bashobora kuba barabahaye izitujuje ubuziranenge.

Yasabye abaturage kujya baha akazi abantu babizi bakabarebera niba intsinza ziri mu nzu zabo nta kibazo zifite, basanga zitujuje ubuziranenge bakazisimbuza aho kuzisanga baririra mu myotis inkongi y’umuriro yabasize iheruheru.

Iyi nzu ibaye iya 4 ihiye mu gihe kitarenga amezi 3 mu Mirenge ya Shangi na Bushenge, kuko muri aka Kagari ka Kagatamu mu kwezi gushize inzu y’umuryango w’abantu 8 yahiye bagiye gusenga, ku bw’amahirwe  hashya igice kimwe gusa ikindi barakizimya ariko ibyinshi mu byari birimo birahatikirira.

Mu cyumweru gishize na bwo mu Murenge wa Shangi, inzu yabagamo umuryango w’abantu 9 na yo yafashwe n’inkongi y’umuriroiratokombera n’ibyari birimo byose, ubu bacumbikiwe n’abaturanyi.

Muri uwo Murenge nanone inzu y’umwarimu wigisha muri GS Nyamugari yarahiye irakongoka mu gihe kitageze ku mezi atatu ashize.

Inzu yahiye irakongoka

BAHUWIYONGERA SYLVESTRE

  • Imvaho Nshya
  • Ugushyingo 12, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE