Nyamasheke: Umubiri wabonetse ku musozi wiciweho Abatutsi 15,000 muri Jenoside

  • NTAWITONDA JEAN CLAUDE
  • Mutarama 11, 2024
  • Hashize amezi 5
Image

Umubiri bikekwa ko ari uw’umuturage wishwe muri Jenoside yakorewe Abatutsi mu 1994 wataburuwe aharimo gukorwa amaterasi ku musozi wa Kizenga uherereye mu Mudugudu wa Kizenga, Akagari ka Nyagatare, Umurenge wa Mahembe, Akarere ka Nyamasheke.

Umusozi wa Kizenga ufite amateka ashaririye kuko wiciweho Abatutsi barenga 15,000 bari bawuturiye mu yahoze ari Komini Rwamatamu.

Bamwe mu bacyibuka neza amateka y’ibyahabereye mu gihe cya Jenoside yakorewe Abatutsi mu 1994, bemeza ko abahungiye kuri uwo musozi bagabweho ibitero n’Interahamwe babanza kwirwanaho ariko baneshwa n’amasasu y’abasirikare n’abajandarume baje kubaha ubufasha.

Abaturage bose bari bahahungiye barishwe ndetse n’abagerageje gucika bakicwa umugenda, ari na yo mpamvu hari abatarahise baboneka baguye mu mabanga y’uwo musozi.

Ahagana saa yine z’igitondo cyo ku wa 8 Mutarama 2024, ni bwo uwo mubiri wabonetse  mu ibanga ry’uwo musozi ahatunganwa amaterasi muri gahunda ya VUP.

Aho wabonetse hari haruzuye umukenke kubera ko kuva Jenoside yakorewe Abatutsi yahagarikwa hatigeze hahingwa na rimwe, imwe mu mpamvu ikaba ari iy’uko bishoboka ko ba nyiri ubutaka bishwe icyo gihe.

Muri iyi minsi ni bwo hatangiye gutunganywa nyuma y’aho ubuyobozi bw’Akarere bushishikarije abaturage kubyaza umusaruro ubutaka butagira ikibukorerwaho by’umwihariko ububoneka mu Mirenge ya Mahembe, Gihombo na Kirimbi iri yahoze ari Komini Rwamatamu.

Yagize ati: “Mu gihe cyo kuhakura iyo mibiri nyuma ya Jenoside ntiyaharangiye yose kuko no muri iyi myaka ya vuba ahagiye hahingwa imibiri yagiye ihagaragara. Aha rero hari mu mukenke kuko hatigeze hahingwa, ari yo mpamvu tudashidikanya ko ari uw’uwishwe muri icyo gihe, byanatumye  n’inzego z’ubuyobozi, iz’umutekano n’iza Ibuka  zahageze zitashidikanyije.”

Uhagarariye Ibuka mu Karere ka Nyamasheke, Gasasira Marcel, yemeje ko iki gice cy’iyari Komini Rwamatamu, Perefegitura ya Kibuye, habereye ubugome ndengakamere muri Jenoside yakorewe Abatutsi mu 1994.

Yashimangiye ko buri gihe cyo kwibuka mu myaka yose ishize, abaturage bo muri iyo Mirenge bashyingura imibiri mishya iba yabonetse abaturage bahinga, bakora amaterasi cyangwa imihanda.

Avuga ko muri ibyo bice by’imisozi miremire byegereye Ikiyaga cya Kivu hiciwe abantu benshi bahahungiraga bafite icyizere cyo guhungira muri Congo banyuze iy’amazi ariko bagasanga Interahamwe zahabatanze zikamena amato.

Ati: “Abahagarariye Ibuka hariya n’ubuyobozi bw’Umurenge wa Mahembe ntibaraduha raporo yuzuye yawo baracyashakisha amakuru, ngo bibone kwemezwa neza ku rwego rwa Ibuka ku Karere ko koko ari uw’uwishwe muri Jenosida yakorewe Abatutsi.”

Yakomeje agira ati: “Amakuru yose yashingirwaho  ngo byemezwe ni yo agikurikiranwa neza, ariko urebye ibyabereye kuri uriya musozi, n’indi mibiri isanzwe ihaboneka numva nta gushidikanya ko uri bubemo.”

Avuga ko uretse hariya n’ahandi hari imibiri myinshi itaraboneka kugeza ubu, kubera uburyo abantu bicwagamo ntihamenyekane aho biciwe, hakaba hari n’abafite amakuru batsimbaraye badashaka kuyatanga ngo abazize Jenoside bahabwe icyubahiro kibakwiriye.

Yaboneyeho gusaba buri wese waba ufite amakuru y’ahakiri imibiri y’abishwe muri Jenoside yakorewe Abatutsi kuyatanga kugira ngo na yo ishyingurwe mu cyubahiro mu nzibutso.

Uwo mubiri wahise ujyanwa ku biro by’Akagari ka Nyagatare, Umurenge wa Mahembe mu gihe hagitegerejwe ko ikusanyamakuru rirangira, ugatunganywa neza kugira ngo uzashyingurwe mu cyubahiro mu gihe cyo kwibuka ku nshuro ya 30 Jenoside yakorewe Abatutsi.

  • NTAWITONDA JEAN CLAUDE
  • Mutarama 11, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE