Nyamasheke: RIB yahumurije abaturage nyuma y’umuturage wafashwe yacukuye icyobo mu nzu

  • BAHUWIYONGERA SYLVESTRE
  • Ukuboza 4, 2023
  • Hashize amezi 6
Image

Urwego rw’Igihugu rw’Ubugenzacyaha (RIB) rwemeje ko rwamaze guta muri yombi Nkurunziza Ismael  w’imyaka 37 wasanzwe yaracukuye icyobo mu nzu ye, akaba anakekwaho kuba yari agiye kukijugunyamo umumotari.

Umuvugizi wa RIB Dr. Thierry B. Murangira yahumurije abaturage abakangurira kwirinda ibihuha ahubwo bakizera Inzego z’umutekano, ari na ko batangira amakuru ku gihe birinda ikintu cyose cyatuma abantu bakuka umutima.

Umuvugizi wa RIB Dr Murangira Thierry, yemeje ko Nkurunziza yatawe muri yombi ku Cyumweru tariki ya 3 Ukuboza, ati: “Yarafashwe, yafashwe ejo ku wa 3 Ukuboza, ari gukurikiranwa hagamijwe kugira ngo hamenyekane impamvu yari yacukuye kiriya cyobo.”

Imvaho Nshya imubajije niba ntacyo yavuze cyabimuteye, Dr Murangira yagize ati: “Ni byo bigikorwaho iperereza, impamvu yagicukuye. Ubugenzacyaha bwarahageze buragisuzuma, busanga ni icyobo kikiri gishyashya kitarimo ikintu na kimwe, ubwo rero aracyabazwa impamvu yagicukuye n’icyo yari agambiriye.”

Inkuru y’uwo mugabo wacukuye icyobo mu nzu ye yatumye benshi bamugereranye n’undi musore witwa Kazungu uri imbere y’ubutabera kubera icyobo yacukuye mu nzu yaho yari acumbitse akaba yarafashwe amaze kugishyinguramo abantu 14 biganjemo abakobwa.

Dr. Murangira yasabye abaturage kwirinda ibihuha byinshi bikivugwaho, agira ati: “Ni ukwirinda ibihuha ku micukurirwe ya kiriya cyobo kuko kugeza ubu iperereza ntiriragaragaza impamvu y’ukuri y’icyo yagicukuriye. Birinde rero ibihuha batekane, ntabwo abagizi ba nabi barusha ingufu inzego z’umutekano. Bazizere batangire amakuru ku gihe, birinde icyatuma abantu bakuka imitima cyangwa bacika igikuba.”

Yasabye abaturage kujya bihutira gutanga amakuru igihe cyose babonye ahantu ikitagenda, bagatungira agatoki Inzego z’umutekano igiteye amakenga babonye.

Ku ikubitiro ubwo uyu mugabo akimara gutamazwa n’umumotari bikekwa ko yari agiye gusunikira muri icyo cyobo, yahise atoroka ariko umugore we wahise atabwa muri yombi aje avuga ko umugabo we yavugaga ko azajya agihishamo ubucuruzi bwa magendu.

Ku byerekeranye no kumenya niba umugore we na we yaba akiri mu bugenzacyaha cyangwa yarekuwe, Dr Murangira yavuze ko na we hari ibyo agomba kubazwa kuko biriya ari ibintu bidasanzwe byagaragaye, bikaba bigomba kwitonderwa ngo hagaragazwe neza  ukuri kwabyo.

Yashimiye abaturage b’Umurenge wa Bushenge, Akarere ka Nyamasheke, ubufatanye bagaragarije Inzego z’umutekano muri iki kibazo, abasaba gukomeza ubwo bufatanye no gukomeza gutangira amakuru ku gihe.

Umumotari wari ugiye kujugunywa mu cyobo cyacukuwe na Nkurunziza mu nzu ye
  • BAHUWIYONGERA SYLVESTRE
  • Ukuboza 4, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE