Nyamasheke: Nyir’ikirombe cyahitanye abantu 2 yafatiwe i Nyamagabe ahunga

  • BAHUWIYONGERA SYLVESTRE
  • Ukuboza 12, 2023
  • Hashize amezi 3
Image

Sibomana Alexis ukekwaho kuba nyir’ikirombe cyacukurwagamo amabuye yo kubaka cyagwiriye abantu babiri bagahita bahasiga ubuzima, yafashwe ageze i Kitabi mu Karere ka Nyamagabe arimo guhunga.

Ku wa Mbere, ni bwo amakuru yamenyekanye ko Habimana Emmanuel w’imyaka 47 na Vuguziga Sylver w’imyaka 45 bagwiriwe n’icyo kirombe, biza kumenyekana ko Sibomana ari we wabahaye ikiraka cyo gucukura rwihishwa nyuma yo guhagarikwa n’ubuyobozi bumubwira ko atujuje ibisabwa.

Ni ikirombe kiba ahazwi nko mu Mwaga, mu Mudugudu wa Muko, Akagari ka Ntendezi, Umurenge wa Ruharambuga, Akarere ka Nyamasheke, cyari cyarahagaritswe n’Akarere ariko Sibomana we agashyiramo abakozi batandatu rwihishwa.

Umuyobozi w’Akarere ka Nyamasheke Mupenzi Narcisse, yagize ati: “Hariya ni ahantu hari  ikirombe gicukurwamo amabuye na latelite byo kubakisha. Ni umuntu wigeze kugira ibyangombwa byo gucukura birashira, asaba ibindi barabimwima bamubwira ko gucukura bibujijwe nta rundi ruhushya azabona. Aho kubyumva, abirengaho atangira gushaka abaturage, bakahacukura rwihishwa we ntagaragare.”

Meya Mupenzi avuga ko ari muri urwo rwego kuri uyu wa mbere icyo kirombe cyagiyemo abantu batandatu, baracukura kiba kigwiriye babiri umwe agwa aho undi agwa ku Kigo Nderabuzima cya Gisakura.

Avuga ko kugeza ubu bitazwi niba ukekwa ko yari bwihishe inyuma byabaye ahari cyangwa ari hafi y’aho, ko ikizwi ari uko yahise ashakishwa afatirwa  ku Kitabi mu Karere ka Nyamagabe arimo guhunga.

Meya Mupenzi avuga ko ubwo inzego z’umutekano  zashakishaga ukekwa, we n’abandi bayobozi bari bagiye gutabara no guhumuriza abaturage.

Yibukije abaturage ko bari bamaze igihe kinini babwirwa ko ntawemerewe gucukura muri kiriya kirombe, abasaba kujya batanga amakuru ku gihe kugira ngo hirindwe impanuka nk’izo ziterwa n’abakora ubucukuzi bw’amabuye y’agaciro na kariyeri batabifitiye uburenganzira.

Yanabasabye kujya babanza gushishoza mbere yo kwirukira gukora akazi, bakamenya niba ukabahaye akora byemewe kugira ngo n’igihe bahuye n’ibyago babe bamenya aho babariza.

Ati: “Twabasabye ubufatanye kuko iyi Mirenge irimo ibirombe byinshi bicukurwamo imicanga, amabuye  na latelite byo kubaka, ku buryo bigoye kumenya abacukura byemewe n’ababikora bitemewe ku muturage utabizi. N’ugiye kuguha akazi ukaba koko utamubaza niba ibyo agiye kukaguhera biri mu nzira nyazo, cyane cyane ko umuturage icyo aba akeneye cyane ari amafaranga, ibyo bindi aba yabishyize ku ruhande ariko noneho n’ayo makenga nibayagire.”

Bibaye mu gihe mu Murenge wa Cyato na ho hadasiba kumvikana abagwiriwe n’ibirombe bacukura, Meya Mupenzi akavuga ko agiye kuganira n’abandi bakorana uburyo baha umurongo iki kibazo.

Sibomana Alexis ukekwaho kuba ari we washoye abagwiriwe n’ikirombe mu kaga, afungiye kuri Sitasiyo ya RIB ya Ruharambuga muri Nyamasheke.

Abo cyahitanye bombi bari batuye mu Mudugudu wa  Rundwe, Akagari ka Nyarusange, Umurenge wa Bushekeri, Akarere ka Nyamasheke.

Meya Mupenzi yasabye abaturage kujya bagira amakenga ku muntu wese ubafata ngo agiye kubaha akazi
  • BAHUWIYONGERA SYLVESTRE
  • Ukuboza 12, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE