Nyamasheke: Moto yahiye irakongoka abari bayiriho barusimbuka bakomeretse

  • BAHUWIYONGERA SYLVESTRE
  • Ugushyingo 28, 2023
  • Hashize amezi 6
Image

Ahagana saa munani n’iminota 50 z’igicamunsi cyo ku wa Mbere tariki ya 27 Ugushyingo, ni bwo moto Boxer 150 ifite Pulake RE 333U yahiye irakongoka ariko mu by’amahirwe abo yari itwaye barusimbutse bakomeretse byoroheje, ndetse yabahiriye mu maso bayireba badashobora kugira icyo bakora.

Ni moto yari itwawe na Ntawugayimana Jean Claude w’imyaka 37 ahetse Ndagijimana Fidèle w’imyaka 32, iva mu Murenge wa Kirimbi yerekeza mu i Tyazo mu Murenge wa Kanjongo, Akarere ka Nyamasheke.

Yafashwe n’inkongi igeze mu Mudugu wa Giseke, Akagari ka Muhororo, mu Murenge wa Kirimbi, irashya irakongoka.

Nk’uko Imvaho Nshya yabitangarijwe na Ngendahimana Alphonse wahageze iyo moto irimo gushya, babiri bagendaga kuri iyi moto bombi ari abakozi b’ikigo cyitwa Ayateke ishinzwe iby’amazi mu Mirenge ya Kirimbi, Gihombo na Mahembe.

Inkongi ngo yaturutse ku kuba kimwe mu byuma by’iyo moto byakubye muri kaburimbo bigakora umuriro kuko n’ahajya lisansi hafungutse igahita imeneka muri bya bishashi.  

Ngendahimana ati: “Abari bayiriho babonye icumba umwotsi barasimbuka, uwari utwaye akomereka mu gahanga hafi yo ku jisho ariko bidakabije, uwo yari atwaye akomereka inkokora n’amavi kuko yabishinze hirya gato yayo yirwanaho.  Abaturage bahise baza baratabara babajyana ku Kigo Nderabuzima cya Karengera, bagira amahirwe ntiyabatwika bigaragara nubwo byabonekaga ko umuriro wari utangiye kubageraho.”

Umunyamabanga Nshingwabikorwa w’Agateganyo w’Umurenge wa Kirimbi Mukamugema Odette, yemeje aya makuru avuga ko moto yahiye igakongoka, ku bw’amahirwe abo yari itwaye uko ari 2 bavurirwa ku Kigo Nderabuzima cya Karengera barataha.

Ati: ”Sinamenye niba moto ari iy’uwari uyitwaye cyangwa iy’ikompanyi bakoreraga, ariko moto yo yahiye irakongoka, abo 2 bavuriwe ku Kigo Nderabuzima cya Karengera muri uyu Murenge wa Kirimbi barataha.”

Avuga ko bo ubwabo nta cyo babwiye abayobozi ku cyaba nyir’izina cyateye uku gushya, ariko Polisi y’Igihugu, Ishami rishinzwe umutekano wo mu muhanda, yahise ihagera ikaba ari yo mu buhanga bwayo yamenya icyateye iyi nkongi.

Avuga ko niba yaba yatwitswe no kuba hari ibyo itari yujuje ijya guhaguruka yasaba abatwara ibinyabiziga kujya babanza kugenzura ko nta bibazo bifite mbere yo kubishyira mu muhanda no kubigendaho.

  • BAHUWIYONGERA SYLVESTRE
  • Ugushyingo 28, 2023
  • Hashize amezi 6
TANGA IGITEKEREZO
Karamage Emmanuel says:
Ugushyingo 28, 2023 at 12:36 pm

Assurence ni rebeko icyo kinyabiziga cyari Kiri mubwishingizi ubundi ibagoboke

Muratwa Eugene says:
Ugushyingo 29, 2023 at 8:59 am

Assurence nibikoreho rwose batubwira ko igoboka mu mahina

Andika igitekerezo

AMATEGEKO AGENGA IYANDIKA RY'IGITEKEREZO CYAWE