Nyamasheke: Kutagira amatoroshi n’amakoti ku banyerondo biha icyuho abajura

  • BAHUWIYONGERA SYLVESTRE
  • Ukuboza 28, 2023
  • Hashize amezi 5
Image

Abaturage b’Akagari ka Bisumo, Umurenge wa Cyato, Akarere ka Nyamasheke, bavuga ko gukora amarondo bibagora bitewe no kutagira amatoroshi n’amakoti y’imvura, by’umwihariko muri iyi minsi mikuru isoza umwaka Noheli n’Ubunani, bagasaba ubuyobozi bw’Akarere gukemura iki kibazo kuko ngo atari aha gusa kiri kandi hari abo kaguriye ibyo bikoresho.

Bamwe mu baturage bagaragarije Imvaho Nshya izi mpungenge z’ibura ry’ibyo bikoresho by’ibanze n’ingorane biteza mu gutuma irondo ridakorwa neza, abajura bakabaca mu rihumye.

Ni nyuma y’uko mu nteko y’abaturage, Umunyamabanga Nshingwabikorwa w’Umurenge wa Cyato Harindintwali Jean Paul yabakanguriye kurushaho kwicungira umutekano muri ibi bihe by’iminsi mikuru ya Noheli n’Ubunani, kuko na mbere yaho hagiye hagaragara abajura batobora inzu z’ubucuruzi, abiba imyaka mu mirima, abategera abaturage mu nzira bakabambura ibyo bafite.

Mutabaruka Callixte ati: “Aha nta rondo ry’umwuga rihaba kuko abaturage batabona amafaranga yo kuryishyura. Twahisemo kuryikorera ariko impungenge ni zose cyane cyane muri ibi bihe bya Noheli n’Ubunani kuko ni ho abajura n’abandi bagizi ba nabi bakara cyane”.

Mugenzi we Nabagize Pierre ati’’ No mu bihe bisanzwe dukora amarondo n’abo bajura baducunze. Iyo imvura iguye umunyerondo wegereye santere y’ubucuruzi ajya kugama. Kubera imvura n’imbeho abari ku irondo hafi ya bose baba batitira, nta ngufu. N’ umuriro kuri santere y’ubucuruzi uhora ugenda, hose hakaba ikizima nta n’ubasha kubona imbere ye. Mwe mubona umuntu utitira yakora iryo rondo ate”?

Nshimiyimana Félicien we yagize ati’’ Tuyarara gutyo, twajya kugama bakaducunga bagaca inyuma bagatobora inzu z’ubucuruzi, kuko nko mu minsi ishize kuri iyi santere ya Ville honyine batoboye inzu 3, imwe batwara umufuka w’amasaka, indi bakuramo ikaziye ya Mitsingi, indi bakuramo amafaranga arenga 200.000.

Yongeyeho ati: “Hari n’indi santere y’ubucuruzi yitwa Hangari batoboye inzu batwara ibirimo. Irondo ntiryabafata rikora rityo. Akarere nigashake nibura amatoroshi nka 10, amakoti y’imvura n’inkweto nk’ibyo, babihe abakuru b’imidugudu abaraye irondo bajye babikoresha. Bitabaye ibyo abajura n’abanyarugomo bararushaho kwiyongera ,nta kindi tuzakora ngo tubahashye.’’

Meya w’Akarere ka Nyamasheke, Mupenzi Narcisse

Umuyobozi w’Akarere ka Nyamasheke Mupenzi Narcisse, avuga ko iki kibazo atari umwihariko w’aba gusa, kiri mu Karere kose kandi ko Akarere katabona ibikoresho nk’ibyo bikwira abaturage bose, ariko ko hatekerezwa uburyo hose hajya irondo ry’umwuga, ryabikemura.

Ati: “Iki kibazo kiri hose, nubwo aho turi kugera muri iyi minsi mikuru dusanga amarondo akorwa neza, ariko birumvikana ko gukora irondo nta bikoresho bigoye, kandi ubushobozi bw’akarere ntibutwemerera kubigurira abaturage bose. Gusa turashakisha uburyo hakorwa amarondo y’umwuga nubwo abaturage kuyishyura na byo bibagora. Hari aho twagiye tubibagurira hamwe na hamwe ariko si hose”.

Asaba abaturage kwishakamo ibisubizo kuko n’ubundi ugize aho ajya atabura kwambara umwenda w’imbeho, icyo ubuyobozi bwari bwakoze ari uguha telefoni uyoboye irondo kugira ngo byorohe kuvugana n’ubuyobozi nk’igihe haba ikibazo, ariko n’ibindi bisubizo bigenda bishakwa.

  • BAHUWIYONGERA SYLVESTRE
  • Ukuboza 28, 2023
  • Hashize amezi 5
TANGA IGITEKEREZO
Kanani schadrack says:
Mutarama 6, 2024 at 2:56 pm

Turasaba ubuyobozibwakarere kobwadufasha izibwa zamaze Amatungoya baturage hakarebwa ukozaterwa zigapfa

Kanani schadrack says:
Mutarama 6, 2024 at 2:56 pm

Turasaba ubuyobozibwakarere kobwadufasha izibwa zamaze Amatungoya baturage hakarebwa ukozaterwa zigapfa

Andika igitekerezo

AMATEGEKO AGENGA IYANDIKA RY'IGITEKEREZO CYAWE