Nyamasheke:  Ishuri rirateganya kwinjiza miliyoni 100 Frw mu buhinzi n’ubworozi

  • Imvaho Nshya
  • Nzeri 18, 2023
  • Hashize amezi 8
Image

Ubuyobozi bw’Ishuri Ryisumbuye ryigenga rya Diyoseze Gatolika ya Cyangugu ryitwa “Collège Saint Martin Hanika” riri mu Murenge wa Macuba, Akarere ka Nyamasheke, bwatangiye kwishakamo ibisubizo binyuze mu bworozi bw’ingurube n’ubuhinzi bw’urusenda bya kijyambere.

Iryo shuri riteganya kujya ryinjiza amafaranga y’u Rwanda asaga miliyoni 100 buri mwaka, mu myaka itatu iri imbere, aho bumva azafasha korohereza abaharerera mu bijyanye n’amafaranga y’ishuri bishyura.

Umuyobozi w’iri shuri Padiri Niyongombwa Placide, yavuze ko nyuma yo kubona ko ingufu z’ababyeyi mu kwishyura amafaranga y’ishuri mu mashuri nk’aya yigenga zigenda ziba nke, ryishatsemo ibisubizo byaryunganira mu gutunga abaryigamo neza, ridacungiye byose ku mafaranga yishyurwa n’ababyeyi.

Padiri Niyongombwa yavuze ko mu gihe babonaga ibikenera amafaranga mu kigo byiyongera babanje korora inka basanga nta musaruro munini zitanga kubera ibibazo by’ubwatsi n’ibindi.

Nyuma yo kubona korora inka bidakunda batangiye korora ingurube ndetse no kubyaza umusaruro hegitari hafi eshatu z’imirima bafite bakora ubuhinzi n’ubworozi bwa kijyambere. Mu mwaka wa 2021-2022 batangiye guhinga urusenda babijyanisha no korora ingurube.

Padiri iyo Ngombwa yagize ati: “Iki gitekerezo cyatangiranye n’umwaka w’amashuri 2021-2022 ubwo Leta yashyiragaho amafaranga 85 000 y’ishuri ku gihembwe  ku mashuri yayo yose. Twe nk’ishuri ryigenga, nubwo ari irya Kiliziya Gatolika, ntitwari kugira ikindi tubwira Musenyeri kitari ibisubizo twishatsemo. Birumvikana ko iwacu amafaranga y’ishuri yahise azamuka kugira ngo tubashe guhemba abarimu, n’ibindi byose bikenerwa bibashe gukorwa kuko twe byose tubicungira ku mafaranga y’ishuri.”

Yakomeje agaragaza ko Leta yagabanyije amafaranga y’ishuri mu gihe bo bishyuzaga amafaranga y’ishuri 95 000 mu cyiciro rusange, na 105 000 mu mashami 2 y’icyiciro cya kabiri cy’amashuri yisumbuye.

Ibyo ngo byatumye batakaza abanyeshuri 170 muri 680 bareraga mu 2021, noneho hasigara n’ikibazo cy’uko Leta yari yongeje imishahara abarimu bayo kandi bo bagihemba umushahara wari usanzwe.

Ibyo byatumye bongeza amafaranga y’ishuri akagera ku 130.000 mu cyiciro rusange na 135.000 mu cyiciro cya kabiri, ariko ayo ngo  yari make cyane ugereranije n’ibyasabwaga, cyane ko riri mu mashuri akomeye mu myigishirize y’ikoranabuhanga mu Ntara y’Iburengerazuba.

Iri shuri rirakura agatubutse mu buhinzi bw’urusenda

Ati: “Kugira ngo tutajya muri ya ngeso y’amashuri amwe n’amwe acungira twose ku babyeyi, twatekereje kubyaza umusaruro ufatika isambu dufite, tukayishakamo ubuhinzi n’ubworozi butagaburira abanyeshuri gusa ahubwo bwa bizinesi kugira ngo amafaranga y’ishuri adakomeza gutumbagira, abarerera hano bagacika intege tugafunga cyangwa amafaranga make agatuma abarezi bashoboye dufite baducika.”

Ni bwo batangiye bagura ingurube 11 z’ubwoko bwororoka vuba z’amafaranga y’u Rwanda arenga gato miliyoni 8, banatekereza ubuhinzi bw’urusenda bashobora kugurisha ku masoko akomeye bukabinjiriza agatubutse.

Ati: “Twabitangiye mu itangira ry’igihembwe cya mbere muri 2021, bitanga umusaruro ukomeye.  Uyu mwaka turateganya ingurube hagati ya 800 na 1000, kuko twashyize hamwe izigera kuri 60 zishobora kubwagura ibibwana birenga 10 buri yose ku buryo kugera kuri uwo mubare byoroshye cyane.”

Avuga ko muri izo buri yose izajya igurishwa amafaranga hagati ya 300 000 na 500 000, cyangwa amafaranga arenga mu zivuka kuri izo ntoranywa. Ku buhinzi avuga ko urusenda rwabo na rwo rwatangiye kugurishwa avuyemo agafasha muri icyo gikorwa.

Avuga ko kugira ngo bigerweho, bagiye gukorana n’Ikigo cy’igihugu gishinzwe Iterambere ry’Ubuhinzi n’Ubworozi (RAB) ikajya ibashakira ubwoko bwiza bw’ingurube bugezweho bajya banoroza ku baturiye icyo kigo cy’ishuri.

Padiri Niyongombwa yasabye Akarere kubafasha kubona ubutaka, bubafasha kwagura imikorere, bakabyaza umusaruro. Ikindi avuga kibagora ni uburyo bwo kuhira mu mpeshyi kuko nta bikoresho bifatika bafite.

Mukankusi Athanasie, Umuyobozi wungirije w’Akarere ka Nyamasheke ushinzwe imibereho myiza, arishimira  ubudashyikirwa mu kubahiriza inama abayobozi b’amashuri bagiriwe, yo kubyaza umusaruro ubutaka bafite, byaba ngombwa bagakodesha mu rwego rwo kunganira imirire y’abanyeshuri.

Yavuze Akarere kiteguye kubaha ubufasha bwose bushoboka, ati: “Bakoze igikorwa cyakwishimirwa na buri wese. Inama bazadukeneraho zose tuzazibaha kuko ni ibikorwa dushyigikiye cyane, twifuza ko amashuri yose abishoboye yabikora. Kubahuza n’aho bakodesha ubutaka twabikora rwose cyane cyane ko n’umusaruro ubuvamo wakwiyongera.’’

Collège Saint Martin Hanika ni ishuri ryigenga ryatangiye mu mwaka w’amashuri wa 1997-1998, Diyoseze imaze kubona ikibazo cy’abana batabaga batsinze icya Leta baburaga uburyo bajya kwiga.

Ababyeyi baharerera baganiriye n’Imvaho Nshya bavuze ko uyu mushinga bawushyigikiye cyane kubera byinshi bawutezeho mu mibereho myiza y’abana babo no kuborohereza umutwaro w’amafaranga y’ishuri.

Padiri Niyongombwa Placide, Umuyobozi wa Collège Saint Martin Hanika

BAHUWIYONGERA SYLVESTRE

  • Imvaho Nshya
  • Nzeri 18, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE