Nyamasheke: Inzu y’umuryango w’abantu 9 yahiye irakongoka

  • Imvaho Nshya
  • Ugushyingo 5, 2023
  • Hashize amezi 4
Image

Umuryango wa Ndagano Zacharie w’imyaka 64 ugizwe n’abantu icyenda urimo gusembera nyuma y’inkongi y’umuriro yakongoye inzu ye, ibyarimo byose bigashya ntihagire ikintu na kimwe aramura.

Iyo nzu yafashwe n’inkongi ku wa Gatandatu, yari iherereye mu Mudugudu wa Nyakagano, Akagari ka Burimba, Umurenge wa Shangi, Akarere ka Nyamasheke, ikaba yari yubakishijwe ibyondo bikikijwe n’imbaho zisize vidanje.

Umunyamabanga Nshingwabikorwa w’Umurenge wa Shangi Nabagize Justine, yatangarije Imvaho Nshya, ryabaye ku gicamunsi ahagana saa saba n’iminota 40 nta n’umwe wo muri uwo muryango uri imuhira.

Icyo gihe ngo inzu yari ikinze kuko bose bari gukora mu murima, abaturanyi bagerageje kubahamagara ari na ko bagerageza guhangana n’inkongi ariko ba nyiri urugo bahageze basanga ibintu biri mu nzu imbere byose byakongotse.

Gitifu Nabagize yagize ati: “Harakekwa amashanyarazi kuko si igikoni ngo tuvuge ko hari umuriro bari basizemo, nta mbabura bacana, bari bakinze bose bagiye, ukaba utavuga ko hari ikindi cyaba cyarayitwitse.

Kubera ko ari inzu y’imbaho kuko ino duhomesha ibyondo tukomekaho imbaho inyuma, tugashyiraho vidanje, hakanakekwa ko kubera ubushobozi buke abenshi banakoresha insinga n’ibindi bikoresho by’amashanyarazi bitujuje ubuziranenge, zaba zitwikwa n’amashanyarazi kuko muri uyu mwaka atari iyi yonyine ihiye.”

Uyu muryango wasigaye usembera nyuma y’aho inzu yawo yahiye bari mu murima bahinga

Avuga ko ku bw’amahirwe uyu muriro utageze mu gikoni n’aho amatungo aba ariko ngo umuriro wari wafashe inzu nini yahiye abaturage bagerageza kuyizima ariko biba iby’ubusa.

Gitifu Nabagize, yavuze ko kuri ubu uwo muryango ucumbikiwe n’umuturanyi mu gihe abanda baturanyi na bo bakirimo kwisuganya ngo barebe ko hari icyo bamufasha mu gihe hagitegerejwe ko yakongera kubona inzu ye abamo.

Ati: “Muri wa muco wacu wo gutabarana turi mu bukangurambaga mu baturage bacu ngo barebe uko bamuremera, haba mu Muganda cyangwa ubundi buryo bashobora, tukanategereza ko Akarere hari icyo kamumarira, akareba ko yakongera kubona aho aba akareka gukomeza gusemberana umuryango ungana utyo.”

Bibaye mu gihe mu mezi 3 ashize, mu Kagari ka Nyamugari gaturanye n’aka, umwarimu wigisha muri GS Nyamugari na we yahishije inzu, icyakora we kuko mu rugo hari hari abantu bagira duke baramura.

Uyu mwarimu ngo nta bufasha bwa Leta na buke yabonye, na we akomeje gusembera mu baturanyi, uretse abaturage bitanze uko bashoboye, barimo n’abarimu bagenzi be akabona ibikoresho by’ibanze.

Gitifu Nbagize Justine yongeye gusaba Akarere ko kabatabara kakagira icyo kabamarira ariko nanone ngo bagiye gukora ubukangurambaga mu baturage bwo gushaka ibishobora kuzimya inkongi nk’izi, ababishoboye bagatunga kizimyamoto, abafite ubushobozi bwisumbuyeho bakagira ubwishingizi bw’inkongi.

Yavuze ko bajya banakangurirwa kubakisha ibikoresho by’ubwubatsi biramba bakareka imbaho kuko zihita zishya byihuse iyo inkongi ije, bakajya banagura insinga n’ibindi bikoresho by’amashanyarazi byujuje ubuziranenge.

Inzu yahiye ariko mu by’amahirwe igikoni n’ahari amatungo ntihafatwa n’inkongi bikekwa ko yaturutse ku mashanyarazi.

BAHUWIYONGERA SYLVESTRE

  • Imvaho Nshya
  • Ugushyingo 5, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE