Nyamasheke: Inzu y’umugabo wiga mu yisumbuye yasenywe n’imvura

  • BAHUWIYONGERA SYLVESTRE
  • Mutarama 8, 2024
  • Hashize amezi 4
Image

Mu ma saa kumi n’igice z’umugoroba wo ku Cyumweru tariki ya 7 Mutarama, ni ho inzu ya Sebazungu Fabien w’imyaka 25 wasize umuryango akajya kwiga amashuri yisumbuye muri GS Banda yasenywe n’imvura yari yaraye igwa ijoro ryose ryo ku wa Gatandatu tariki ya 6 Mutarama ikaniriza umunsi wose wo ku Cyumweru.

Uyu mugabo wasize umugore n’umwana umwe akajya kwiga muri iryo shuri riherereye mu Kagari ka Banda atuyemo, Umurenge wa Rangiro, Akarere ka Nyamasheke, arasaba ubufasha ngo yubakirwe anakomeze amashuri.

Mu kiganiro n’Imvaho Nshya nyuma y’ibi byago yahuye na byo Sebazungu Fabien, yavuze ko nyuma yo gupfusha ababyeyi be bombi, ubuzima bwamushaririye cyane, akihangana, akiga ayisumbuye, ageze mu wa 3 biramugora avamo, ashaka umugore bafitanye umwana w’umwaka n’amezi 8.

Avuga ko mu 2021, yubatse inzu ya rukarakara y’amabati 36, aguza amafaranga mu itsinda arimo ryo kugurizanya agura amabati 20, asakara igice kimwe aba abayemo n’umugore yari agishaka, ikindi gice ashaka amategura akingirizaho ngo nabona amabati azagisakare neza, kireke gukomeza kunyagirwa.

Avuga kandi ko mu nteko rusange y’Akagari kabo yateranye muri 2022, yashyizwe ku rutonde rwo guhabwa amabati yo kuzuza icyo gice cyari cyasigaye, ariko nyuma hashize igihe gito, agiye kuyareba ku Murenge abwirwa ko urutonde ataruriho,

Ati: “Nabuze uko mbigenza, kuko nyuma yo kurangiza icyiciro cya mbere cy’ayisumbuye nari nize iby’amashanyarazi igihe gito, mbona nta kazi mbona, nganira n’umugore wanjye, mugezaho igitekerezo cyo gukomeza ayisumbuye nubwo twari mu buzima buruhije, turabyemeranywa, njya kuyasubukura muri GS Banda.

 Ariko kuko inzu itari isakaye yose, igice kidasakaye kigenda kinyagirwa, amashahi acyangiza mbura icyo nkora n’uko kwiga, kugeza ubwo iguye yose, ku ya 7 Mutarama, nyuma y’imvura nyinshi yaraye ijoro ikaniriza umunsi wose.’’

Yabonye ubuyobozi butamuhaye ayo mabati, ajya mu rindi tsinda aguza amafaranga agura mabati 10 mashya, yo ngo yari agihari, ategereje ubundi bushobozi ngo agure 6 asigaye ngo inzu yose yuzure, none iguye yose bikimeze bityo.

Sebazungu Fabien. aha ni muri GS Banda aho yiga

Ati: “Yose iri hasi. Amabati yari yubatse igice twabagamo yose uko ari 20 yashwanyaguritse, umuryango nawucumbikishije, ya mabati 10 yari abitse nyatwikiriza amatafari nabonaga akiri mazima ngo hatagwa indi mvura ikayangiza, nyarara iruhande ngo batayiba.”

Yongeyeho ati: “Muri iki gitondo hari abafundi baje kuntabara, turi kurundanya amatafari mazima ngo ndebe ko nakora n’akumba kamwe nshyireho ayo mabati 10, tube turimo, mbone uburyo nsubira ku ishuri, kuko muri iyi minsi nigaga nabi kubera ko nabonaga inzu igiye kugwa, mbanza kureba icyakorwa ngo nyisakare ariko biranga birananira.’’

Avuga ko inzu yaguye adahari, yagiye gushakisha icyo umuryango urarira, ku bw’amahirwe umugore n’umwana bari mu rugo igwa basohotse, bari hanze ntibagira icyo baba, ariko ibyinshi byarimo byangiritse, ameze nk’usigaye iheruheru.

Ati: “Ndasaba ubuyobozi ubufasha nkabona amabati, ku muganda w’abaturage nkaba nakongera kubumba amatafari nkubaka nk’iyo nari nateganyije, nkanasaba ubufasha bwo kwiga nkayarangiza kuko nari nasibiye mu wa 4 w’indimi n’ubuvanganzo, kubera kwiga nabi n’iyo mihangayiko yose, ariko mbonye aho mba hazima nakwiga nshishikaye.’’

Umukuru w’Umudugudu wa Gahira, Munyeshyaka Vianney, yabwiye Imvaho Nshya ko nk’abaturanyi be, bagiye kumuha umuganda bashoboye, bakamubumbira amatafari asimbura ayamenetse, ko bizeye ko ubuyobozi bw’umurenge n’akarere hari icyo buri bukore bukamuha amabati, akabona aho ashyira umuryango, bikanamufasha gukomeza kwiga, adataye ishuri kubera guhangayikishwa n’aho asiga umugore n’umwana.

  • BAHUWIYONGERA SYLVESTRE
  • Mutarama 8, 2024
  • Hashize amezi 4
TANGA IGITEKEREZO
Ntirenganya Simeon says:
Mutarama 8, 2024 at 9:17 pm

Ihangane cyane bwana Fabien nubusanzwe wari warihanganiye ubuzima butoroshye ariko nyabuneka Leta mbyeyi nikugenze nkuko yagenje abandi

Gusa natwe turahari

sebazungu Fabien says:
Mutarama 10, 2024 at 11:51 am

Ntakundi nabigenza arko sinabura gushima Imana kuko yarahabaye irandinda ngewe n,umuryango wange ibindibyo birashakwa ndakomeza nihangane ntegereze ubwo bufasha arko nanone nange ndabankora ibyo shoboye mugigihe nkibategereje nkishuti nabavandimwe ndetse nareta yubumwe mukomeze kugubwa neza

Niyomugabo Emmanuel says:
Mutarama 11, 2024 at 8:50 am

Oooo😭😭😭😭😭 muvandimwe ihangane knd bizagenda neza kuko reta irahar nkumubyeyi ark knd nkuko government yafadhijr abandi nawe bagufashe cyane ko wowe ufite nintangiriro murakoze knd ugomba nogukomeza amasomo kuko icyaguteye gusubira kwiga ntago kiragerwaho

Andika igitekerezo

AMATEGEKO AGENGA IYANDIKA RY'IGITEKEREZO CYAWE