Nyamasheke: Inzego z’ibanze zirashinjwa gukorana n’abashimuta isambaza

  • Imvaho Nshya
  • Ukwakira 29, 2023
  • Hashize amezi 4
Image

Mu mirenge y’Akarere ka Nyamasheke ikora ku kiyaga cya Kivu, hamaze iminsi humvikana ikibazo cya ba rushimusi bangiza utwana tw’isambaza muri ibi bihe uburobyi buhagaze, ubuyobozi bw’Ihuriro ry’amakoperative y’abarobyi bukavuga ko hamaze gufatwa benshi n’imitego itemewe bakoresha, ariko bukavuga ko hakenewe uruhare rugaragara rw’Inzego z’ibanze ngo bahashywe.

Abarobyi bo muri ako Karere bavuga ko bafatanya n’Inzego z’ibanze n’iz’umutekano mu kurwanya ba rushimusi, ariko ngo kuba bakigaragara biterwa na bamwe mu bayobozi babakingira ikibaba.

Aganira n’Imvaho Nshya kuri iki kibazo, Umuyobozi w’Ihuriro ry’amakoperative y’abarobyi muri aka Nyamasheke Ndagijimana Elias, yavuze ko muri iki gihe uburobyi mu kiyaga cya Kivu buhagaze ku ruhande rw’u Rwanda, hagaragaye benshi babifatiwemo ku bufatanye n’Inzego z’umutekano.

Avuga ko abarobyi ubwabo bafite ubwato bwa moteri 5 bushinzwe kugenzura ba rushimusi, ku bufatanye n’Inzego z’ibanze n’iz’umutekano wo mu mazi, ababifatiwemo bagahanwa n’imitego yabo ikangizwa.

Yemeza ko iyo hataba ubwo bufatanye nta rusambaza na rumwe ruba rusigaye mu kiyaga kuko uburyo ba rushimusi bangiza utwana twazo buba burimo igisa n’ubugome cyangwa kutita ku hazaza h’uburobyi.

Imvaho Nshya imubajije impamvu ubwo bushimusi budashira, yagize ati: “Hari igihe tubahagurukira dufatanyije tukabahashya ukabona ko barangiye rwose. Ariko kuko duturanye n’igihugu cya Repubulika Iharanira Demokarasi ya Congo (RDC) kandi ho ntacyo bibabwiye, bagurayo indi mitego bakaroba, bamwe bakanakingirwa ikibaba n’Inzego z’ibanze, cyane cyane abakuru b’Imidugudu, abashinzwe umutekano mu Midugudu na ba Gitifu b’Utugari, bikagorana.”

Avuga ko abo bayobozi batabishyizemo ubushake guhashya ba rushimusi bitashoboka kuko ari bo bafite urufunguzo rw’icika ry’imitego itemewe yangiza abana b’isambaza.

Yemeza ko hari bamwe muri abo bayobozi baba bafitanye imikoranire n’abo ba rushimusi mu nyungu zabo bwite, hirengagijwe inyungu rusange z’Abanyarwanda bose, kuko hari n’ubwo hafatwa umutego umwe utemewe kandi uwo bawufatanye atunze indi ibiri iwe kandi ubuyobozi bwe bubizi.

Ati: “Ndahamya ko Inzego z’ibanze zibyumvise kimwe natwe, n’iz’umutekano zikabihagurukira byacika kuko abafite iyo mitego akenshi ziba zibazi. Ni ubwo buryo bwonyine bishobora gucika. Twe turabafata, bagahanwa, iyo mitego ikangizwa bugacya baguze indi kandi ntitwabakurikira mu ngo zabo nk’abarobyi ntitubyemerewe.”

Avuga ko igishuka aba ba rushimusi ari uko niba nk’uwo mutego yawuguze amafaranga 200.000 agaca mu rihumye abamugenzura akica twa twana tw’isambaza, mu minsi 2 gusa ashobora kuba agaruje aya wa mutego, bigatuma n’iyo bafashwe bakomeza kwibwira ko kugura indi bibungura.

Gusa hari n’ibivugwa ko no mu barobyi ubwabo barimo ba rushimusi n’ababakingira ikibaba kandi bari mu bagomba kubarwanya, nubwo uyu muyobozi w’Ihuriro ry’Amakoperative abihakana.

Umuyobozi w’agateganyo w’Akarere ka Nyamasheke Muhayeyezu Joséph Désiré, avuga ko nubwo nta Muyobozi w’Inzego z’ibanze cyangwa umurobyi wemewe barafatira muri iki cyaha, ariko ko n’uzabifatirwamo atazihanganirwa.

Ati: “Ntawe turafata ariko biravugwa kandi amakuru yose tuyaha agaciro. Nasaba abayobozi kutagira ubijyamo rwose kuko uwabifatirwamo yahanwa by’intangarugero. Kurwanya ba rushimusi  ni urugamba rutoroshye kandi ruhoraho, nsaba buri wese wabigiraho amakuru afatika kujya ayaduha bigakurikiranwa.”

Avuga ko gushimuta amafi mu kiyaga cya Kivu bimaze igihe, kubera impinduka zagiye ziba kuko mbere barobaga uko babyumva nta mategeko bakurikza, ntawe ubabwira ko baroba nabi cyangwa neza.

Aho Leta ibihagurukiye igashyiraho amategeko atandukanye abigenga, hari abari baramenyereye kubyuka bafata inzitiramibu cyangwa ibindi byangiza bagashora mu kiyaga none kugeza n’ubu byarabananiye kubireka.

Muri iki gihe cy’ifungwa ry’uburobyi mu kiyaga cya Kivu, ubuyobozi bw’Ihuriro ry’amakoperative y’abarobyi bwemeza ko hamaze gufatwa kaningini zirenga 180 n’ibikuruzo birenga 350.

BAHUWIYONGERA SYLVESTRE

  • Imvaho Nshya
  • Ukwakira 29, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE