Nyamasheke: Impanuka y’imodoka yahitanye umunyeshuri bagenzi be 3 barakomereka

  • BAHUWIYONGERA SYLVESTRE
  • Mutarama 24, 2024
  • Hashize amezi 4
Image

Abanyeshuri 4 b’abakobwa bajyaga ku ishuri muri GS Muramba mu Murenge wa Macuba, Akarere ka Nyamasheke, bagonzwe n’imodoka yo mu bwoko bwa Pick up yari ifite pulake RAA 179 D, itwawe na Gashugi Elischam, umwe ahita yitaba Imana, 3 barakomereka,bose uko ari 4 bajyanwa mu bitaro bya Kibogora, uwari uyitwaye ubu afungiye kuri sitasiyo ya RIB ya Ruharambuga.

Ni impanuka yabaye ahagana saa moya n’igice z’igitondo zo kuri uyu wa  Gatatu tariki ya 24 Mutarama.

Amakuru Imvaho Nshya yahawe na Animateri wa GS Muramba, Ndayisaba Léonard, wari uri inyuma gato y’abo banyeshuri bagana ku ishuri yamuciyeho igasanga abo bana bari mu mukono wabo ikabagonga.

Ati: “Hari ahantu harambuye, nta kinyabiziga kindi kiri imbere ye, anshaho,kuko yavudukaga cyane, mbona imodoka ibaye nk’imugora gukomeza mu mukono we, ntekereza ko yaba yari asinziriye, mbona isatiriye inzira abana bari barimo,ihita ikubitira bariya 4 icya rimwe.

Yakomeje ati: “Bari abakobwa 5 bari kumwe ariko umwe ari hirya kuri borudire (bordure) y’umuhanda, abandi bari mu nzira yabo, bariya 4 abakubitira rimwe, baragwa ngiye kubabyutsa nsanga bakomeretse cyane, uwapfuye na we agatima kari kagitera, muri iyo minota aba ashizemo umwuka, imodoka yatambutse nahise nyihagarika nyisaba kubatujyanira bose mu bitaro bya Kibogora, barabatujyanira,ni ho bari.’’

Uwitabye Imana nk’uko umuyobozi w’iri shuri Mutegarugori Priscille yabibwiye Imvaho Nshya,ni Niyobuhungiro Bellancile w’imyaka 16, wigaga mu wa 2, mu bakomeretse 3 babiri ni abo mu muryango wa nyakwigendera kuko  nyakwigendera na ba se b’abo bandi 2 bavukana.  Mu bakomeretse, umwe yigaga mu wa 3, undi mu wa 2, undi mu wa mbere.

Umuvugizi wa Polisi y’Igihugu, ishami rishinzwe umutekano wo mu muhanda, SP Emmanuel Kayigi, yemereye Imvaho Nshya aya makuru, avuga ko uwari utwaye iyi modoka yavaga I Kigali yerekeza I Nyamasheke, impanuka yayitewe n’umuvuduko ukabije yagendanaga.

Ati:  “Yagonze abana abaturutse inyuma, bari mu kayira kabo k’abanyamaguru. Impanuka yatewe no kutaringaniza umuvuduko n’uburangare bw’umushoferi, ayobora nabi aba arabagonze,ku bw’amahirwe make umwana umwe ahasiga ubuzima.”

SP Emmanuel Kayigi yabanje kwihanganisha umuryango wabuze uwawo, asaba abashoferi kwitwararika igihe batwaye ibinyabiziga, bagashyira imbere ubuzima bwabo n’ubw’abandi baba bakoresha umuhanda kuko baba batawukoresha bonyine.

Ati: “Turabanza kwihanganisha umuryango watakaje uwawo no kuwukomeza. Ni ibyago, babuze umwana, igihugu cyabuze ingirakamaro y’ejo hazaza. Turasaba abashoboferi kujya bitwararika igihe bageze ahari abantu benshi, cyane cyane noneho nk’aba bana baba bajya cyangwa bava ku mashuri.”

Yakomeje ati: “Birababaje cyane kubona abantu nk’abo bakuru bagombye kuba bareberera abana, banabafasha kuba bagera iyo bajya amahoro, ari bo ahubwo babateza ibibazo. Bamenye ko umutekano wo mu muhanda ureba buri wese byagabanya impanuka.”

Kubyerekeranye no kumenya igikurkiraho ku babyeyi b’umwana, yagize ati’’ Iyo habaye impanuka nk’iyo birakurikiranwa ababuze uwabo bagahabwa ubutabera. Icyo ababyeyi ba bariya bana  bazakora ni ukwegera Polisi y’ahongaho ibindi ikazabibafashamo.”

Umushoferi n’abo bari kumwe bo nta wagize icyo aba,I ngo modoka ni yo yangiritse,bidakabije.

  • BAHUWIYONGERA SYLVESTRE
  • Mutarama 24, 2024
  • Hashize amezi 4
TANGA IGITEKEREZO
Francois says:
Mutarama 24, 2024 at 9:08 pm

Birababaje, gusa aba chauffeurs bagomba kuba maso kuko ubuzima ntibukinishwa.

Nzasabimfura Thomas says:
Mutarama 24, 2024 at 10:24 pm

Uwagiye we byarangiye ntiyagaruka ariko ubuyobozi bube hafi ababyeyi buyu nyakwigendera kd icyamategeko avuga kuwagonze nu wagonzwe bikurikizwe!

Iranzi ferdinand says:
Mutarama 25, 2024 at 10:36 am

Tubabajwe cyane nimpanuka yabaye kurabobana babanyeshuri.police ikore akazi ashinzwe abana bahabwe ubutabera

Andika igitekerezo

AMATEGEKO AGENGA IYANDIKA RY'IGITEKEREZO CYAWE