Nyamasheke:  Impanuka y’imodoka ya Fuso yahitanye umunyeshuri wateze lifuti

  • BAHUWIYONGERA SYLVESTRE
  • Ugushyingo 24, 2023
  • Hashize amezi 6
Image

Umunyeshuri witwa Habineza Céléstin w’imyaka 20 wigaga muri TVET ya Gihombo mu Karere ka Nyamasheke, yishwe n’impanuka y’imodoka yo mu bwoko bwa Fuso yari yatezemo lifuti.

Habineza si we munyeshuri wenyine wari wateze lifuti ariko ni we wayiburiyemo ubuzima ubwo umushoferi w’iyo modoka witwa Niyitegeka Elie w’imyaka 44 yakataga ikorosi yihuta akaba ari we wikubita muri kaburimbo agahita ashiramo umwuka kuko atari afashe neza.

Iyi mpanuka yabaye ku wa Kane tariki ya 23 Ugushyingo, saa kumi n’imwe n’iminota 45 z’umugoroba, ubwo abanyeshuri  batahaga bava ku mashuri.

Yabereye mu Mudugudu wa Buseso, Akagari ka Jarama, Umurenge wa Gihombo. Umunyamabanga Nshingwabikorwa w’Akagari ka Jarama Dusabimana Christine, yavuze ko imodoka yakoze iyo mpanuka yavaga ku Mugonero mu Murenge wa Mahembe yerekeza santere y’ubucuruzi ya Karengera  mu Murenge wa Kirimbi.

Ageze  haruguru gato y’ahitwa mu Gakokwe, mu Murenge wa Gihombo, ni bwo abanyeshuri bavaga kwiga muri TVET ya Gihombo bamusabye lifuti kuko ari n’abaturanyi  be mu Kagari ka Jarama.

Gitifu Dusabimana ati: “Yageze ahari amakorosi mu Mudugudu wa Buseso kubera no kwihuta, kuko abo banyeshuri bose yari yabatwaye inyuma ahajya imizigo, nta kindi kintu afitemo, uwo munyeshuri wari  wicaye ku ruhande abandi barimo hagati, imodoka yakase ikorosi  arahanuka yikubita hasi muri kaburimbo ahita apfa.”

Gitifu avuga ko umurambo wahise ujyanwa mu Bitaro bya Kibogora gukorerwa isuzuma, nyir’imodoka we yahise ajyanwa gufungirwa kuri Sitasiyo y’Urwego rw’Igihugu rw’Ubugenzacyaha (RIB) ya Gihombo n’imodoka ye.

Gitifu Dusabimana yavuze ko ubusanzwe nubwo abashoferi bajya babirengaho bagatwara abagenzi muri za Fuso ahagenewe imizigo bitemewe kuko igice cy’imizigo kitagenewe gutwarwamo abantu.

Yavuze ko niba yari ahisemo kuhabatwara yagombaga kureba niba bicaye neza mu buryo budateza impanuka.

Yasabye abagenda mu modoka cyane cyane nk’aba banyeshuri baba bahawe za lifuti kugenda mu myanya yahariwe abagenzi, bakagenda mu buryo bicaye neza, umushoferi akirinda umuvuduko ukabije.

Akarere ka Nyamasheke muri iyi minsi kibasiwe n’impanuka zihitana abantu, uyu muyobozi akavuga ko bikunze kuvugwa ko mu mpera z’umwaka impanuka ziyongera nubwo atazi niba ari ubushakashatsi bwabyerekanye.

Yasabye abantu kwitondera umuhanda no gukurikiza amategeko yawo kugira ngo izi mpanuka za hato na hato zirindwe.

  • BAHUWIYONGERA SYLVESTRE
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE