Nyamasheke: Imiryango 3 y’abantu 22 yasenyewe n’imvura irara rwantambi

  • BAHUWIYONGERA SYLVESTRE
  • Mutarama 15, 2024
  • Hashize amezi 4
Image

Imiryango itatu igizwe n’abantu 22 yo mu Murenge wa Kagano mu Karere ka Nyamasheke iratabaza kubera uburyo isigaye irara rwantambi nyuma yo gusenyerwa n’imvura nyinshi yaraye igwa mu ijoro rishyira ku Cyumweru tariki ya 14 Mutarama 2024.

Iyo miryano ni uwa Nduwamungu Edouard w’abantu 9, uwa Ryumugabe Landouard w’abantu 6, n’uwa Iyarusabahizi Ferdinand ufite abantu 7, bose bakaba ari abo mu Kagari ka Gako, Umurenge wa Kagano, Akarere ka Nyamasheke.

Iyo mvura yabasenyeye yaraye igwa ku wa Gatandatu irarikesha ndetse yiriza umunsi wose wo ku Cyumweru. Abaturanyi b’iyo miryango bemeza ko byabababaje ibitaka byaridutse ku nzu za bamwe bari bubatse munsi y’imikingo.

Hari aho ibyo bitaka byatengutse byagiye birengera ibyari mu nzu byose. Inzu imwe muri zo byarengeye icyumba abana bararagamo, ndetse bikaba binavugwa ko byagwiriye umwana w’imyaka 10 wari uryamye yangirika amaguru akaba ari kuvurirwa mu Bitaro bya Kibogora.

Umwe mu baturanyi witwa Vuguziga Jean d’Amour, yagize ati: “Hari nk’uwitwa Iyarusabahizi Ferdinand wo mu Mudugudu wa Remera, ibitaka byamuridukanye bakiryamye n’imvura ikigwa, igice cyose cyegereye umukingo, mu byumba abana bararagamo kirasenyuka ku bw’amahirwe ntihagira uhasiga ubuzima, gusa umwana w’imyaka 10 kimugwaho igice cy’amaguru arangirika bikomeye, ubu arwariye mu Bitaro bya Kibogora.”

Yakomeje ati: “Nko mu Mudugudu wa Kazibira Ryimarande Landouard byamugwiriye ahagana saa yine z’igitondo ku Cyumweru, Nduwamungu Edouard ajyana n’abandi baturanyi kumutabara. Bigeze  hafi saa saba z’amanywa twumva ngo n’iwe harasenyutse.”

Abahuye n’ibi biza bose babaye bacumbikiwe na bagenzi babo, ariko n’ababacumbikiye bavuga ko biba bitoroshye guha icumbi umuryango w’abantu icyenda.

Abaturage barasaba inzego bireba gutabara abo baturage kuko  gusubira mu manegeka bashyizemo n’imvura Atari ibintu byahita bikorwa.

Vuguziga ati: “Urebye uburyo izo nzu zabaye n’uburyo imvura ikomeje kugwa isenya byinshi, twumva kuvuga ko basana bagasubiramo kwaba ari nko kwiyahura kandi kwigondera ikibanza  cyo kubakamo muri iki gihe si ibya buri wese. Twumva Akarere kabashakira aho batura heza, hariya bakahava kuko bazanahasiga ubuzima.”

Ikindi kibazo aba baturage bavuga gikomeye cyane, ni icy’abana b’abahuye n’ibi biza, bamwe batari kujya ku mashuri kubera ko imyenda n’ibikoresho byabo by’ishuri byarengewe n’ibitaka.

Kugeza ubu akaba nta muyobozi ku Karere no ku Murenge bavuga ko arabageraho ngo harebwe icyakorwa, gusa ngo abaturanyi bari bagerageje kubafasha ku biba  bibatunze igihe gito, hategerejwe ubutabazi bw’Inzego z’ubuyobozi n’icyakorwa ngo babone ahandi baba n’abana basubire kwiga.

  • BAHUWIYONGERA SYLVESTRE
  • Mutarama 15, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE