Nyamasheke: Imbwa zimaze kurya ihene 13, abaturage barahangayitse

  • Imvaho Nshya
  • Ugushyingo 14, 2023
  • Hashize amezi 6
Image

Abaturage b’Imirenge ya Kagano, Bushekeri na Rangiro, mu Karere ka Nyamasheke batewe inkeke n’imbwa z’agasozi zikomeje kurya amatungo yabo nyuma y’uko hamaze kumenyekana ihene 13 n’intama zaririwe aho zari zaziritswe.

Abaturage bavuga ko izo mbwa zikunze kuza ari mu mvura, zikabarira aho amatungo aziritse zikayarya, nyirayo yajya gucyura imvura ihise agasanga hari ibisigazwa by’intumbi gusa.

Bavuga kandi ko uretse amatungo zishobora no kuba zabarya, ababyeyi bakaba bahangayikiye abana babo bakunda kujya gutashya inkwi cyangwa bakora ingendo bajya cyangwa bava ku ishuri.

Ku wa Mbere tariki ya 13 Ugushyingo ni bwo izo mbwa zariye ihene enye z’umuturage witwa Fabien Ndaheranwa wo mu Mudugudu wa Kazibira, Akagari ka Gako, Umurenge wa Kagano, muri eshanu yari yaziritse mu kigunda cyo mu murima we.

Imvura yaguye yasize aziziritse agarutse imaze guhita yakirwa n’udutumbi twavuyemo inyama zo mu nda. Indi hene ya gatanu na yo yarayibuze bigakekwa ko ishobora kuba yaraciye ikiziriko zikayikurikira.

Umunyamabanga Nshingwabikorwa w’Akagari ka Gako, Uwamahoro Francine, yabwiye Imvaho Nshya ati: “Ni byo twamenye ibyago uwo muturage yagize muri aka Kagari imbwa zimaze iminsi zirya amatungo y’abaturage, cyane cyane ihene n’intama, ziyasanze aho aziritse ku gasozi. Ziyarya buri gihe mu mvura nta bantu bari kugenda, tukaba twagize impungenge ko zinashobora kurya abantu nk’abana baba bagiye gutashya, kuvoma mu kabande cyangwa bajya banava ku mashuri.”

Yemeza ko kubura ihene eshanu icyarimwe ku muturage ari ikintu kitoroshye mu gihe ari zo yari yitezeho kubonamo amafaranga y’ishuri yo kurihira abana, kwishyurira umuryango ubwisungane mu kwivuza n’ibindi.

Mu Nteko y’abaturage yabereye mu Mudugudu wa Kazibira imbwa zaririyemo izi hene, basabwe gukurikirana n’abana babo bato ngo batazasanga zabariye

Ati: “Ubu tugiye muri uriya Mudugudu mu Nteko y’Abaturage tubahumurize, n’uwabuze ihene ze zingana gutyo ahumurizwe kuko ntiyabura kugira ikibazo. N’abandi baturage dufatire hamwe ingamba z’icyakorwa ngo harebwe uburyo kuzirika amatungo ku gasozi byarorera bakajya bayagaburirira mu biraro, hanashakwe uburyo imbwa zakwicwa.”

Muzindutsi Edouard, Umukuru w’Umudugudu wa Mpombo mu Kagari ka Gako, na we imbwa ziherutse kurira intama 2 yaziragije muri uyu Mudugudu wa Kazibira.  

Avuga ko kutazirika amatungo ku gasozi bigoye kuko hari igihe umuntu aba yararaje umurima we akazizirikamo ari cyo yawugeneye ndetse ko kwahirira amatungo rimwe na rimwe bijya bibagora kandi mu masambu zirisha zigataha zihaze.

Ati: “Muri uriya Mudugudu imbwa zariyemo ihene 5 z’umuturage nanjye ziherutse kuharira intama zanjye ebyiri nari naharagije kandi bazimpagaho amafaranga 50,000 nkayanga. Turasaba ko iki kibazo cyahagurukirwa zitaranatangira kwirara mu bantu kuko hari n’aho zisanga ihene mu biraro ba nyiri urugo badahari zikaziriramo. Urumva ko nk’izo zihasanze abana bato bonyine zitabasiga.”

Umuyobozi w’Agateganyo w’Akarere ka Nyamasheke Muhayeyezu Joséph Désiré, avuga ko ari ikibazo gikomeye kuko izo mbwa zangiza umutungo w’abaturage zigateza n’inkeke ku buzima n’umutekano wabo.

Yemeje ko bamaze kumenya ihene 13 n’intama atibuka umubare zimaze kuribwa n’izo mbwa mu Mirenge inyuranye, hakaba n’aho raporo zidatangwa ngo umubare umenyekane wose.

Ati: “Ni ikibazo gikomeye cyane tutakinisha kuko niba zimaze kurya amatungo y’abaturage angana atyo, bakagira n’impungenge ko zarya n’abantu cyane cyane abana batanashobora kuzirwanya, ntituzi niba haba harimo n’izirwaye ibisazi kuko ziba zitakingiwe. Tugiye kugihagurukira dushake uburyo zakwicwa n’iz’abaturage zidakingiye dusabe ba nyirazo kuzikingira no kuzikurikirana kugira ngo zitange umutekano mu baturage.”

Iki kibazo si ubwa mbere kivuzwe mu Karere ka Nyamasheke kuko cyigeze kuvugwa no mu Murenge wa Cyato aho imbwa zanageraga mu ngo z’abaturage zikarira amatungo mu biraro bidakingwa.

Izo mbwa zagabanyije umurindi ubwo zicwaga ku bufatanye bw’abaturage, Inzego z’umutekano n’ubuyobozi.

BAHUWIYONGERA SYLVESTRE

  • Imvaho Nshya
  • Ugushyingo 14, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE