Nyamasheke: Fuso yari ipakiye imbaho yakoze impanuka ikomeretsa batanu yari itwaye

Imodoka ifite pulake RAG 970 P yo mu bwoko bwa Fuso, yari itwawe na nyirayo, Misago Aloys w’imyaka 37, ivuye gupakira imbaho mu Mudugudu wa Gitaba, mu Kagari ka Rwesero, Umurenge wa Kagano, Akarere ka Nyamasheke, yageze mu Mudugudu wa Kirehe, muri ako Kagari, arenga umuhanda nko muri metero 200 igwa mu kabande, 5 bari bayirimo barakomereka.

Mulindabigwi Anatole yabwiye Imvaho Nshya ati: “Hari mu ma saa moya n’igice z’ijoro rishyira uyu wa 17 Kanama 2026, Fuso yikoreye imbaho yari ivuye gupakira mu Mudugudu wa Gitaba, igeze mu Mudugudu wa Kirehe ita umuhanda igwa mu kabande hakomereka uwari uyitwaye, nyirimbaho witwa Bayavuge Fabien, n’abandi bari 3 bari inyuma hejuru y’imbaho.”

Niyonkuru Eric we yagize ati: “Twabonye impanuka yatewe no kuba uwari utwaye imodoka atari azi uyu muhanda neza  kuko ari uw’igitaka umeze nabi, akibwira ko ari mwiza akisanga yawurenze, ari mu kabande. Abari bayirimo bakomeretse bajyanwa kwa muganga.”

Umunyamabanga Nshingwabikorwa w’Umurenge wa Kagano, Mukamusabyimana Marie Jeanne yabwiye Imvaho Nshya ko abakomeretse bajyanywe kuvurirwa mu kigo nderabuzima cya Nyamasheke, bagezeyo umwe akomezanywa mu bitaro bya Kibogora.

Ati: “Ku bw’amahirwe nta wahasize ubuzima. Hari mu masaha y’ijoro abakomeretse tubajyana mu Kigo Nderabuzima cya Nyamasheke kuvurwa, bahagejejwe uwari wakomeretse cyane wanavugaga ko ababara umutwe ajyanwa mu bitaro bya Kibogora.’’

Yavuze ko muri ibi bihe by’impeshyi hari igihe abashoferi batwara ibinyabiziga mu mihanda y’ibitaka birara, bakaba bagira impanuka bitewe n’uburangare, abasaba kujya baringaniza umuvuduko cyane cyane mu mihanda batamenyereye inanyurwamo cyane kugira ngo bataba banagira izindi mpanuka zanahitana ubuzima bw’abantu.

Umuvugizi w’Ishami rya Polisi y’Igihugu rishinzwe Umutekano wo mu Muhanda, SP Emmanuel Kayigi yabwiye Imvaho Nshya ko 5 bakomeretse bajyanywe mu Kigo Nderabuzima cya Nyamasheke, 3 bakavurwa bagataha, 2 bakoherezwa mu bitaro bya Kibogora akaba ari ho barwariye. Ati: “Impanuka yatewe n’imiyoborere mibi y’ikinyabiziga yaturutse ku burangare bw’umushoferi.”

Yibukije ko abakoresha umuhanda by’umwihariko abatwara ibinyabiziga kubahiriza amategeko y’umuhanda. Ati: “Tuributsa abatwara ibinyabiziga ko kuba uri mu muhanda w’itaka bitakubuza kubahiriza amategeko y’umuhanda kuko bitemewe kuvanga imizigo n’abantu.”