Nyamasheke: Ba Gitifu b’Utugari basabiwe guhindurwa

  • Imvaho Nshya
  • Ugushyingo 15, 2023
  • Hashize amezi 6
Image

Impinduka zihuse zitaherukaga muri ba Gitifu b’Imirenge mu Karere ka Nyamasheke zateye abaturage kwibaza byinshi, aho 11 muri 15 bose bahinduriwe aho bakorera, ku rundi ruhande ariko abaturage basaba ko na ba Gitifu b’Utugari bahindurirwa aho bakoreraga.

Ni impinduka zabaye ku wa 13 Ugushyingo 2023, kandi bamwe muri ba Gitifu n’abaturage baganiriye na Imvaho Nshya bavuze ko impinduka zari zikenewe kuko nk’izi zaherukaga ku ya 1 Kanama 2018, Gitifu kumara imyaka irenga 5 mu Murenge umwe, bamwe muri bo ubwabo bakavuga ko biba birambiranye.

Umwe ati: “Bamwe muri twe twabishakaga cyane rwose kwimuka tukava aho twakoreraga. Buriya iyo ushyizwe mu Murenge, uzana amayeri cyangwa uburyo bw’imikorere buzagufasha kugera ku ntego zawe. Niba ari mituweli ukagira uburyo bwawe uzayaka utazituye ihene y’umuturage, mu gihe uwari uhari yazimaze zigurishwa ngo iboneke, ushaka uburyo uzabashyiramo ubukangurambaga bakitabira gahunda za Leta badahutajwe”.

Yunzemo ati: “Ariko iyo za ngamba nziza wahazanye uhamaze igihe, uko ubiga ni ko bakwiga, mu myaka 2 cyangwa 3 bikaba bigenda neza, yarenga bakaba bamaze gutahura rya banga ryose wakoreshaga, bakakumenyera, bakagufata nk’usanzwe ntube ukigize icyo uhamaze. Icyo gihe rero biba bisaba impinduka ngo rya banga urijyane aho batarizi, rihatange umusaruro”.

Anavuga ko hari ababa bakeneye kwimurwa ku mpamvu z’ubuzima, kimwe n’abagumishijwe mu Murenge yayoboraga na we kubera impamvu z’ubuzima, na byo rimwe na rimwe bikaba bikenerwa ngo umuntu arusheho gutanga umusaruro.

Indi mpamvu ni uko hari Gitifu uba warazamuye Umurenge bigaragara nk’uwo akaba agomba kujyanwa mu Murenge ukiri hasi mu iterambere na gahunda za Leta, akawuzamura.

Undi Gitifu w’Umurenge yavuze ko izi mpinduka bazishimiye ariko no mu tugari zageramo.

Meya Muhayeyezu Josèph Désiré avuga ko impinduka ziba zikenewe mu kunoza imikorere

Ati: “No mu Tugari bihagere rwose, kuko kuba Akarere kacu gaherutse kugaragazwa nk’aka mbere mu gihugu muri ruswa, biraturuka kuri ba Gitifu b’Utugari batumazemo imyaka irenga 10, batugize nk’uturima twabo, bakagera aho bimika ibidakwiye nka ruswa, ntiteranya n’ibindi kubera kumenyerana n’abaturage cyane, izo ngeso zikaziramo. Nubwo hari abatangiye kubahinduranya hagati mu Mirenge ariko bidakozwe hose, tuzahora imbere mu mafuti.’’

Arabihuriraho n’umuturage ariko umenyereye iby’Inzego z’ibanze, uvuga ko impinduka nk’izi ziba ari ngombwa.

Ati: “Niba bashaka impinduka mu miyoborere n’iterambere by’aka Karere, kakava ku mwanya wa mbere mu bukene na ruswa mu gihugu, nibarebe no mu tugari kuko ari ho akenshi bipfira. Cyane cyane mu twa kure, aho baba bazi ko ubuyobozi n’itangazamakuru badahoza ijisho, abaturage baba barazambijwe na bamwe muri ba Gitifu gito, batagira icyo babagezaho, ahubwo babakama. Na ho bahageze ijisho.’’

Umuyobozi w’agateganyo w’Akarere ka Nyamasheke Muhayeyezu Joséph Désiré avuga ko guhindura ba Gitifu b’Imirenge byakozwe mu nyungu z’akazi, nta byacitse ihari, ko byari bikenewe cyane urebye imikorere yari ihari ndetse n’abaturage bagasaba ko izi mpinduka zanagera mu Tugari, kuko bamwe kuturambamo byabateye kudohoka.

Muhayeyezu yavuze ko impinduka zari ngombwa.

Ati: “Byari ngombwa kugira ngo mbikwereke neza, hari nka Gitifu wari umaze imyaka 17 mu Murenge umwe nubwo yabanje kuwukoramo ibindi akamuba nyuma. Ariko nawe urumva ko iyo myaka yose ari myinshi mu Murenge umwe.  Tureba dukurikije igikenewe,turabizi ko hari abaturage baba badashaka ko Gitifu runaka abava iruhande kubera kumenyerana mu buryo bumwe cyangwa ubundi,ariko hari igihe biba ngombwa,nta byacitse ihari.’’

Ku bifuza impinduka no mu Tugari, yagize ati’’ Ni byo, baravuga ukuri na ho hari aho tubona rwose zikenewe zihuse. Bareke ab’imirenge bagere aho boherejwe n’ibindi  turabyigaho, turebe icyakorwa. Ubwo ari n’icyifuzo cy’abaturage byaba ari amahire kuko byose bikorwa mu nyungu zabo”.

BAHUWIYONGERA SYLVESTRE

  • Imvaho Nshya
  • Ugushyingo 15, 2023
  • Hashize amezi 6
TANGA IGITEKEREZO
Eric Nakata says:
Ugushyingo 15, 2023 at 7:41 pm

Iyo ibikorwa byose byita ku nyungu z’Igihugu n’Umuturage,birakorwa kandi bigatanga umusaruro.Umutoza w’Ikirenga niwe soko tuvomaho.

Andika igitekerezo

AMATEGEKO AGENGA IYANDIKA RY'IGITEKEREZO CYAWE