Nyamasheke: Amazi meza yakijije ab’i Cyato indwara ziterwa n’umwanda

  • BAHUWIYONGERA SYLVESTRE
  • Mutarama 7, 2024
  • Hashize amezi 2
Image

Abaturage b’Utugari twa Bisumo, Rugali na Murambi mu Murenge wa Cyato, Akarere ka Nyamasheke, baravuga ko aho baboneye amazi meza ubuzima bwabaye bwiza, ibibazo by’indwara zituruka ku mwanda n’ingorane zo kuzivuza kure bagiraga biracika.

Abo baturage bizeza ko batazatezuka ku gufata neza ayo mazi  baharanira ko nta wakwangiza amavomo, kandi bagahorana imibereho myiza bagira isuku, banayanywa bayatetse kugira ngo barusheho kwirinda indwara.

Bamwe mu bagiranye ikiganiro n’Imvaho Nshya, bavuze ko ayo mazi bayamaranye imyaka 4, ari na cyo gihe gishize indwara zituruka ku mwanda zaragabanyutse ku buryo bugaragara, nk’impiswi, inzoka zo mu nda, indwara z’uruhu n’izindi.  

Igihe bari mu ngorane zo kutagira amazi, bavuga ko no kwivuza bitari biboroheye kuko kugira ngo bagere ku Bitaro bya Kibogora bivurizagaho byabasabaga nibura kumara iminsi itatu.

Icyo gihe nta kigo nderabuzima bagiraga kibegereye, ariko ubu bamaze no kubona Ikigo Nderabuzima cya Yove gikorana n’Ibyo Bitaro Bikuru bya Kibogora.

Abasaza n’abakecuru bavuga ko bakigendana imvune batewe no kwikubita hasi, n’amajerikani n’ibibindi byabituraga mu gatuza bagiye kuvoma imvura ihise.

Bavuga ko aho begerejwe amazi barangwa n’isuku, indwara ziterwa n’umwanda no kwambara ibitameshe bikaba byarabaye amateka.

Nyirakadende Thérèse w’imyaka 82 avuga ko we n’abo mu kigero cye bakuze barazonzwe n’inzoka zo mu nda, indwara z’impiswi n’ibyorezo bya kolera bitahasibaga.

Yavuze ko kujya ku Bitaro Bikuru bya Kibogora byabasabaga kuzinduka bagenda n’amaguru bakabigeraho bwije, bakaharara, bagatonda umurongo saa kumi n’imwe z’igitondo ngo bavurwe kare batahe.

Ati: “Ubu ngendana imvune mu gatuza natewe n’ikibindi nari nikoreye nzamuka umusozi mvuye mu kabande kuvoma, imvura yari yaguye hanyereye, ndanyerera ngwa ngaramye, ikibindi cy’amazi kinyikubita mu gatuza. Iyo tuza kuba dufite amazi meza nk’ubu, iyo mvune ingaruka ngahora kwa muganga simba nyifite.”

Nyirandemeye Véronique na we w’imyaka 82, utuye mu Mudugudu wa Rugarama, Akagari ka Bisumo, avuga ko yari yarazonzwe n’inzoka zo mu nda ariko na zo akazivurisha ibyatsi kubera ko yatinyaga kugenda iminsi itatu ajya kwivuza.

Anavuga ko agendana imvune mu ivi yo kugwa amanuka ajya kuvoma mu bunyereri n’ubu yanze gukira.

Ati: “Iyo na kera tugira ubuyobozi butwitaho nk’ubwo dufite ubu, bukaduha amazi meza ntituba tugendana ingaruka z’ubuzima tugendana ubu. Ariko Imana ishimwe ko ubuyobozi bwiza bwabonye iyo mibabaro yose bukayaduha, ubu turanywa tukanakoresha amazi meza, isuku yatubereye isoko y’ubuzima.”

Ndikumana Alexis uhagarariye abacururiza muri Santere y’ubucuruzi ya Ville mu Kagari ka Bisumo, yavuze ko ijerikani  y’amazi mabi abajya mu mibande bayigurishaga hagati y’amafarnga 100 na 200, ariko  uyu munsi ameza aragura  amafaranga 10 gusa ku ijerekani ku batarakururiye mu ngo zabo.

Ati: “Amazi meza twarayabonye ku bwinshi rwose, isuku ni yose muri iyi santere y’ubucuruzi, abafite za resitora n’ibyokezo bagaburira abantu babanje kubakarabya n’amazi meza n’isabune. Turakoropa tugakorera ahasukuye. Byose nta wundi tubikesha uretse Intore izirusha intambwe, Perezida Kagame dukomeje gushimira cyane.”

Mu nteko y’abaturage yabereye kuri iyi Santere y’ubucuruzi mu mpera z’umwaka ushize, Umunyamabanga Nshingwabikorwa w’Umurenge wa Cyato, Harindintwali Jean Paul, yabasabye gufata neza ibikorwa remezo byose bagezwaho birimo ayo mazi meza, amashyanyarazi n’ibindi.

Yabijeje ko n’ibitarabageraho, nk’imihanda myiza, bizabageraho uko ubushobozi buzagenda buboneka kuko Leta ibazirikana.

  • BAHUWIYONGERA SYLVESTRE
  • Mutarama 7, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE