Nyamasheke: Agahinda k’abasore n’inkumi batse gatanya bakimara gusezerana

  • Imvaho Nshya
  • Nzeri 14, 2023
  • Hashize amezi 9
Image

Gusezerana imbere y’amategeko ariko abantu baba bamaze kubana bakananiranwa ni ibintu bimaze kumenyererwa mu Rwanda n’ahandi ku Isi, ariko no kuba hari bamwe bajya imbere y’amategeko bagahita batangira kwaka gatanya batarabana nk’umugore n’umugabo ni ibintu na byo byatangiye kugaragara.

Bamwe mu bo byabayeho mu Karere ka Nyamasheke bavuganye n’Imvaho Nshya bagaragaje uburyo byabashenguye umutima ndetse bamwe bakaba basigaye bagenda bikandagira kubera igisebo no kutagira umuntu bizera biturutse ku kuba bumva barasigaye inyuma.

Murekatete (amazina yahinduwe), wo mu Murenge wa Ruharambuga mu Karere ka Nyamasheke, yavuze ko yizeye umusore barakundana ariko akamutahura bakimara gusezerana imbere y’amategeko.

Umusore nyamwizezaga ibitangaza amwereka ko yari yiyubatse detse ko hari byinshi yagezeho, ariko bamara gusezerana agasanga umusore yaramubeshyaga kandi hari amafaranga na we yamuhaye atekereza ko arimo gushyigikira imishinga yamubwiraga ko afite.

Yagize ati: “Icyanteye kubivamo ni uburyo nizeye umusore akampemukira, ambeshya ko hari ibyo yamaze kwigezaho akajya yanga kubinyereka ngo azabinyereka tumaze gusezerana. Namuhaye ku mafaranga nari mfite ambeshya ko inzu ye ibura inzugi gusa kandi ntayo kuzigura afite, maze kumutahura twaranasezeranye numva kwihanganira kubana na we ntabishobora mbivamo ntyo.”

Murekatete avuga ko nubwo byamuteye ihungabana agerageza kwisuganya ngo ibyo yahatakarije abigaruze, anategereje undi bazabana umukunda by’ukuri utanirarira nk’uko uwo basezeranye bwa mbere byagenze.

Yizera ko abantu bashobora kubana ntayo bafite bagakoresha amaboko n’ubwenge ntawubeshya undi bigatuma bagera kuri byinshi kuruta kubakira ku kinyoma kuko birangira n’ubundi nta bwumvikane buri mu muryango.

Umunyambanga Nshingwabikorwa w’Umurenge wa Ruharambuga Hagabimfura Pascal, yavuze ko iki kibazo kitabaye kuri Murekatete gusa kuko mu myaka ibiri ishize amaze kwakira abasore n’inkumi batanu baje kwaka gatanya bakimara gusezerana mu Murenge.

Ibyo bivuze ko abo batangiye gahunda yo gutandukana batarajya gusezerana imbere y’Imana cyangwa ngo babe babana nk’umugore n’umugabo.

Ubwo yaganirizaga abakirisitu b’itorero Angilikani muri Paruwasi ya Ntendezi, Hagabimfura yavuze ko icyo ari ikibazo gikwiye guhagurukirwa, anabisubiramo mu Itorero EMLR Paruwasi ya Nganzo, aho yifuza ko amadini n’amatorero agira uruhare mu kugabanya ibyago byo kuba abakundanye bashyingiranwa mu mategeko bagatandukana batabanye.

Aha Gitifu Hagabimfura Pascal yabwiraga abakristo n’abayobozi muri EAR/ Diyoseze ya Cyangugu uburemere bw’iki kibazo

Kubeshya no kwirarira bitera gushavuza imitima y’abakundanye

Aganira n’Imvaho Nshya ku buremere bw’iki kibazo n’impamvu abona zibitera, Gitifu Hagabimfura yavuze ko akurikije abo yakiriye, yasanze bituruka cyane cyane ku kubeshyana no kwirarira, bikorwa cyane cyane n’abasore.

Yavuze ko hari abasore biharaje kubeshya abakobwa ko bateye imbere, bafite amafaranga runaka kuri konti, ko bafite inzu n’ikibanza mu mujyi uyu n’uyu, bize kandi bafite impamyabumenyi runaka, bigakurura bamwe mu bakobwa kugeza baguye muri uwo mutego bavamo amazi yarenze inkombe.

Ngo hari n’abakobwa babeshya abasore ko bacuruza, bafite amafaranga, baminuje n’ibindi, umusore yatangira kumushakira akazi ngo bazabane agafite, baranasezeranye mu Murenge, umukobwa akamubwira ko yamubeshyaga atigeze yiga cyangwa yayacikirije icyizere kikaba kirayoyotse inzira yo kubana igahagarara.

Avuga ko uko kutabwizanya ukuri no kutabona umwanya wo kumenyana bihagije biteza ibibazo byinshi mu basore n’inkumi baba bagiye kurushinga, hiyongeraho n’irari ry’abasore rijyana no gukunda iby’Isi.

Ati: “Ni ikibazo gikomeye cyane kuko nubwo hari na benshi dufite batse gatanya barabanye, umwe asanze ibyo yibwiraga kuri mugenzi we yaribeshyaga kwihangana bikanga bagatana, hari noneho n’abo babivamo bataranabana. Tugasaba cyane cyane amadini n’amatorero kudufasha kwigisha abagiye kurushinga, hakanabaho ko n’imiryango ibashyira hamwe ikabaganiriza mbere yo gufata icyemezo kuko bikomeje bitya byakwangiza byinshi.”

Mu baje kwaka gatanya batarabana, harimo imiryango ibiri yigishijwe ikisubiraho mu gihe indi itatu byanze burundu ku buryo bemerewe gutandukana nubwo bizana n’ingorane zitandukanye.

Ati: “Biteza ingorane nyinshi zirimo ko hari abasubiza ibyo bari bamaze gutangwaho byose kandi atari byo bari biteze, abakobwa bafatwa n’ihungabana rikomeye aho usanga bavuga ko kuva byababaho bafashwe n’umutwe udakira, batagisinzira bakaba banakurizamo kwiyahura cyangwa kwiyanga burundu, hakaba n’abo bishobora kubaho nk’umusore yaramaze gutera umukobwa inda bikarushaho kugorana.”

Avuga ko ingo zisenyuka abashakanye babana zo bituruka ahanini ku kutumvikana ku micungire y’umutungo, ubushoreke n’ubuharike, bigasaba guhagurukira rimwe kw’inzego zose bireba, cyane cyane kwigisha abagiye kurushinga ngo bumve neza uburemere bw’ibyo bagiyemo.

Mukankusi Athanasie Umuyobozi wungirije w’Akarere ka Nyamasheke ushinzwe imibereho myiza y’abaturage, avuga ko ikibazo cy’amakimbirane yo mu ngo muri aka Karere gihari, aho muri 2021 mu Murenge wa Kirimbi n’uwa Cyato hagaragaye abagabo bishe abagore babo.

Muri uwo Murenge wa Cyato ndetse no muri Bushekeri havugwamo abagabo babiri bapfuye bikekwa ko biyahuye nyuma yo kutagira ibyo bumvikanaho n’abagore babo.

Anavuga ko hari ingo 666 zabaruwe ziri mu makimbirane, zigenda zigishwa ngo ziyavemo, akongera gusaba imiryango kubana neza n’abagiye kurushinga bagategurwa neza kare, kuko ingaruka z’imibanire mibi zirenga ku bayagiranye zikagera ku muryango mugari, by’umwihariko ku bana.

BAHUWIYONGERA SYLVESTRE

  • Imvaho Nshya
  • Nzeri 14, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE