Nyamasheke: Abaturage b’Umurenge wa Gihombo badindizwa no kutagira isoko

  • BAHUWIYONGERA SYLVESTRE
  • Mutarama 9, 2024
  • Hashize amezi 5
Image

Abaturage b’Umurenge wa Gihombo, Akarere ka Nyamasheke, bavuga ko kutagira isoko mu Murenge wabo,  bikomeje kubadindiza mu iterambere kuko babona imirenge ifite amasoko hari byinshi ibarusha.

Abo baturage binubira guhora bahonda amaguru bajya mu masoko ya kure, kandi abava ahandi baza guhaha mu Murenge wabo bakaba ari bake kuko nta soko baba bahasanga.

Ni ikibazo bavuga ko bagejeje ku nzego nyinshi, uhereye ku zibegereye ukageza no ku Ntumwa za Rubanda zibasura ziturutse mu Nteko Ishinga Amategeko.

Bemeza ko batoroherwa no kurema amasoko ya Karengera mu Umurenge wa Kirimbi, irya Mugonero mu wa Mahembe n’ahandi, bakahakora ingendo ndende, kandi bikabagiraho ingaruka kuko isoko riba rivuze iterambere.

Mukamugenga Julienne waganiriye n’Imvaho Nshya avuye mu isoko rya Karengera mu Murenge wa Kirimbi ahetse umwana, anikoreye ibyo yahashye, yavuze ko yakoresheje amasaha  hafi 3 n’amaguru kugira ngo ahagere.

Ababazwa n’uko Umurenge wabo ufite ahashobora kujya isoko hafi ya kaburimbo ariko ubuyobozi ntibubyiteho, bagakomeza kuvunika bajya ahandi.

Ati: “Reba nk’ubu mpetse umwana ndanikoreye. Natereye imisozi manuka indi kugira ngo ngere mu isoko rya Karengera. Agasoko tugira muri uyu Murenge ni aka nimugoroba aho bita mu Kibati hafi y’igishanga cy’umuceri, na bwo twumva bavuga ko bazakimura kuko ari mu gishanga.

Imirenge ifite amasoko usanga hari na santere z’ubucuruzi zikomeye, aha nta santere y’ubucuruzi igaragara dufite. Nk’abagore twakwiteza imbere dute muri ubu buzima?”

Aba baturage bavuga ko abenshi muri bo bitaborohera kubona n’amafaranga bakoresha batega moto, bigatuma bakoresha nibura amasaha ane n’amaguru.

Bimenyimana Jean w’imyaka 70, ati: “Uzi kugira inkoko cyangwa ihene, imyumbati cyangwa indi myaka, ukabigendana amasaha angana gutyo yose ujya ku isoko? Bituma abamamyi baza bakatwunamaho, inkoko yakaguze amafaranga 10.000 bakaguha 5.000 kuko bazi ko nta handi wayijyana. Ihene ikwiriye amafaranga 50.000 baguha  30.000, bakajya kwiyungukira tugahora tumeze nk’abakorera ubusa.”

Bavuga ko zimwe mu ngaruka bibatera ari uko ugize icyo abona wese ahunga uyu Murenge akajya aho abona ubuzima, n’abagifite imbaraga bakigendera hagasigara abasaza n’abakecuru  gusa.

Muhayeyezu Joseph Désiré, Umuyobozi wungirije w’Akarere ka Nyamasheke ushinzwe iterambere ry’ubukungu, yemeza ko kutagira isoko mu Murenge biwudindiza.

Yongeraho ko Gihombo atari wo Murenge wonyine utagira isoko, ko ahubwo hari n’indi nka Shangi na Rangiro, ndetse n’irya Karengera rikaba ritubakiye.

Ati: “Ni ibibazo tuzi, dukomeza gushakira ingengo y’imari ngo tuyubake. Mu by’ukuri birumvikana, iyo abaturage babona umusaruro ntibabone hafi bawujyana bitababangamiye, usanga bibangamye cyane. Gusa icyiza kiba gihari ni uko dushimira Leta yacu ko yateje imbere cyane ubwikorezi, cyane cyane nk’aba ba Gihombo, ku buryo bashobora kurema amasoko ya Karengera, Mugonero, Rugali muri Macuba, n’andi bagenda neza, ariko turakomeza ubuvugizi turebe ko ingengo y’imari yaboneka kugira ngo ahakeneye amasoko hose yubakwe abaturage boroherwe.”

Visi Meya Muhayeyezu na we yemeza ko Umurenge utagira isoko uhomba byinshi, kuko uretse  kuba abaturage batabona aho bajyana umusaruro no mu bijyanye no kwiteza imbere, barushaho kongera ibikorwa biybara amafaranga bibazamura bikanateza imbere Igihugu.

  • BAHUWIYONGERA SYLVESTRE
  • Mutarama 9, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE