Nyamasheke: Abarobyi basuhukiye muri Uganda na RDC batangiye kugaruka

  • Imvaho Nshya
  • Nzeri 26, 2023
  • Hashize amezi 8
Image

Abarobyi bari barasuhukiye muri Uganda no muri Repubulika Iharanira Demokarasi ya Congo (RDC) kubera ingorane bahuriraga na zo mu burobyi bakoreraga mu Kiyaga cya Kivu batangiye kugaruka, bakaba bashimira ubuyobozi burangajwe imbere na Perezida wa Repubulika Paul Kagame bwabonye igisubizo.

Ubuyobozi bw’ihuriro ry’amakoperative y’abarobyi mu Karere ka Nyamasheke bwemeza ko abarobyi basaga 170 muri 200 bari barasuhutse ari bo bamaze kugaruka kubera ko ibibazo bahuraga na byo byakemutse.

Muri ibyo bibazo byakemutse harimo kuba Leta y’u Rwanda yarashyize imbaraga mu kurwanya ba rushimusi n’imitego itemewe, abari abarobyi bakaba bakora ubworozi bw’amafi bwa kijyambere muri kareremba, bigatuma n’igihe Ikiyaga cya Kivu cyafunzwe by’agateganyo kugira ngo amafi yororoke batajya mu bushomeri.

Ikindi cyatumye abari barasuhutse bagaruka ni uko Leta y’u Rwanda yatanze imitego y’amafi y’icyerekezo itima bakora uburobyi bwa kinyamwuga butangiza abana b’amafi.

Ndagijimana Elias, Umuyobozi w’Ihuriro ry’amakoperative y’abarobyi muri Nyamasheke, yavuze ko iyo hadafatwa ingamba zo kongera umusaruro bagenzi babo bari bagiye kubashiraho basuhuka.

Ni ikibazo cyatangiye kuva mu mwaka wa 2018, ubwo bakoreraga mu bihombo kubera ba rushimusi batumaga amafi adakura bakoresha imitego ya kaningini na supaneti.

Byari bigeze aho umurobyi ufite ikipe y’amato 3, ijoro ryose ricya arobye ibilo 3 kugeza ku 10 kubera ko nta musaruro wari ukiboneka.

Ndagijimana yagize ati: “Kuva mu mwaka wa 2018 kugeza mu 2021, abenshi bari babihiwe n’uburobyi ari ibihombo bisa. Byatumaga bigendera kuko umusaruro wose ba rushimusi basaga n’abawumazemo, abenshi mu barobyi babibonye batyo barigendera. Ariko ubu umurobyi araroba ibilo biri hagati ya 50 na 60 mu ijoro rimwe.”

Yarakomeje ahamya ko ako kajagari kabonekaga mu burobyi ari ko kari karatumye abarenga 200 basuhukira mu bihugu by’abaturanyi nka Uganda na RDC, mu gihe cy’imyaka ine ishize.

Ati: “Ariko aho bimaze kugira mu buryo, abarobyi 170 baragarutse barimo 60 baje uyu mwaka wonyine. N’abo 30 basigaye baradutumaho buri munsi ko uburobyi nibufungurwa bazagaruka kuko bumva amakuru ko uburobyi mu Kivu buhagaze neza.”

Ikibazo cyatumaga abarobyi basuhukira muri Uganda na RDC cyarakemutse, umusaruro w’isambaza wiyongeraho n’uw’amafi

Kuva ku wa 28 Kanama, uburobyi bukorerwa mu Kiyaga cya Kivu bwahagaritswe kugeza ku wa 28 Ukwakira ariko ngo ntibikiri ikibazo kuri benshi kubera amafi yororerwa muri Kareremba atuma bakomeza gukora.   

Ikibazo cyakemutse Leta ibyinjiyemo

Abarobyi baganiriye n’Imvaho Nshya, bavuze ko aho inzego zose zitangiriye kwinjira mu kurwanya ba rushimusi, n’abarobyi ubwabo bakabigira ibyabo, umusaruro w’Isambaza wabonetse ku bwinshi ukiyongeraho n’uw’amafi yo muri Kareremba.

Inkunga ya Leta ya Kareremba n’imitego y’icyerekezo bahawe yafashije n’abatari bafite ubushobozi bwo kwinjira mu makipe yabasabaga kuba bakwishyura nibura miliyoni eshanu z’amafaranga y’u Rwanda.

Mbonyimana Aloys umaze imyaka 30 muri uyu mwuga, avuga ko mbere y’uko Leta yahagobotse uburobyi bwari butangiye gupfapfana mu buryo bufatika.

Ati: “Turashimira byimazeyo Leta yacu irangajwe imbere na Perezida Paul Kagame kuko iyo itareba kure ngo ikemure ibyo bibazo, nta buzima tuba dufite.  Kareremba zatugezeho mu kwa 11 umwaka ushize dutangira kuroba amafi mu kwa 5 uyu mwaka, ifunga ry’uburobyi riba mu kwa 8. Ubu nta kibazo dufite turaroba amafi buri munsi muri Kareremba, nta rushimusi ucyangiza umusaruro, nta nzara cyangwa ubushomeri mu bakozi n’abakiliya bacu.”

Yishimira ko abakozi 9 asanzwe akoresha mu burobyi ahemba ku kwezi, batakijya mu bushomeri muri ayo mezi abiri ikiyaga gihabwa agahenge kugira ngo amafi akure, kubera ubworozi bwo muri Kareremba.

Abagore bacuruza isambaza bavuga ko ubu bishimye kuko imikorere itahagaze, aho ayo babonaga mu isambaza bayabona mu mafi.

Amakoperative y’abarobyi muri Nyamasheke avuga ko batazatezuka ku ntego  yo kurinda ikiyaga cya Kivu no kubyaza umusaruro amahirwe Leta y’u Rwanda yabahaye, banongera Kareremba ku zo bahawe nk’inkunga.

Mu Karere ka Nyamasheke habarizwa amakoperative 7 y’abarobyi  agizwe n’abanyamuryango barenga 250.

Imitego itemewe yaraciwe umusaruro w’isambaza uriyongera
Abacuruza isambaza babonye amahirwe yo gucuruza amafi mu gihe ikiyaga kiri mu kiruhuko

BAHUWIYONGERA SYLVESTRE

  • Imvaho Nshya
  • Nzeri 26, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE