Nyamagabe: Bishimiye gahunda yo gutera ibiti 50 by’imbuto kuri buri shuri

  • AKIMANA JEAN DE DIEU
  • Ugushyingo 29, 2023
  • Hashize amezi 3
Image

Bamwe mu baturage batuye mu Karere ka Nyamagabe bishimiye gahunda yatangijwe yo gutera ibiti by’imbuto ziribwa nibura 50 kuri buri kigo cy’ishuri, bakaba babibona nk’amahirwe yo kurushaho kunoza imirire mu bigo by’amashuri.

Izo ngemwe zatangiye guterwa ku bigo by’amashuri kugira ngo bizunganire gahunda yo gufatira ifunguro ku ishuri aho bateye ibiti ibihumbi 3611.

Abo baturage bizera badashidikanya ko bizagira uruhare mu kunoza ifunguro ryuzuye abana bafatira ku ishuri hakaburamo imbuto kubera ubushobozi buke bw’ibigo by’amashuri.

Gasigwa Xavier avuga ko bishimiye icyo gikorwa kuba cyatangijwe muri ibi bihe by’imvura akavuga ko izi mbuto nizimara kwera zizafasha ibigo by’amashuri kongera ubuziranenge bw’amafunguro abana bafata ku ishuri.

Yagize ati: “Turishimye cyane kuko usanga ibigo bigira imbuto ari ibigo by’abihaye Imana gusa ariko niba nibi byibutswe twizeye ko nibyera neza ntibipfe bigakurikiranwa neza bizafasha muri gahunda y’urubuto ku mwana muri gahunda yo gufatira ifunguro ku ishuri kuko rizaba ryujuje ibisabwa byose kugira ngo ribe ifunguro ryuzuye.”

Mujawimana Domithile avuga ko hari ababyeyi badafite ubushobozi bwo kugurira abana imbuto, ariko ibigo byose nibiterwaho ibi biti by’imbuto bizafasha kubonera umwana urubuto nibura rumwe ku ifunguro afatira ku ishuri.

Yagize ati: “Urebye umusaruro twawitega kuko hari imiryango itandukanye ikigaragaramo ababyeyi badafite  ubushobozi bwo kubonera abana imbuto zo kurya ariko ibigo byose nibiterwaho ibi biti by’imbuto bizafasha kuko nibyera abana bacu bazazigaburirwa ariko hari bimwe mu bigo binagerageza bikagurira abana imbuto.”

Ibiti by’imbuto bierwa mu mashuri bibonwa nk’igisubizo cyo kurwanya imirire mibi

Karegeya Ladislas avuga ko iyi gahunda igenze neza yaba igisubizo mu kurwanya igwingira ndetse n’imirire mibi kuko usanga umuturage imbuto afite yejeje azijyana ku isoko aho kuziha abana be.

Yagize ati: “Ni byo izi mbuto zaba igisubizo mu kurwanya imirire mibi n’igwingira kuko akenshi usanga umuturage yeza nka avoka, imyembe, amapera n’ibindi akabijyana ku isoko kugira ngo abonemo amafaranga yo kwikenura ndetse ugasanga rimwe na rimwe umwana atakoraho.”

Umuyobozi w’Akarere ka Nyamagabe Hildebrand Niyomwungeri, avuga ko ibi biti by’ imbuto bigomba guterwa ahashoboka hose ku bigo by’amashuri kugira ngo imbuto zizavaho zizunganire gahunda yo gufata ifunguro ku ishuri no kwirinda mirire mibi n’igwingira mu bana.

Yagize ati: “Dufite gahunda yo gutera ibiti byinshi bishoboka ariko tumaze gutera ibiti 3611 kandi twizeye ko imbuto zizeraho zizafasha muri gahunda yo gufatira amafunguro ku ishuri kandi bizanadufasha guhangana n’ikibazo cy’igwingira n’imirire mibi.”

Depite Muhongayire Christine wifatanyije n’abaturage mu Muganda usoza ukwezi k’Ugushyingo yasabye abanyeshuri kuzasigasira ibi biti by’imbito baterewe bigakura neza kugira ngo bazabashe kubona imbuto bizera bazirye zunganire gahunda yo gufatira ifunguro ku ishuri.

Yagize ati: “Ndagira ngo nsabe abayenshuri ndetse n’abayobozi babo n’izindi nzego ko bakwiye gusigasira ibi biti by’imbuto duteye kugira ngo bikure neza byere haboneke imbuto zizaribwa n’aba bana kugira ngo bizunganire gahunda yo gufatira ifunguro ku ishuri kuko imbuto ni ingenzi ku buzima bwa muntu.”

Ku ikubito hatewe ibiti ibihumbi 3 611 bizatanga imbuto ariko ubusanzwe bafite umuhigo wo gutera ibiti 50 bitandukanye kuri buri shuri. Ibyo biti by’imbuto birimo ibya avoka, maracuja, ipapayi ndetse n’ibindi.

Nanone kandi hatewe ibiti by’imitako 3 918 ndetse n’ibyagaburirwa amatungo 4878 mu bigo byoroye.

  • AKIMANA JEAN DE DIEU
  • Ugushyingo 29, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE