Nyamagabe: Bihaye umukoro wo kudasubira inyuma mu bipimo bya  RGB

  • AKIMANA JEAN DE DIEU
  • Gashyantare 9, 2024
  • Hashize ibyumweru 3
Image

Abaturage bo mu Karere ka Nyamagabe bavuga ko umwanya wa 2 babonye mu bworozi mu bipimo byagaragajwe mu bushakashatsi bwakozwe n’Urwego rw’Igihugu rw’Imiyoborere by’umwaka ushize CRC 2023, bavuye ku mwanya wa 26 badateze gusubira inyuma.

Biyemeje ko bakoranye n’ubuyobozi kugira ngo ibi bipimo bigerweho no kuva ku mwanya wa 30 bakajya ku wa 10 mu bijyanye nuko babona imiyoborere n’imitangire ya Serivisi mu Nzego z’ibanze.

Urwego rw’Igihugu rw’Imiyoborere RGB rwagaragarije Abayobozi bo mu Ntara y’Amajyepfo uko Uturere duhagaze muri Serivisi zirimo n’iz’Ubworozi mu myaka ibiri ishize, aho Akarere ka Nyamagabe kaje ku mwanya wa 2 mu Gihugu kavuye ku wa 26 kari kajeho mu bushakashatsi bwo mu mwaka wabanje wa 2022.

Uretse kuba Akarere ka Nyamagabe karazamutseho imyanya myinshi, ni na ko kongereye amanota menshi ugereranyije n’utundi. Kazamuyeho amanota agera kuri 12.5%, mu gihe akagakurikiye ko kazamutseho amanota 8% ariko kanaje mu Turere 7 twagize amanota ari hejuru ya 80%.

N’ubundi mu bushakashatsi RGB iherutse gushyira ahagaragara ku ishusho y’uko abaturage babona Imiyoborere n’Imitangire ya Serivisi mu Nzego z’Ibanze, Aka karere kaje ku mwanya wa 10 ku rwego rw’Iguhugu kavuye ku wa 30 ari na wo wa nyuma kari kajeho mu mwaka wabanje wa 2022. Ni ko Karere kandi kazamuye amanota menshi kurusha utundi, kuko kongeyeho 9.28% ku yo kari kagize mu mwaka wabanje, mu gihe akagakurikiye kongeyeho 8.09%.

Mu kiganiro bagiranye n’Imvaho Nshya bavuga ko icyerekezo bafite ari icyo gukorana n’ubuyobozi bwabo kugira ngo batazasubira inyuma bagafatanya guhindura imibereho y’Abaturage.

Gashirabake Jean Nepomuscene atuye mu Murenge wa Gatare avuga ko ari umuhinzi mworozi mu mwaka ushize yagize uruhare mu kuzamura ibikorwa bye biturutse ku mafumbire n’imbuto z’indobanure n’ibindi bitandukanye.

Yagize ati: “Njyewe ndi umuhinzi mworozi ariko mu mwaka ushize ubuyobozi bwadufashije kubona ifumbire n’imbuto z’indobanure ku gihe natwe duhingira ku gihe ndetse tunagirwa inama zo gukoresha imiti mu birayi twahinze tubona umusaruro mwiza, ariko kandi n’igihe twiyambazaga abaganga b’amatungo kuyavura no kuyaduterera intanga barazaga bakadufasha ku gihe”.

Masengesho Dancille atuye mu Murenge wa Buruhukiro avuga ko mu mwaka ushize we n’abandi bahinzi bagize uruhare mu bikorwa by’ubuhinzi bw’ibirayi ku buryo bahawe ubuso butahingwaga kugira ngo babubyaze umusaruro.

Ati: “Mu mwaka twasoje mu buhinzi bwacu bw’ibirayi ubuyobozi bwatwongeye ubuso butahingwaga kugira ngo tububyaze umusaruro kandi twanakomeje kunoza ubworozi kuko ifumbire twakoresheje twayikuraga ku matungo tworoye. Ikilo cy’ibirayi cyari cyarazamutse cyane cyaragabanyutse kuko hari aho cyaguraga amafaranga 600 twejejwe gisubira ku mafaranga 300 kubera ubufatanye n’ubuyobozi bwacu.”

Habimana Theogene atuye mu Murenge wa Gasaka avuga ko mu mwaka washize wa 2023 mu mujyi Nyamagabe hagaragaye iterambere bitewe n’ibikorwa remezo by’imihanda n’inzu nziza zahinduye isura y’umujyi n’ibikorwa bijyanye n’ikoranabuhanga ndetse n’amashuri menshi yarubatswe ku buryo urugendo abana bakoraga rwagabanyutse cyane.

Akomeza avuga ko imbaraga zakoreshejwe zidakwiye gusubira inyuma kugira ngo babashe kuzamura n’ibindi bipimo byatuma abaturage bakomeza kubaho neza.

Umuyobozi w’Akarere ka Nyamagabe, Niyomwungeri Hildebrand avuga ko umwaka ushize wabaye mwiza ku bipimo byose bifuzaga kuzamura kandibashimira abaturage.

Ati: “Kuba twarabaye aba mbere mu Ntara y’Amajyepfo tukaba aba kabiri ku rwego rw’Igihugu n’amanota 81,4% tuvuye kuri 68,9% mu bworozi ni uko twakoranye n’inzego zitandukanye harimo n’abaturage bagize uruhare mu gushyira mu bikorwa ingamba  zose zishyirwaho natwe nk’ubuyobozi tukegera abaturage tukabakangurira gukurikiza izo ngamba bitewe na serivisi babarizwamo.

Akomeza avuga ko mu ngamba zashyizweho harimo kongera ubuso bwo guhinga kandi bugahabwa abaturage kuko nibura hegitari 100 zahawe abaturage bahinga na Koperative zitandukanye. Mu bworozi twanagerageje kwegera aborozi bigishwa uburyo borora neza bakabona umukamo n’umusaruro uhagije ariko hari n’ibindi twagezeho harimo n’ibyumba by’amashuri kugira ngo tubashe gufasha abakoraga urugendo rurerure.

Yongeyeho ko ibikorwa remezo byakozwe nk’imihanda byongereye isuku i Nyamagabe ndetse abantu bakumva uruhare rwabo mu kugira isuku mu bikorwa byabo, tunabakangurira gukoresha ikoranabuhanga haba mu kugura ifumbire ndetse no mu bworozi bw’amatungo yabo.

Meya Niyomwungeri avuga ko umwanya bagize uzabaha gukomeza gukoresha ingufu bakoresheje bakabasha gukomeza kuba ku isonga nk’uko ubushize byabagendekeye bakaba aba mbere mu Ntara y’amajyepfo ndetse n’aba kabiri ku rwego rw’Igihugu.

Bimwe mu bipimo bishimira ko byazamutse birimo ibikorwa remezo byazamutseho 11, 2%; Serivisi zo mu butaka 14, 9%; ibikorwa bijyanye n’ikoranabuhanga byazamutseho 14, 1%; ubuzima nabwo bwazamutseho 9, 3%; serivisi z’Uburezi 17%, isuku yazamutseho 8, 5%; uburyo abaturage biyumvamo inzego z’ibanze byazamutseho 9, 3% ndetse n’ubworozi bwazamutseho 9, 3%; bivuze ko bagize amanota 81.4% muri 2023 bavuye kuri 68, 9% muri 2022 bakaba barazamutseho 12,5%.

  • AKIMANA JEAN DE DIEU
  • Gashyantare 9, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE