Nyamagabe: Barashimira Perezida Kagame wabahaye imihanda ya Kaburimbo yatangiye kubakwa

  • AKIMANA JEAN DE DIEU
  • Gashyantare 5, 2024
  • Hashize amezi 4
Image

Abatuye mu bice bitandukanye byo mu mujyi wa Nyamagabe barashimira Perezida wa Repubulika Paul Kagame wabahaye imihanda yitezweho guhindura isura y’uyu mujyi, ibaka yaratangiye kubakwa ndetse igeze ku kigero cya 70%.

Abo baturage batangarije Imvaho Nshya ko bishimira ko kuva iyi mihanda bayemerewe n’Umukuru w’Igihugu mu mwaka wa 2019 ubwo yabasuraga, hagaragara impinduka ku buzima bw’abayituriye ndetse n’abahawemo akazi.

Ngendahimana Fidele avuga ko bishimira iyubakwa ry’iyi mihanda kuko yatumye hari ibice byongererwa agaciro kandi abantu babasha kuhakorera ubucuruzi bisanzuye kuko ibikorwaremezo byarahagejejwe.

Yagize ati: “Turishimira ko barimo kutwubakira imihanda myiza ijyanye n’igihe kuko yatumye aho yanyuze hagira agaciro kandi abantu babasha kwagura ibikorwa byabo by’ubucuruzi nta kibazo bafite kuko mbere batinyaga bimwe mu bice bitari bitunganyijwe ngo binashyirwemo ibikorwa remezo bikenewe byose.”

Mukasekuru Placidie avuga ko iyi mihanda yahinduye ubuzima bw’abaturage ba Nyamagabe haba abayibonyemo akazi ndetse n’abari bahafite ibikorwa by’ubucuruzi.

Yagize ati: “Iyi mihanda twiherewe na Perezida wacu Paul Kagame yahinduye byinshi ku myumvire y’abaturage ndetse inatanga akazi ku baturage bayikoramo babona amafaranga ariko kandi ivuze byinshi ku ishoramari rikorerwa aho yanyujijwe”.

Munyabugingo Jean Marie Vianney avuga ko mbere yo kubaka iyi mihanda wasangaga ahantu hose harangwa umwanda nta muntu ubyitayeho bajugunya ibintu aho babonye ariko ubu uwajya kubikora yaba afite isoni.

Ati: “Iyi mihanda yafashije mu kubungabunga isuku kuko mbere y’uko itangira kubakwa wasangaga hari ibice byari byarasigaye inyuma cyane, kandi hahoraga umwanda ariko ubu uwajya kuwujugunya abona ko ahemuka kandi byanamutera isoni zo kubikora kuko umuco wo kugira isuku ni ngombwa”.

Ababonye akazi bavuga ko bikuye mu bukene

Rugwiro Placide ufite imyaka 26 avuga ko kuva uyu mushinga wo kubaka iyo mihanda watangira yabonyemo akazi abonamo amafaramga yo gukoresha mu bikorwa by’ubuhinzi.

Yagize ati: “Kuva uyu mushinga wo kubaka iyi mihanda watangira nabonyemo akazi mbona amafaranga mbasha kubona amafaranga yo guhingisha ubutaka bwanjye”.

Tuyishime Marie Claire w’imyaka 23 avuga ko akimara kurangiza ishuri mu mwaka wa 2022 atigeze abona akazi nyuma akakabona mu ikorwa ry’iyo mihanda.

Ati: “Nkirangiza ishuri mu mwaka wa 2022 ariko sinabona akazi, gusa kubona akazi muri iyi mihanda byatumye ntabasha kwishora mu ngeso mbi kuko nakoraga akazi kanjye gusa singire ibindi njya kwishoramo”.

Kalisa Richard we avuga ko kuva iyo mihanda yatangira gukorwa we na bagenzi be bahisemo kwaka akazi kugirango babone amafaranga kandi byabafashije kwirinda gutegera amaboko abandi babasaba.

Umuyobozi w’Akarere ka Nyamagabe, Niyomwungeri Hildebrand avuga ko bashimira Perezida wa Repubulika yu Rwanda Paul Kagame wabonye ko uyu mujyi ukwiye kubakwamo imihanda myiza ikaba irimo kubakwa igeze kuri 70%.

Ati: “Turashimira ubuyobozi bw’Igihugu cyacu burangajwe imbere na Nyakubahwa Perezida wa Repubulika Paul Kagame kuko ibi byose ni we tubikesha akaba ari nawe waduhaye iyi mihanda ubwo yadusuraga mu mwaka wa 2019 kandi twizeye ko izuzura vuba kuko duteganya ko mu kwezi kwa kane izaba yararangiye”.

Yongeraho ko iyi mihanda yahinduye ubuzima bw’abatuye mu bindi bice ndetse byanatumye babona ko isuku ikwiye, ikindi ni uko hari ibice byabaye nyabagendwa kandi bigezwamo ishoramari ku buryo abantu bahagenderera batikandagira nka mbere.

Ikindi ni uko abaturage bishimira ko nta tandukaniro riri hagati y’umujyi wa Nyamagabe n’indi mijyi kuko iyi mihanda yanatangiye kurimbishwa ariko dusaba abaturage kurangwa no kugira isuku no kurinda ibyagezweho ntibyangizwe.

Ubuyobozi bw’akarere buvuga ko imirimo yo kubaka iyi mihanda igeze ku kigero cya 70% biteganyijwe ko izuzura muri Mata 2024, ikaba ifite ibilometero 10.4 ikazatwara asaga miliyari 7 z’amafaranga y’u Rwanda.

  • AKIMANA JEAN DE DIEU
  • Gashyantare 5, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE