Nyamagabe: Babangamiwe n’umushinga w’ubukerarugendo bushingiye kuri siporo wadindiye

  • AKIMANA JEAN DE DIEU
  • Gashyantare 14, 2024
  • Hashize amezi 2
Image

Mu mwaka wa 2019, ni bwo abaturage b’Akarere ka Nyamagabe batangarijwe umushinga w’ubukerarugendo bushingiye kuri siporo batangira gushyashyana betegereje kuwubyaza umusaruro, none imyaka ikabakaba itanu utarashyirwa mu bikorwa.

Bamwe mu bavuganye n’Imvaho Nshya, bagaragaje ko bari mu bihombo kubera ko akazi bari biteze bagategereje bagaheba ndetse n’icyizere cyo guhindurira ubuzima urubyiruko binyuze mu kwakira imikino mpuzamahanga rimwe na rimwe na bo bakayigiramo uruhare mu buryo butandukanye.

Bavuga ko batazi impamvu iyo imishanga babonamo agaciro gakomeye idindira, kandi bari bazi ko ugiye kubahindurira ubuzima nk’indi mishinga yose ibegerezwa.

Mukamudenge Benilde avuga ko uyu mushinga bari baziko ugiye gutangira kuko akenshi iyo ubuyobozi buvuze ikintu kidatinda, akemeza ko bagombaga kubonamo akazi ariko bikanafasha abakiri bato kuzamura impano zabo.

Yagize ati: “Njyewe nkiri muto nakoraga siporo yo gusiganwa ku maguru ariko uyu mushinga twari tuzi ko bizahita bitangira gukorwa, natwe twari twizeye kubonamo akazi none byaranze ku buryo twagombaga no kubona aho abana bacu bazamurira impano”.

Munyampenda Protogene avuga ko imyaka ishize bamenye ayo makuru ari myinshi cyane ku buryo bumva ko impamvu zatumye umushinga udindira zitoroheje.

Yagize ati: “Hashize imyaka itanu kandi byagize ingaruka zirimo igihombo gikomeye kuko bamwe mu baturage bagombaga kubona akazi, abandi na bo bakabona abazajya babagurira ibyo bakora baje gukina kandi byagombaga no gutanga abakinnyi bahagararira Igihugu mu mikino kitabira.”

Twagirayezu Jean Paul avuga bari bishimiye ko uyu mushinga wagombaga gutuma haza abantu bakomoka ahatandukanye baje gukora ubukerarugendo kandi hakaboneka akazi ku baturage bo muri aka karere.

Yagize ati: “Twarishimye cyane hatangiye kuvugwa uyu mushinga twumvise ko akazi kabonetse kandi hazaza abantu benshi njyewe nahise ntekereza ko nakora ubucuruzi ntangira no gushaka ubushobozi muri banki, ariko nyuma umuntu angira inama ko bishobora gutinda sinayafata kandi bari bayanyemereye. Ubu mba narirutse kubera ideni rya banki nari ngiye gufata.”

Abaturage b’i Nyamagabe bategereje umushinga bari bitezeho byinshi baraheba

Umuyobozi w’Akarere ka Nyamagabe Niyomwungeri Hildebrand, yabwiye Imvaho Nshya ko mu byatindije uyu mushinga harimo no gushaka abafatanyabikorwa kandi hari abo batangiye kuganira na bo mu buryo butanga icyizere.

Yagize ati: “Ni byo dufite umushinga wo gukora siporo ishingiye ku bukerarugendo kuko twabonye byafasha abaturage bacu, ariko turacyavugana n’abashoramari bagomba kudufasha kuko twabonye ko uyu mushinga uzadusaba ingufu zifatika zo kuwushyira mu bikorwa kandi hari abo turimo kugirana ibiganiro kugira ngo tuzafatanye kuwushyira mu bikorwa.”

Akomeza avuga ko hari ibice byamaze guteganywa ko byashyirwamo imwe mu mikino itekerezwa ariko hari n’ibice byo mu Murenge wa Gasaka no mu Murenge wa Cyanika.

Yagize ati: “Muri uyu mushinga duteganya ko hari bimwe mu bice byo mu Mirenge yavuzwe haruguru bizashyirwamo ahashora gukoreshwa n’abatwara amagare yo mu misozi, kuzamuka imisozi hakoreshejwe imigozi, kuzamuka imisozi n’amaguru abenshi bazi nka “Hiking” ariko kandi twanatekereje ko hakoreshwa utumodoka tuzamukira ku migozi turacyategkereza n’ibindi hagamijwe kunonosora neza umushinga.”

Yongeyeho ko uyu mushinga nutangira uzafasha abaturage kubona akazi n’amafaranga kuko hazakorwamo byinshi ariko kandi abakiri bato n’abakuru bose bazabasha kubona amahirwe bakazamura impano zabo.

Yijeje ko bagiye gukora iboshoboka byose kugira ngo ishyirwa mu bikora ry’ibikorwa mbanziriza mushinga byihutishwe.

Ubusanzwe Akarere ka Nyamagabe gasanzwe gafite ibikorwa by’ubukerarugendo gahuriyeho n’Uturere twa Nyaruguru, Nyamasheke na Rusizi, bakaba rero babona ko bongeyeho n’ibindi byafasha mu kuzamura ubukerarugendo n’ibindi bikorwa byafasha abaturage kwiteza imbere.

Kugera ubu Akarere ka Nyamagabe kagira ikipe y’umupira w’amaguru yitwa “Amagaju” ikina mu irushanwa ry’Icyiciro cya Mbere mu Rwanda, ikaba iri ku mwanya wa karindwi n’amanota 26 mu mwaka w’imikino wa 2023-2024.

  • AKIMANA JEAN DE DIEU
  • Gashyantare 14, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE