Nyagatare: Hitezwe ibagiro rizajya ribaga inka 200 ku munsi

  • KAYITARE JEAN PAUL
  • Mutarama 9, 2024
  • Hashize amezi 2
Image

Ababaga inka n’abacuruza inyama mu Karere ka Nyagatare mu Ntara y’Iburasirazuba, babwiwe ko mu mezi 6 nta rindi bagiro rizaba ryemewe mu Mujyi wa Nyagatare uretse iry’Akarere ryonyine.

Basabwe kubahiriza ibijyanye n’ubuziranenge bw’inyama bagurisha. Babigaragarijwe mu bukangurambaga bushingiye ku ruhererekane nyongeragaciro rw’inyama.

Abarebwa n’ubucuruzi bw’inyama, Akarere ka Nyagatare kabagaragarije ko mu kwezi kwa gatandatu 2024 ibagiro ririmo kubakwa rizaba rifite ubushobozi bwo kubaga inka 200 ku munsi, rizatangira gukorerwamo.

Ku rundi ruhande, Ikigo cy’Igihugu Gishinzwe Ubugenzuzi bw’Ubuziranenge, ihiganwa mu bucuruzi no kurengera umuguzi (RICA) cyavuze ko icyo gihe ucuruza inyama azaba asabwa kuzuza ibipimo by’ubuziranenge bisabwa birimo gukonjesha inyama nibura amasaha 24 mbere yuko zigurishwa.

Ababazi n’abagurisha inyama bahamirije RBA ko imyiteguro babigeze kure.

Umwe mu bacuruzi yagize ati: “Icyo badusabye cya mbere aho ducururiza inyama, ni ugukuramo bya biti twatemeragaho inyama tukagura imashini, tukazana amafirigo meza ajyanye n’uburyo bwiza bwo gukoresha inyama hanyuma bakaduha ibyangombwa ku buryo busheri zacu zizaba ziri ku rwego rwiza kandi inyama dutanga zikazaba zifite ubuziranenge”.

Kalisa Geofrey we yagize ati “Ntekereza ko n’ibyo ubuyobozi budusaba, ari ibyo byo gusaba ibyangombwa kugira ngo tube ducururiza ahantu hemewe, tuzagera muri icyo gihe ibisabwa byose tubyujuje kugira ngo tuzajye gukorerayo”.

Ku rundi ruhande ariko ngo bashorwa mu bihombo n’abagurisha inyama ku buryo butemewe n’amategeko, bagasaba ko bakumirwa na mbere yo kuzimurirwa mu ibagiro rishya.

Gishayija Steven yagize ati: “Ugasanga umuntu abagiye mu ifamu ajyanye inka aracuruje, ugasanga umuntu afite inyama atazi n’ahantu zaturutse atangiye kujyana mu maresitora n’ahandi hantu hose, twebwe abantu twakoze muri ubwo buryo bwemewe dusigara mu bihombo”.

Mukabagire Evelyne, Umuyobozi w’ishami rishinzwe gutanga ibyangombwa mu kigo RICA, avuga ko ikindi kigomba gukorwa ari ugufasha abakorera ubucuruzi bw’inyama kure y’ibagiro rishya, kubaka amabagiro mashya, akavuga ko ubuziranenge bw’inyama bugomba kwitabwaho mu gihe ibagiro rishya ritaruzura.

Ati: “Ni ibyiciro bine, hari ibagiro rinini, iriciriritse, iritoya hari n’ibagiro ryubakwa ahororerwa ryemewe gusa ku nkoko.

Ni ukuvuga ngo nkorera Leta, uriya ni umucuruzi w’inyama uriya akorera urundi rwego ariko ikintu kimwe duhuriyeho ni uko turi abaryi b’inyama, twese turi abaguzi bazo.

Rero twe kureba ku nyungu zacu nk’abacuruzi b’inyama ahubwo mbere na mbere dushyire imbere umuguzi”.

Umuyobozi w’Akarere ka Nyagatare wungirije ushinzwe Iterambere ry’Ubukungu Matsiko Gonzague, avuga ko kubaka ibagiro rishya bigeze ku kigero cya 80% mu gihe abacuruza inyama bitemewe bihanangirizwa na mbere yo gufatirwa ibihano.

Ati: “Ubungubu rigeze hejuru ya 80% ku buryo bitarenze ukwezi kwa Kamena 2024 ibagiro rizaba ryamaze kuzura, ubu noneho turi no muri gahunda yo gushaka rwiyemezamirimo uzakoresha ririya bagiro.

Uwabagiraga ahandi hatari kuri ayo mabagiro, yakoraga ibintu bitemewe. Iyo twababonaga twabahanaga, icyo rero twababwira ni uko ibyo barimo bakora bitemewe kandi bihanwa n’amategeko”.

Mu karere ka Nyagatare habarurwa amabagiro 3 afatwa nk’amanini ariko kugeza ubu ntiyujuje ibyangombwa bisabwa.

  • KAYITARE JEAN PAUL
  • Mutarama 9, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE