Nyagatare: Gatunda barishimira ko begerejwe isoko rya Muhambo

  • NSHIMIYIMANA FAUSTIN
  • Ugushyingo 24, 2023
  • Hashize amezi 3
Image

Bamwe mu baturage barishimira isoko rito rya Muhambo begerejwe kuko bajyaga bahura n’imbogamizi zo kuba nta soko ryubakiye bagiraga mu gihe cy’imvura bakanyagirwa no mu zuba bakabura aho baryugama, ariko kuri ubu barashimira Leta yabubakiye isoko ryiza.

Abatuye mu Kagari ka Nyangara mu Murenge wa Gatunda bavuga ko isoko begerejwe rije rikenewe kuko mbere bahuraga n’ibihombo biterwa no kudacuruza amasaha yose ndetse no kubura abakiliya kuko batazaga gucuruza mu gihe imvura yaguye ngo kuko batinyaga kujya mu byondo bityo ntibabone ababagurira.

Nyirashyirambere Vestine ni umucuruzi, yavuze ko baburaga aho bacururiza mu bihe by’imvura dore ko ngo yabatunguraga ikabangiriza ibicuruzwa bityo bagahita bahura n’ibihombo.

Yagize ati: “Twaburaga aho ducururiza tukadandaza ibicuruzwa byacu twajya kubona tukabona imvura irakubye iraguye, tugahita tujya kuyugama mu ngo zacu. Hari ibicuruzwa byangirikiraga mu kwanura vuba na vuba, yahita tukagaruka gucururiza mu ijandwe dutegereje abakiliya ndetse haba hari ubwo ubabuze kubera gutinya icyondo. Urumva ko kubona umusoro n’inyungu kandi utacuruje byadutezaga igihombo”.

Nyirashyirambere yakomeje avuga ko iri soko rigiye kubafasha gucuruza nta nkomyi bakiteza imbere.

Yagize ati: “Tuba mu matsinda yo kwizigama kuba rero Leta idukunda yatwegereje isoko tugiye kongera igishoro kuko ducururiza ahantu heza tutazajya dukangwa n’ibihe bidufashe kubona inyungu no guteza imbere imiryango yacu.”

Niyonsaba Claudine nawe yagize ati: “Imboga n’imbuto byicwaga n’izuba bikaduteza igihombo kandi nabwo mu gihe cy’imvura tukabura abakiliya ugasanga ibiciro biragabanyutse kubera gutakaza imwimerere w’ibicuruzwa byacu ariko rino soko ryubakiye riri kudufasha cyane kuko imbogamizi twahuraga nazo zo kujyana ibicuruzwa mu rugo mu gihe imvura iguye no kubura abakiliya byarakemutse. Ubu ibicuruzwa byacu tubiraza mu isoko kubera ko twishyura abashinzwe umutekano bakabirinda. Dushima igihugu kidukunda kikumva ibibazo n’ibyifuzo tuba twatanze”

Umuyobozi w’Akarere ka Nyagatare wungirije ushinzwe Iterambere ry’Ubukungu, Matsiko Gonzague yavuze ko bishimiye kuba abaturage barifuje kenshi isoko ariko kuri ubu rikaba rimaze hafi icyumweru ritangiye gukorerwamo bityo bagomba kuribungabunga bakarushaho kwiteza imbere ndetse ngo hari na gahunda yo kubagezaho ibindi bikorwa remezo.

Yagize ati: “Abaturage bagiye batugezaho ibyifuzo turi mu nteko z’abaturage n’inama zitandukanye, ariko uyu munsi twishimiye ko babonye ahantu heza ho gucururiza no kugurira. Igihugu gikunda abaturage bacyo nta kintu cyiza kandi kinejeje nko kubona abaturage bishimira ibikorwa remezo n’iterambere bagezwaho gusa kubona umuturage ubabaye nabyo bituma Inzego z’ibanze dukora twumva dufitiye abaturage ideni. Gusa natwe turashimira Perezida wa Repubulika udufasha kubakira ibikorwa remezo abaturage bakiteza imbere. Kuba iri soko ryaje rero mwumve ko imbaraga zazanye iri soko, amashanyarazi n’amazi hano n’ibindi bikorwa bizabageraho.

Ubuyobozi bw’Akarere ka Nyagatare butangaza ko isoko rito rya Muhambo ryubatswe ku bufatanye n’umushinga Food for the Hungry Rwanda, aho ryuzuye ritwaye miliyoni 38 z’amafaranga y’u Rwanda.

  • NSHIMIYIMANA FAUSTIN
  • Ugushyingo 24, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE