Nyagatare: Barashima Leta ibafasha kurwanya uruhumbu mu myaka

  • NTAWITONDA JEAN CLAUDE
  • Werurwe 30, 2022
  • Hashize imyaka 2
Image

Abahinzi bibumbiye mu makoperative y’ubuhinzi mu Karere ka Nyagatare bavuga ko kuba Leta yarabegereje ibikorwa remezo bakanahabwa ubumenyi byabafashije kurwanya uruhumbu.

Umuhinzi wo muri Koperative  CODPCUM, Nzabonankura Bernadette  utuye mu Murenge wa Mukama mu Karere ka Nyagatare yavuze ko amahugurwa bahawe abafasha gufata neza umusaruro.

Yagize ati: “Twiga kwirinda uruhumbu mu bigori kuko ni uburozi, amahugurwa twahawe na MINAGRI binyuze mu Kigo cy’Igihugu gishinzwe iterambere ry’Ubuhinzi n’Ubworozi (RAB) na AIF yaduhaye ubumenyi budufasha kwita ku bigori guhera tugihinga kugeza dusaruye n’uburyo bwo kubirinda uruhumbu”.

Yongeyeho ko mbere ataraza muri Koperative yezaga Kilogarama 300 kuri kimwe cya kabiri cya Hegitari , ariko ubu yezaho Toni.

Perezida wa CODPCUM Semakura Cyprien yavuze ko ubumenyi bungutse bwabafashije kuzamura umusaruro no kuwufata neza bawurinda uruhumbu.

Ati: ” Ubumenyi twungutse ni ubujyanye no kurinda uruhumbu (aflatoxine) mu musaruro w’ibigori, twize uko umuntu yita ku bigori guhera bihinzwe kugeza bisaruwe. Twirinda kubishyira ahari ubukonje. Hubatswe ubwanikiro n’ubuhunikiro bya kijyambere”.

Yavuze kandi ko umusaruro wagiye wiyongera, aho mu 2018/2019 bari kuri Toni 250, mu 2020 basaruge Toni 500, mu 2021 basaruye Toni 678.

Kagwa Evalde uyobora RAB ishami rya Nyagatare mu kiganiro n’abanyamakuru

Kagwa Evalde uyobora ishami rya RAB Nyagatare rikorera mu Turere twa Nyagatare na Gatsibo yavuze ko Abahinzi bakanguriwe kurwanya uruhumbu mu myaka kuko biteza ingaruka ku buzima.

Yagize ati: “Urwo ruhumbu uko rukura rukora uburozi, (aflatoxine) bubi butera kanseri. Buriya iyo umuntu ariye itungo ryagaburiwe ibigori birimo uruhumbu, uririye na we arya bwa burozi bwaturutse mu bigori, ni yo mpamvu rero Leta ibinyujije muri MINAGRI yahagurukiye gusobanurira abahinzi impamvu ari ngombwa gufata neza umusaruro n’umuhinzi ntagire igihombo, ahubwo akabona amafaranga”.

Amafaranga y’u Rwanda agera kuri miliyari na miliyoni 200 yatanzwe na MINAGRI mu Karere ka Nyagatare yakoreshejwe mu bikorwa remezo nk’ubwanikiro, ubuhunikiro, imashini zumisha umusaruro hagamijwe kurwanya uruhumbu.

Umuyobozi w’ishami rya RAB Nyagatare yavuze ko umusaruro wose bitavuze ko uruhumbu rutabamo kugera kuri zeru, ahubwo uruhumbu rugabanywa ku kigero cyo hasi gishoboka cyemejwe n’impuguke, aflatoxine ikaba iri ku rwego itabasha gutera indwara.

Yatanzwe urugero ko nko mu bilo miliyari ibigori birimo uruhumbu bitagomba kurenza ibilo 4, mu by’ukuri ni ibilo 4 mu kinyamiliyari, ni duke cyane ntitwashobora gutera indwara.

Yongeyeho ko kwigisha bihoraho akaba ari yo mpamvu abakozi ba MINAGRI bakomeza kwigisha abahinzi kugira ngo barusheho kongera umusaruro ari na ko bawufata neza birinda igihombo cyavuka nyuma yo gusarura.

Uyu muhinzi Nzabonankura Bernadette avuga ko basobanukiwe uburyo bwo gufata neza umusaruro bakawurinda uruhumbu (Foto Nyiraneza J.)
Perezida wa CODPCUM Semakura Cyprien

  • NTAWITONDA JEAN CLAUDE
  • Werurwe 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE