Nyabihu: Uruganda rw’ifiriti rumaze imyaka 7 rudakora rugiye kuzanzamuka

  • Imvaho Nshya
  • Ugushyingo 13, 2023
  • Hashize amezi 7
Image

Ubuyobozi bw’Akarere ka Nyabihu bwatangaje ko Uruganda ‘Nyabihu Potato Company’ ruherereye mu Murenge wa Mukamira, rushobora gutangira gukora mu minsi mike iri imbere nyuma y’imyaka 7 rumaze rusinziriye.

Ni uruganda rwuzuye rutwaye amafaranga y’u Rwanda asaga miliyoni 780 mu mwaka wa 2016, rukaba rwarongerewe n’izindi miliyoni zisaga 500 mu mwaka w’ingengo y’Imari ya 2019-2020 kugira ngo rutangire gukora imirimo yarwo yitezweho amahirwe menshi ku baturage no ku gihugu muri rusange.

Icyo gikorwa remezo gitanga icyizere gihanitse cyo kongerera agaciro umusaruro w’ibirayi ku buryo ushobora kugera ku isoko mpuzamahanga ufite ibirango by’uko watunganyirijwe mu Rwanda.

Icyo cyizere cyatangiye kuyoyoka ubwo rwahagararaga kwezi kwa Kanama mu 2016 nyuma y’amezi make rutangiye gukora, bivugwa ko umusaruro rutunganya urenze ukenewe ku isoko ariko ikibazo cyaje kurenga icyo kuko kuri ubu hashize imyaka irindwi rudakora, nyamara ku isoko ry’u Rwanda haboneka ifiriti zongerewe agaciro ziva mu mahanga.

Abahinzi b’ibirayi bo mu Karere ka Nyabihu bavuga ko kuba rumaze imyaka 7 rudakora byadindije iterambere ryabo, kuko igihe gito rwamaze rukora rwari rufite ubushobozi bwo gutonora (guhata) no gukata ibirayi bibarirwa hagati ya toni 5-10 ku munsi.

Abo baturage bavuga ko bari batangiye kubonamo imirimo no kugemura umusaruro, bityo bakaba bifuza ko rwakongera kuvugururwa, cyangwa inyubako zarwo zigahabwa rwiyemezamirimo ushoboye kuzibyaza umusaruro.

Semana Norbert wo mu Murenge wa Mukamira yagize ati: “Twarishimye tubonye uru ruganda ruje gukorera ino,  rufite intego yo kongerera agaciro umusaruro w’ibirayi. Ibi bintu byari byiza cyane ariko nyuma y’igihe gito n’umwaka utari washira hatangiye kuvukamo ibibazo ngo imashini nta bushobozi zifite, bagakora umunsi umwe, bigeze aho bihagarara burundu.”

Akomeza agaragaza uburyo akimara kumva ayo makuru yagannye banki akaka inguzanyo, yatisha imirima kuko yumvaga abonye isoko rirambye ry’umusaruro w’ibirayi bya Kinigi.

Amahirwe ngo ntiyamusekeye kuko byarangiye ahombye, bityo akaba asaba inzego bireba kwihutisha gahunda yo kurufungura kugira ngo we na bagenzi be bahinga ibirayi bongere kubona akanyamuneza ko guhingira isoko bizeye.

Uwamariya Denise wari wabonyemo akazi, ashimangira ko bari mu gihombo gikomeye kubera urwo ruganda rutagikora, bikaba bifite ingaruka zikomeye no kuri we n’abandi bari babonyemo akazi baturutse mu bice bitandukanye by’Igihugu.

Uwamariya Denise yabonye akazi muri uru ruganda, ruhita rufunga imiryango

Yagize ati: “Uru ruganda cyari igisubizo ku bashomeri, nkanjye nakoragamo nshinzwe gupakira amafiriti no kuyateka. Nari mfite umushahara, nari natangiye ubwizigame mbinyujije mu kimina na bagenzi banjye ubu byarahagaze. Urumva ko twahombye kimwe n’abari bafite inzu zikodeshwa hano babuze abakiliya babo, abahinzi bo sinavuga kuko uru ruganda ubwo rwafunguraga ikirayi cyahise gifatwa nk’ikawa muri Nyabihu.”

Yakomeje avuga ko biteye isoni gukomeza kwitirirwa uruganda rukora ifiriti kandi mu by’ukuri rwarahindutse baringa, ati: “Ibi na byo bisaba ko Perezida agira icyo abivugaho kuko yavuze ku bijyanye n’uruganda rw’amata rwa Mukamira bucya rufungura. N’ibi rero azabikoreho muzamutubwirire.”

Umuyobozi w’Akarere ka Nyabihu Mukandayisenga Antoinette, avuga ko idindira ry’uruganda ryagiye riterwa n’impamvu zinyuranye harimo ibura ry’imashini zujuje ubuziranenge, ariko  kuri ubu ngo zarabonetse ku buryo mu  minsi mike rugiye gusubukura imirimo yarwo.

Yagize ati: “Habayeho ikibazo cy’imashini zitari zijyanye n’uruganda nyirizina, kuri ubu hatumijwe izindi ndetse barangije kuzishyira mu ruganda. Ikibazo ni uko nanone harimo guhugurwa abazazikoresha, mu minsi iri imbere uruganda ruraba rwafunguye. Gusa sinzi neza igihe, ngiye kuganira n’abayobozi b’uru ruganda mbone icyo nzatangariza abo bose bafite ikibazo ku bijyanye n’iterambere rwari rubazaniye, kandi koko birumvikana uruganda ni iterambere”.

Raporo y’Umugenzuzi Mukuru w’Imari ya Leta (OAG) y’umwaka wa 2021-2022, yagaragaje ko uruganda Nyabihu Potato Company’ ari rumwe mu nganda ebyiri zari zaradindiye zahawe ingengo y’imari irenga miliyari imwe na miliyoni 500 mu 2019-2020 ariko kugeza ubu rwo rukaba rutarakora.

Ubuyobozi bw’Ikigo cy’Igihugu cy’Ubushakashatsi n’Iterambere mu byerekeye Inganda (NIRDA), buvuga ko hari imashini nshya yaje muri urwo ruganda guhera mu mwaka wa 2020, ariko abatekinisiye b’ikigo Amber cyayikoze batinda kuza kuyishyigikira no guhugura abakozi kubera icyorezo cya COVID-19 cyahagaritse ingendo mpuzamahanga.

Kuri ubu, bivugwa ko abo batekinisiye baje bakaba bahugura abo mu Rwanda bazarukoresha. Uru ruganda rwatangiye kubakwa mu mwaka wa 2012 rutahwa ku mugaragaro mu 2016, kuva icyo gihe abaturage bavuga ko rutigeze rukora ngo rurenze amezi 6.

Umuyobozi w’Akarere ka Nyabihu Mukandayisenga Antoinette

NGABOYABAHIZI PROTAIS

  • Imvaho Nshya
  • Ugushyingo 13, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE