Nyabihu: Umushinga ‘Kungahara’ witezweho gufasha abahinzi

  • KAYITARE JEAN PAUL
  • Werurwe 18, 2024
  • Hashize ibyumweru 4
Image

Bamwe mu bahinzi mu Karere ka Nyabihu mu Ntara y’Iburengerazuba bavuga ko ikibazo cy’umusaruro wabo wangirikaga ku kigero cya 40% cyavugutiwe umuti. Ni mu gihe Akarere ka Nyabihu kavuga ko hari ingamba zirimo gushyirwa mu gukemura iki kibazo babifashijwemo n’abafatanyabikorwa.

Abahinga imbuto z’ibirayi ndetse n’imboga bavuga ko bajyaga bahura n’igihombo cyo gutakaza umusaruro wabo mu gihe cyo gusarura, kuwuhunika ndetse n’igihe cyo kuwugurisha.

Hakuzimana Serugendo Jotham, umuhinzi wo muri Nyabihu, yabigarutseho ubwo hamurikwaga umushinga ‘Kungahara’ ndetse n’ibikorwa uzageza ku bahinzi b’imboga, imbuto n’ibirayi.

Yagize ati: “Twajyaga dutakaza umusaruro mu gihe cy’isarura ariko hano hari umushinga bita ‘Kungahara’ uje kudufasha gukomeza kurinda umusaruro wacu, no kuwubungabunga. Umusaruro wacu watakaraga ku kigero cya  40% kuri ubu rero ndizera ko ubutaka bwacu buzakorerwa ubushakashatsi”.

Nyirimanzi Jean Pierre, Umukozi w’Akarere ka Nyabihu ushinzwe ubuhinzi, agaragaza ko umushinga ‘Kungahara’ uje mu Karere utazahera ku busa kuko ngo abahinzi bafite ikigero bamaze kugeraho mu rwego rw’ubuhinzi.

Ati: “Icyo twiteze kuri uyu mushinga kandi gikomeye, ni uko uzafasha abahinzi kunoza ibyo bakoraga  ndetse hakiyongeraho n’ibindi bikorwa byo gufasha abahinzi kubona isoko ry’umusaruro wabo kimwe  no kugabanya umusaruro utakara mu buryo bunyuranye, uyu munsi rero navuga ko uyu mushinga uziye igihe.”

Rugamba Eddy Frank, Umuhuzabikorwa w’umushinga ‘Kungahara’, avuga ko kimwe mu bisubizo umushinga ahagarariye uzatanga, harimo kuba abahinzi bazungukiramo ubumenyi buzatuma babasha gufata neza umusaruro wabo ndetse ukabagirira akamaro.

Ati: “Umushinga mu gihe cy’imyaka 3 uzafasha abahinzi bo muri Musanze na Nyabihu kongera umusaruro cyane cyane ku bahinga ibirayi, imbuto n’imboga. Muri utu Turere, hibandwa cyane ku buhinzi bubungabunga ibidukikije tutibagiwe no kwihaza mu biribwa.

Tubyibandaho kubera ko ibi biribwa biboneka muri utu Turere, hari byinshi bigitakara kubera hari ko ubwo umusaruro w’umuhinzi utakara ku kigero cya 30% cyane nko ku mboga n’imbuto. Ubu rero turateganya kubashyiriraho uburyo bwo kubungabunga umusaruro wabo binyuze mu ikoranabuhanga ribika umusaruro mwinshi utangiritse”.

Mu Karere ka Nyabihu abagera kuri 70% bakora ubuhinzi n’ubworozi. Ibirayi bihingwa kuri hegitari 9,242 mu gihembwe A, mu gihe mu gihembwe cya B ibirayi bihingwa ku buso bwa hegitari 1,746 mu Mirenge 8 ku mirenge 12 igize Akarere ka Nyabihu. Imboga zihingwa kuri hegitari 450, imbuto zo bibanda ku binyomoro bihingwa kuri hegitari 720.

Umushinga ‘Kungahara’ uzakorera mu Turere 2; Nyabihu na Musanze. Uzakorana n’amakoperative ndetse n’abantu ku giti cyabo bakora ubuhinzi bw’imboga n’imbuto, harimo kandi n’ubundi buryo hazajya higishwamo abaturage gukomeza gutegura indyo yuzuye.

Inzego zitandukanye zitabiriye imurikwa ry’umushinga ‘Kungahara’
Rugamba Eddy Frank, Umuhuzabikorwa w’umushinga ‘Kungahara’
  • KAYITARE JEAN PAUL
  • Werurwe 18, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE