Nyabihu: Ivuriro ry’Ingoboka rya Kabatwa ryabakijije kwiyahuza imiravumba

  • Imvaho Nshya
  • Ukwakira 9, 2023
  • Hashize amezi 8
Image

Abaturage bo mu Murenge wa Kabatwa, Akarere ka Nyabihu bavuga ko nyuma yo guhabwa ivuriro ry’Ingoboka rya Kabatwa  baciye ukubiri no kwivura bakoresheje ibyatsi, ndetse bibagabanyiriza urugendo bakoraga bajya gushaka serivisi zo kwivuza  mu Turere twa Rubavu na Musanze.

Aba baturage bavuga ko bakoraga ingendo z’ibilometero bisaga bisaga 15 bajya gushaka serivisi zo kwivuza, ariko ngo abo byagoraga cyane ni abo mu Kagari ka Gihorwe, Umudugudu wa Kaminuza.

Muri ako Kagari ngo bari barahisemo kwiyahuza  imiravumba, imibirizi n’ibindi bimera bajyaga guhamura mu ishyamba ry’ikirunga cya Kalisimbi.

Uwimana Jean Damascène yagize ati: “Kuba nkatwe abatuye ku ishyamba twajyaga turwara tukinywera ibyatsi twabaga twahamuye mu ishyamba rimwe na rimwe twamara kuremba bakadukubita mu ngobyi ya Kinyarwanda bakatujyana ku Bitaro bya Gisenyi muri Rubavu, cyangwa se abifite bagafata moto ikabageza ku muhanda wa kaburimbo Rubavu-Musanze bagafata imodoka ikabajyana kwivuza i Musanze mu bilometero nka 20.”

Uwimana akomeza avuga ko kunywa imiravumba n’imibirizi byari byarabazahaje ndetse ngo bamwe bajyaga babeshyera bagenzi babo ko babaroga kubera ko hari ubwo inzoka zabazahazaga inda zikabyimba bakavuga ko ari amarozi ibintu ngo byakururaga inzangano mu miryango.

Abaturage baravuga ko batacyiyahuza imiravumba kubera ivuriro ry’ibanze rya Kabatwa

Mukamugema Dancille we asanga ababyeyi bararahutse imvune zo kubyarira mu ngo kimwe no kujya mu ngobyi ya Kinyarwanda cyane ko kuri ubu bafite n’imbangukiragutabara.

Yagize ati: “Ubundi mbere twakoraga ingendo ndende tujya kwivuza Gisenyi biduhenze kuko twatangaga asaga ibihumbi cumi na bitanu, nka twe ababyeyi rero ubu twararuhutse kuko ubu nta mubyeyi ukibyarira mu rugo cyangwa se ngo apfe azize inda ya nyuma. Na bwo wasangaga tumuhata imiti ya Kinyarwanda ngo iya nyuma ibe yaza tukamutindana kugeza apfuye. Ubu dusigaye tubonera n’inkingo z’abana bacu hafi kimwe na gahunda yo kuringaniza urubyaro, iri  vuriro ni ingenzi cyane kuri twe”.

Umuyobozi w’Akarere ka Nyabihu Mukandayisenga Antoinette, nawe ashimangira ko ririya vuriro ry’ibanze ryatumye serivisi zo kwivuza abaturage bahabwa zibageraho mu buryo bworoshye kandi bituma birinda kwivuza magendu cyangwa se gutungwa n’ibyatsi  bibangiriza ubuzima. Asaba abaturage gukomeza kugana ivuriro birinda kurembera mu ngo.

Yagize ati: “Ivuriro ry’Ingoboka rya Kabatwa ni igisubizo kuri serivisi z’ubuzima, kuko ibi byabarinze kurembera mu ngo kimwe n’urugendo rurere bakoraga bajya gushaka serivisi yo kwivuza. Ndabasaba rero gukomeza kwitabira  Mitiweli bakayitangira ku gihe, bibarinda kwiganyira kugana amavuriro, ikindi kandi bazirikane ko imiyoboree myiza ya Nyakubahwa Paul Kagame ari yo yatumye babona ririya vuriro”.

Ivuriro ry’Ingoboka rya Kabatwa ryafunguye imiryango muri Kanama 2017, ryakira abaturage bari hagati ya 50-100 ku munsi rikaba ryita ku baturage basaga ibihumbi 15 bo mu Tugari tune two mu Murenge wa Kabatwa.

NGABOYABAHIZI PROTAIS

  • Imvaho Nshya
  • Ukwakira 9, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE