Nyabihu: Ikoreshwa ry’imbuto gakondo y’ibirayi ritubya umusaruro ukanangirika byoroshye

  • NGABOYABAHIZI PROTAIS
  • Werurwe 14, 2024
  • Hashize ukwezi 1
Image

Bamwe mu bahinzi bo mu Karere ka Nyabihu bavuga ko bahura n’igihombo bitewe n’uko umusaruro wagabanyutse ndetse n’ubonetse ukababorana ku buryo bworoshye. Inzego zishinzwe ubuhinzi mu Karere zo zikavuga ko biterwa no guhinga imbuto gakondo.

kubera ubutaka bwabo bumva ko bushobora kuba bufite ikibazo, bityo bakaba banasaba inzego bireba ko hakorwa ubushakashatsi ku butaka bwabo, hakarebwa impamvu umusaruro wabo ugenda ugabanyuka ubundi ukangirika.

Mu bihombo aba baturage bavuga harimo no kuba imyaka iyo yeze ibora vuba cyane ku bahinzi b’ibirayi, ubundi bimwe bikera nabi nk’uko Hakizimana Serugendo Jotham wo mu Murenge wa Mukamira abivuga.

Yagize ati: “Kuri ubu dufite ikibazo cyo kuba ubutaka bwacu bushobora kuba bushaje cyangwa se butakiberanye na bimwe mu bihingwa duhingaho. Njye ndavuga ku buhinzi bw’ibirayi cyane cyane ko ari bwo nkora, ubu rero muri iyi minsi urasarura ibirayi hashira nk’icyumweru bikabora, ubundi watera imbuto ikazamuka yagera hejuru ikabora, aha navuga nk’ubutaka bwo ku Kabatwa, ibirayi by’aho ntibipfa kubora, ariko nko muri Mukamira  hano birabora dukeneye ubushakashatsi tukaba twamenya amazi n’imyunyu biri mu butaka kugira ngo tumenye imbuto twateramo n’igihe twaterera.”

Mukandinda we akomeza avuga ko ngo hari igihe basarura imyaka ahantu aha n’aha ugasanga harimo igihombo.

Yagize ati: “Ushobora kweza toni 10, ariko kubera ko ubutaka bwacu harimo ahantu hakonja cyangwa se hashobora kuba harimo amazi menshi, ari yo mpamvu nifuje ko ubutaka bwacu bwazapimwa mpereye nko ku birayi ushobora kugeza toni 1 ku bubiko (depo) ugasanga habozemo nk’ibilo 400, bityo ukaramura 600 nkandi wari wasaruye toni, ibi rero bigaragaza igihombo”.

Kuri iki kibazo cyo kuba ubutaka butera igihombo gitewe n’imiterere yabwo ubuyobozi bw’Akarere ka Nyabihu bwo butangaza ko bishobora kuba biterwa na bamwe mu bahinzi bahinga imbuto za gakondo zigenda zisaza ntizitange umusaruro nk’uko Nyirimanzi Jean Pierre, Umukozi w’Akarere ushinzwe ubuhinzi abivuga.

Yagize ati: “Ibi bikomoka ku mikoreshereze y’imbuto hari uduce tumwe bazakubwira ko baboza ibirayi, abo baracyakoresha imbuto zishaje zitakoreweho ubushakashatsi na RAB, ibyo turimo gukora rero ni ugukomeza ubukangurambaga haterwa imbuto hakurikijwe imiterere y’ahantu kuko nko muri iyi Mirenge bakubwira; bamwe mu bahinzi bataka icyo gihombo ni ahantu hatari abatubuzi, turimo kubafasha kandi kubona imbuto z’indobanure.”

Kugeza ubu mu Karere ka Nyabihu ibirayi mu gihembwe cy’ihinga A bahinze kuri hegitari zigera ku 9242, mu gihe mu gihembwe B byazamutse bikagera kuri hegitari 1746.

 

Umukozi w’Akarere ka Nyabihu ushinzwe ubuhinzi, Nyirimanzi Jean Pierre
Umwe mu bahinzi b’ibirayi mu Karere ka Nyabihu
  • NGABOYABAHIZI PROTAIS
  • Werurwe 14, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE