Nyabihu: Ikigo nderabuzima cyagezwagaho imiti ku mutwe cyahangiwe umuhanda

  • NGABOYABAHIZI PROTAIS
  • Ukuboza 27, 2023
  • Hashize amezi 5
Image

Abagana Ikigo Nderabuzima cya Nyakiriba giherereye mu misozi yo mu Murenge wa Rugera, Akarere ka Nyabihu, biruhukije nyuma y’uko hatangiye guhangwa umuhanda w’ibilometero 5.8 uzajya worohereza abahivuriza n’abahageza imiti.

Icyo kigo nderabuzima cyubatswe mu mwaka wa 1986 giherereye mu bilometero birenga 5 uvuye ku muhanda Musanze-Vunga na wo utarashyirwamo kaburimbo, bityo kubera ko ari mu misozi hakaba nta n’umuhanda wageragayo, imiti yagezwaga ku ivuriro yikorewe ku mutwe.

Bivuze ko yagezwaga mu kabande ahari umuhanda aho imodoka yabashaga kugera maze hagashakwa abayikorera ku mutwe, bigatuma imwe ipfa cyangwa ikangirika.

Uretse imiti, n’abarwayi bajyaga kuhivuriza wasangaga bahagorerwa cyane kuko udashoboye kwijyana yahekwaga mu ngobyi akanyuzwa mu kayira kuzuye ibinogo na ko kabaga gateje inkeke abakanyuramo cyane cyane mu bihe by’imvura.

Bamwe bavuga ko hari igihe bahakuraga imvune ndetse n’abarwayi bakabageza ku ivuriro barushijeho kuremba kubera kugenda babacugusa mu ngobyi ya kinyarwanda.

Umuhanda Tubungo-Nyakiriba ufite uburebure bw’ibilometero 5.8, ukaba witezweho kuzuzura utwaye miliyari 2 na miliyoni 198 z’amafaranga y’u Rwanda nyuma yo gutsindagirwa, gushyirwamo laterite ndetse np gukorerwa imiyoboro y’amazi ku mpande.

Abaturage bajya gusaba serivisi zo kwivuza ku Kigo Nderabuzima cya Nyakiriba bavuga ko uwo muhanda uje kuborohereza ingendo bakoraga bajya kwivuza no gusura abarwayi n’abarwaza.

Theogene Uwimana yagize ati: “Ubwo batangiye gukora umuhanda Tubungo-Nyakiriba ni igikorwa cy’indashyikirwa, iyo twafatwaga n’indwara ntibyatworoheraga gupfa kugera ku Kigo Nderabuzima cya Nyakiriba, abantu barembera mu ngo kubera kubura uburyo bagera kwa muganga.”

Yakomeje avuga ko kuba nta muhanda byatumaga imbangukiragutabara itabasha kuza gutwara umurwayi ku ivuriro, ari na yo mpamvu hifashishwaga Ingobyi za kinyarwanda.

Yemeza kandi ko bajyaga bagorwa no kwita ku dusibanzira bataba ibinogo, kugira ngo bajye babasha kubona aho banyura batwaye umurwayi mu mujishi, ngo habaga n’ubwo bashyiraga ibiti ku biraro bigenda bimanura amazi, maze bamwe mu baturage ngo bakabicana.

Kantarama Elina, umwe mu baganga bahakorera,  na we yagize ati: “Kugeza ibikoresho byo kuvura kwa muganga byasabaga kubyikorera ku mutwe ku buryo n’imiti imwe hari ubwo yageraga ku kigo nderabuzima yangiritse. Ikindi twagiraga ikibazo cy’abakozi kubera ko ino ni ahantu hatorohereza umukozi kugera ku kazi aje gukora ku kigo nderabuzima kuko akoresha amasaha menshi bityo abarwayi bakaba barembera kwa muganga kubera kubura ubitaho ku gihe”.

Umuyobozi w’Akarere ka Nyabihu Mukandayisenga Antoinette, yemeza ko kuba uriya muhanda utari ukozwe neza byabangamiraga imigenderanire ariko cyane cyane abagana n’abivuriza ku kigo nderabuzima cya Nyakiriba.

Yagize ati: “Uyu muhanda uzakomeza koroshya ubuhahirane n’utundi Turere duhana imbibi n’Uturere dukikije akacu ariko uzafasha abaturage bacu kugeza umusaruro ku isoko. Ikindi cy’ingenzi ni ukorohereza umuturage kugera kuri serivisi zo kwivuza, hari bamwe mu barwayi baremberaga mu ngo kubera kubura uko bagera ku ivuriro.

Meya Mukandayisenga yemeza ko imbangukiragutabara itazongera kugorwa no guhuza icyo kigo nderabuzima n’Ibitaro bya Shyira kuko uyu muhanda uzaba wuzuye neza mu gihe cy’amezi 18.

Uyu muhanda uretse kuba abaturage bishimira ko uzabafasha kugera ku ivuriro mu buryo bworoshye, uzabahuza nanone n’ibindi bice by’u Rwanda kuko ugiye kuborohereza kugera  ku Mukamira ahari umuhanda mpuzamahanga Rubavu-Kigali.

Ikindi ni uko umusaruro w’abahinzi wapfaga ubusa uzasubirana agaciro kawo kuko imodoka zitabonaga uko zizamuka muri iyo misozi, kuri ubu zibonye umuhanda mwiza kandi ugiye kubakwa mu buryo burambye.

Ikigo Nderabuzima cya Nyakiriba kuri ubu cyatangiye kuba nyabagendwa
Uyu muhanda waje ukenewe cyane
  • NGABOYABAHIZI PROTAIS
  • Ukuboza 27, 2023
  • Hashize amezi 5
TANGA IGITEKEREZO
Alias Deus Kamukina says:
Ukuboza 27, 2023 at 7:31 pm

Uyu muhanda uje ukenewe cyane ndetse cyane rwose, badufashe ukorwe neza, hajyemo ubugenzuzi bukurikirana niba bakora ibizaramba, uvuye Tubungo – Nyakiriba, ugakomeza Murama-Gatovu, ukaduhuza na Rwankeri – Nyabihu, amata yaba ari kubyara amavuta.

Andika igitekerezo

AMATEGEKO AGENGA IYANDIKA RY'IGITEKEREZO CYAWE