Nyabihu:  Ibigori byakijije umupfakazi guca inshuro ahinduka utanga akazi

  • NGABOYABAHIZI PROTAIS
  • Mutarama 10, 2024
  • Hashize amezi 2
Image

Mukamana Margueritte   w’imyaka 56 aravuga imyato ubuhinzi bw’ibigori bwamukijije gukorera abandi, agahinduka umuhinzi usigaye aha abandi akazi.

Uyu mubyeyi w’abana batatu atuye mu Umudugudu wa Nyakigezi, Akagari ka Gakoro, Umurenge wa Rugera mu Karere ka Nyabihu, akaba yarapfakaye umugabo amusigiye abana batatu.

Avuga ko akimara kubura umugabo yasigaye mu buzima bugoye ku buryo byamusaba guhingira abandi kugira ngo abone ibimutungana n’abana be.

Avuga ko ubuzima bwe bwahindutse nyuma y’imyaka aca inshuro akabona ntacyo ageraho, agahitamo kubyaza umusaruro imirima umugabo we yamusigiye.

Uyu mubyeyi yemeza ko yari asanzwe afite imirima ariko nta menye kuyibyaza umusaruro, kugeza n’ubwo ajya guca inshuro mu baturanyi, ariko ngo uko yagiye ahingira abandi ndetse akajya kubafasha gusarura ibigoriyabonaga umusaruro wabo bikamutera ipfunwe.

Yagize ati: “Namaze kubura umugabo ntangira kujya nirirwa mpingira abaturanyi kugira ngo mbone ibyo ndya n’udufaranga tw’isabune. Igitangaje kandi nanjye mfite imirima, nakoreye abandi imyaka 2. Nageze aho nanjye, kubera ko hari hajeho gahunda yo guhuza ubutaka ku gihingwa kimwe, mpitamo guhinga ibigori nyuma yo gukuramo abajyaga bayatisha Ubu maze imyaka 6 mpinga ibigori ariko nateye imbere”.

Uyu mubyeyi wabanje kwiheba yumva ko ubuzima bwe burangiye nyuma yo gupfusha umugabo, yishimira ko ubuhinzi bw’ibigori bwamuhinduriye ubuzima akabona amafaranga yo kwishurira abana be amafaranga y’ishuri, ndetse akanubaka inzu nziza ifite agaciro ka miliyoni zirenga 5 z’amafaranga y’u Rwanda.

Yagize ati: “Kubura uwo mwashakanye birababaza kandi bidindiza iterambere. Nabaga mu nzu y’amabati 18 numvaga izangwaho, ariko ubuhinzi bw’ibigori bwatumye nyagura kuko nagurishaga umusaruro nkanizigamira ku buryo nageze ubwo mfata inguzanyo muri SACCO- Rugera nkora inzu yanjye neza.”

Ikindi yishimira cyane ni uko ubu umwe mu bana be arimo kwiga mu mwaka wa nyuma wa Kaminuza, umukurikira akaba ari mu mwaka wa kabiri wa Kaminuza, mu gihe umuhererezi na we akiri mu mashuri yisumbuye.

Mukamana akomeza avuga ko kuba ubuhinzi bw’ibigori bwaramuteje imbere abiterwa no kuzamura imyumvire mu by’ubuhinzi, cyane ko kera yajyaga ahinga avangavanga imyaka ntagire umusaruro akuramo.

Aha ni n’aho ahera asaba abahinzi kutavangavanga ibihingwa, kandi akongeraho ko ubuhinzi bwa kijyambere bufite intego buzamura nyira bwo.

Yagize ati: “Kuvangavanga imyaka ni bibi sinakubwira ko ntahingaga ibigori na mbere, ariko byabaga bivanze n’imigozi, inyanya, soya n’ibindi. Ariko ubu ku gihembwe ntabwo nibura naburamo amafaranga agera ku bihumbi 700, ndasaba abagore kandi bashobora kuba barabuze abagabo babo kwiyubakamo akanyabugabo bikiteza imbere.”

Kuri ubu Mukamana akoresha abakozi barenga 10 mu mirima ye, bashobora kurenga bitewe n’imirimo ihari.

Bamwe mu bo yahaye akazi mu mirima ye agenda yaguramo ubuhinzi burimo ubw’ibishyimbo, ibijumba n’urutoki, bavuga ko bishimira uburyo yahinduye imyumvire.

Uwitwa Masengesho Joel yagize ati: “Mukamana ubu ni umuntu twse twigiraho kuko natwe iyo turebye ubuzima bwe mu minsi yashize n’ubu tubona impinduka. Yajyaga akorera amafaranga 700 ku munsi, urumva umuntu ufite abana atanagira umugabo ni ibintu biba bikomeye, ubu rero afite abakozi nk’ubu nkanjye ampemba 15000 ku kwezi muri uyu murima w’ibigori mbereye umuzamu.”

Mukamana ni umwe mu bahinzi b’ibigori basaga 300 bahingira mu Kibaya cya Rugera gihinzemo ibigori ku buso busaga hegitari 2500.

Avuga ko iyo yejeje ku buso ahingaho muri icyo kibaya atabura nibuta toni eshatu z’ibigori as arura bitewe n’uko agendana n’iterambere rigezweho mu buhinzi bw’umwuga.

Uwitwa Masengesho Joel yishimira ko yahawe akazi na Mukamana ndetse akaba amwigiraho byinshi mu buhinzi
  • NGABOYABAHIZI PROTAIS
  • Mutarama 10, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE