Nyabihu: Hari abagabo bahozwa ku nkeke n’abagore bakinumira

  • NGABOYABAHIZI PROTAIS
  • Ukuboza 10, 2023
  • Hashize amezi 5
Image

Bamwe mu bagabo bo mu Karere ka Nyabihu bavuga ko bahozwa ku nkeke bahohoterwa n’abagore babo kugeza ubwo babakubita, ariko bakabura imbaraga zo kugana inzego zibarengera ngo barenganurwe kubera ipfunwe.

Bamwe muri abo bagabo bahitamo kujya kwikodeshereza inzu ahandi bagata ingo zabo mu rwego rwo kwirinda amakimbirane.

Mugabonake Esdras   wo mu Murenge wa Rugera, avuga ko buri gihe akubitwa n’umugore agahitamo kwicecekera ngo batamuseka.

Yagize ati: “Ubu muri twe hano hari bamwe mu bagabo bagowe duhora dukubitwa tukinumira kuko iyo uvuze ko umugore yagukubise urumva nawe uba igitaramo. Mu bagabo witwa inganzwa, ikigwari, umugabo udashobotse n’ibindi. Kubera umuco nyarwanda rero natwe duhitamo kwinumira, ubushize umugore yanteye ibuye ku gahanga njya kwa muganga mvuga ko ari abantegeye mu nzira nanga kwivamo”.

Mugabonake akomeza avuga ko mu muco nyarwanda ntawemerewe kuvuga ko umugore yamunaniye cyangwa se amuhoza ku nkeke ngo byakubitiraho no kuba umugore wo muri iyi minsi ntawamuvugaho bagahitamo kuruca bakarumira.

Yagize ati: “Mu Kinyarwanda umuco wacu ntiwemera ko umugabo agaragaza amarangamutima ye ko umugore amugeze habi kuko ni ukwivamo. Ikindi nta mu gabo ukwiye gushyira hanze amabanga yose y’urugo, kuko burya n’iyo Mudugudu aje se mudashoboye kwihuza ugira ngo mwabana? Ngendeye ko muri iki gihugu cyacu  umugore ashyigikiwe njye nahisemo kuba muhunze kandi ntabwo ari njye njyenyine wahunze urugo, aho kugira ngo ufungwe uzira umugore washatse wamuhunga”.

Kuba hari bamwe mu bagabo bo mu Murenge wa Rugera bakubitwa bakaryumaho bishimangirwa n’Umukuru w’Umudugudu wa Kagano, Bigirimana Alphonse.

Yagize ati: “Ni byo koko hari bamwe mu bagore bumvise ihame ry’uburinganire nabi maze bashaka kwigaranzura abo bashakanye, bakarara mu tubari ntibite ku bana. Aha ni bamwe ndetse usanga n’abana babo bazahazwa n’imirire mibi, aha ni ho usanga dufite bamwe mu bagabo bahuye n’ihungabana kugeza ubwo bahitamo guhunga ingo zabo. Urumva ni cya kibazo cyo kuba abana na bo babura uburere bakajya ku mihanda”.

Uyu Mukuru w’Umudugudu asaba abagabo bahura n’iki kibazo kwitinyuka bakavuga ibibazo bahura na byo by’ihohoterwa.

Yagize ati: “Mu Rwanda abantu bose bafite uburenganzira bungana imbere y’amategeko. Niba hari amategeko arengera umugore hari n’arengera umugabo, kuko bikomeje gutyo ngo umugabo aratsimbarara ku cy’ubahiro cye ni na yo mpamvu usanga hari bamwe bica abandi. Nta mpamvu rero yo guhisha umutekano muke”.

Umugenzuzi Mukuru w’Urwego rw’Igihugu Rushinzwe Kugenzura Iyubahirizwa ry’Uburinganire n’Ubwuzuzanye bw’Abagore n’Abagabo mu Iterambere ry’Igihugu (Gender Monitoring Office/GMO) Nadine Umutoni Gatsinzi, asaba abagabo kujya batanga amakuru ku ihohoterwa bakorerwa  kuko abantu bose bangana imbere y’amategeko haba mu Rewanda ndetse no ku Isi yose.

 Yagize ati: “Ihohoterwa iryo ari ryo ryose rikwiye kuvugwa, niba ari umugabo wahohotewe cyangwa umugore byose bikwiye kuvugwa, bose RIB ibitaho kugira ngo ifashe abo bagabo bahohoterwa. Icyo umuntu yabivugaho, inzego zose zirahari ariko ntitwakwirengagiza ko tugifite umubare munini w’abagore n’abakobwa bahohoterwa, ibyo na byo birahari.”

Nadine Umutoni akomeza asaba ko buri mugabo wese uhuye n’ihohoterwa akwiye kujya abyerura akabivuga kugira ngo ahabwe serivisi nk’iy’abandi, kuko itegeko mu Rwanda risobanutse kandi rireba buri wese mu kurenganurwa no guhabwa ubutabera.

Nadine Umutoni Gatsinzi yasabye abagabo bahohoterwa kujya batanga amakuru kugira ngo bafashwe
  • NGABOYABAHIZI PROTAIS
  • Ukuboza 10, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE