Nyabihu: Gahunda y’Igikumba cy’Umudugudu yashimangiye ubumwe n’ubwiyunge

  • Imvaho Nshya
  • Ugushyingo 6, 2023
  • Hashize amezi 7
Image

Abatuye mu Mudugudu w’Icyitegererezo wa Kazirankara mu Murenge wa Shyira, Akarere ka Nyabihu, bavuga ko Igikumba cy’Umudugudu ari gahunda nziza ikomeje kubazamurira imyumvire mu gushimangira ubumwe n’ubwiyunge.

Iyo gahunda ni imwe mu zikorwa hirya no hino mu gihugu ahubatswe Imidugudu y’Icyitegererezo yashyizwemo ibikorwa by’iterambere, mu rwego rwo kunoza imibereho myiza y’umuturage.

Abatujwe muri iyo Midugudu ni abahamya b’umusaruro uzira amakemwa gahunda y’Igikumba cy’Umudugudu ikomeje gutanga kuko yaje gushimangira ubumwe n’ubwiyunge.

Mukagatare Marie Gaudence, umwe mu batuye mu Mudugudu w’Icyitegererezo wa Kazirankara utuyemo abarokotse Jenoside yakorewe Abatutsi mu 1994, abatishoboye batahigwaga muri Jenoside n’abahoze mu ngabo, yavuze ko iyo gahunda yatumye abari bavuye mu bice bitandukanye by’Igihugu barushaho guhuza no gusabana.

Yagize ati: “Burya gahunda yo kwigisha ubumwe n’ubwiyunge ntisaba amagambo ahubwo ni ibikorwa. Kuba twaraje muri uyu Mudugudu w’Icyitegererezo duturutse mu bice binyuranye by’Igihugu, tudahuje amateka, imibereho, Uturere numvaga kuri njye ari ibintu bikomeye, ariko Nyakubahwa Jeannette Kagame yaduhaye inka tuzororera mu gikumba.  Iyo turimo kuzigaburira rero bituma umuntu asuhuza mugenzi we, yaba atarajya kwahira ukamuha ku bwatsi, yaba ari gukama iyawe itarabyara akaguha ku mata, mbese usanga tutakirebaho ahubwo turasabana.”

Nsengimana Eliab, umwe mu batarahigwaga mu gihe cya Jenoside yakorewe Abatutsi mu 1994, avuga ko na we igikumba cyatumye yiyumvamo gahunda ya Ndi Umunyarwanda.

Yagize ati: “Igikumba cy’Umudugudu ni ingirakamaro hano, mbese ni nk’umugoroba w’ababyeyi, iyo uje guha inka ubwatsi ukahahurira na mugenzi wawe byongera ubusabane. Murasuhuzanya mugasangira amakuru, mbese ukumva ko n’iyo umuntu yaba yaraturutse aho utazi mukwiye kubana. Njyewe nkigera hano numvaga mfite ipfunwe ryo kuzabana n’abantu ntazi iyo bavuye ariko buhoro buhoro nagiye mbimenyera, mbese Igikumba cy’Umudugudu ni gahunda rwose ituma buri wese yumva ko ari Umunyarwanda.”

Akomeza avuga ko, Ndi Umunyarwanda nanone izagirira ingufu muri iyi gahunda yo guhuriza ubworozi hamwe mu Mudugudu, akaba yifuza ko iyi gahunda ahubwo yashyirwamo imbaraga cyane ko n’abanyagikumba bafite  gahunda y’uko bahura inshuro 1 mu cyumweru bakungurana ibitekerezo kandi  ngo bafite n’Ikimina bahuriyemo bituma basabana.

Kuba Igikumba cy’Umudugu cyaba imwe mu ntwaro  ishimangira gahunda y’ubumwe n’ubwiyunge bishimangirwa na Mukandayisenga Antoinette, Umuyobozi w’Akarere ka Nyabihu

Yagize ati: “Buriya abantu iyo bahuriye mu gikorwa kimwe kandi cy’iterambere, bituma bagenda biyumvanamo, buri wese aganiriza mugenzi we bungurana ibitekerezo. Aha rero ni n’aho basangira ubuzima mu mibereho yabo, natwe rero tubona koko iyi gahunda yo gutuza Abanyarwanda mu Midugudu y’Icyitegererezo na yo ari intwaro izadufasha mu gushimangira ubumwe n’ubwiyunge.”

Yaboneyeho gusaba abaturage gukomera kuri gahunda ya Ndi Umunyarwanda kuko ari yo shingiro ry’urukundo rw’Igihugu anabasaba gufata neza inka bagabiwe na Perezida wa Repubulika Paul Kagame.

Kugeza ubu mu Mudugudu w’Icyitegererezo wa Kazirankara ho mu Murenge wa  Shyira, hari igikumba kirimo inka  ziri mu biraro 50 bigenda byiyongera kubera ko izi nka na zo zigenda zibyara, ukaba waratashywe ku mugaragaro mu mwaka wa 2017.

NGABOYABAHIZI PROTAIS

  • Imvaho Nshya
  • Ugushyingo 6, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE