Nyabihu: Aravuga imyato Perezida Kagame wamukuye mu nzu y’imifuka

  • Imvaho Nshya
  • Ugushyingo 7, 2023
  • Hashize amezi 4
Image

Ntabanganyimana Beatrice, umubyeyi w’abana bane wamaze imyaka 20 yibera mu nzu umugabo we yamusigiye yubakishijwe ibice by’imifuka mu byumba, arashimira Perezida wa Repubulika y’u Rwanda Paul Kagame wamubakiye inzu ifite agaciro ka miliyoni 16 z’amafaranga y’u Rwanda.

Uyu mugore uvuga ko byamubereye nk’inzozi, iyo arebye inzu nshya asigaye atuyemo yumva yarazutse. Yibuka ubuzima bugoye yari abayemo muri iyo nzu ya mbere yari iy’inkarakara yuzuye imyenge, ibyumba bikatishije ibice by’imifuka.

Ubwo umunyamakuru w’Imvaho Nshya yamusuraga yamweretse amafoto y’ukuntu inzu yabagamo yari iteye, maze avuga ko ngo atari azi ko bizashoboka ngo abone inzu nziza nk’iriya kandi nta kiguzi ayitanzeho.

Yagize ati: “Ndi umuntu wasembeye igihe kirekire nta mikoro nagiraga; nkubwije ukuri nageze n’ubwo nabaga muri fose nkitwikiza amasashe n’imifuka ishaje mbese narabaye nk’ingunzu, tekereza umuntu uba mu mwobo! Naje kuwuvamo na  bwo sinzi uwantije ikizu na cyo kirangaye, mpageze nsanga nabwo nahungiye ubwayi mu gihuru.  Nakomeje kujya nkingisha ayo mahema n’ibice by’imifuka ishaje, ubu buzima bwari bushaririye cyane”.

Uyu mugore ngo nta kuntu yiyumvishaga ko na we azabona inzu nziza areke kunyagirwa.

Yagize ati: “Mfite abana bane, umugabo wanjye yamugariye ku rugamba nta mbaraga yari afite ngo nibura abe yajya guca inshuro ngo tubone amafunguro cyangwa se tube twahuza imbaraga twigondere akaruri kacu twakomeje kwiberaho mu buzima nk’ubwo kugeza ubwo Kagame aduhaye inzu y’akataraboneka mu muryango wacu”.

Uyu mubyeyi avuga ko Perezida Kagame yamukuye mu nzu imeze nk’umwobo

Kuba uyu muryango warabagaho mu buzima bwa kinyamaswa bishimangirwa n’abaturanyi bawo, ariko nanone bagashimira imiyoborere myiza y’u Rwanda irangajwe imbere na Paul Kagame.

Habimana Eulade, umwe muri abo baturanyi, yagize ati: “Uyu muryango wari mu biduhangayikishije. Reba kuba mu nzu y’ibice by’imifuka, amasashe amahema na yo yaboze kandi ufite abana bato yewe udafite n’icyo kurya; ubu rero turashimira imiyoborere y’igihugu cyacu ku ruhembe hakaba Paul Kagame we uzi ko umuntu ari nk’undi. Yahaye uyu muryango inzu nziza irimo byose, ibiryamirwa , ibiribwa ibikoresho byo mu rugo, mbese yarabatekesheje kera ibi ntibyabagaho ni ukuri”.

Umuyobozi w’Akarere ka Nyabihu Mukandayisenga Antoinette yavuze ko kuba uyu Muryango wari ubayeho mu buzima bubi, nyuma ubu ukaba warabonye igisubizo kirambye.

Yagize ati: “Ni byo koko uyu muryango wa Ntabanganyimana Beatrice wari mu kaga k’imbeho mibi, inzara, ubona mbese koko ko aria bantu badafite imibereho, ariko kubera ubuvugizi twagiye dukora ubu Perezida Kagame yamwubakiye inzu nziza kandi y’igiciro, igihugu cyacu rero gifite imiyoborere yita ku muturage ari muri urwo rwego n’abandi bafite ibibazo by’imibereho nk’iy’uyu Muryango bakomeza kandi bazakomezwa kwitabwaho.”

Uyu muryango wa Ntabanganyimana watujwe mu Mudugudu wa Bihinga usanzemo indi miryango 140, igizwe n’abaturage bahoze mu manegeka, abahoze ari abasirikare, abarokotse Jenoside yakorewe Abatutsi mu 1994, n’abandi bavuye mu mashyamba ya Congo Kinshasa bitandukanyije n’imitwe yitwaje intwaro.

NGABOYABAHIZI PROTAIS

  • Imvaho Nshya
  • Ugushyingo 7, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE