Nyabihu: Abatujwe mu Mudugudu w’Icyitegererezo barasaba ibikoresho by’ibanze

  • Imvaho Nshya
  • Ukwakira 29, 2023
  • Hashize amezi 4
Image

Bamwe mu baturage bo mu miryango yatujwe mu Mudugudu w’icyitegererezo wa Bihinga bo mu miryango y’abatishoboye n’iyavanywe mu manegeka   barasaba guhabwa inkunga y’ibikoresho by’ibanze byo mu nzu kuko ntabyo babonye ubwo batuzwaga neza.

Hari abavuga ko nta n’igikoresho na kimwe bagira kandi hari bagenzi babo batujwe muri uyu Mudugudu uherereye mu Murenge wa Jenda, Akarere ka Nyabihu barabihawe.

Mukandemezo Daphrose watujwe muri uyu Mudugudu, yagize ati: “Njye mbona dusa n’abirengagijwe ho gato n’ubwo twishimira ko badutuje muri uyu Mudugudu ubwo inzu zacu zagendaga twabuze aho kuba. Ariko ikibazo dufite ni uko bamwe muri twe bahawe bimwe mu bikoresho by’ibanze byo kwifashisha ibindi  bakabisanga mu nzu zabo  ariko twebwe twinjiye muri izi nzu nta gikoresho na mba haba isafuriya ndetse n’ibiryamirwa ku buryo tukirara hasi.

Yakomeje avuga ko nubwo batakinyagirwa babayeho mu buzima bubi, bakaba bifuza ko icyifuzo cyabo cyagera ku Mukuru w’Igihugu bakagobokwa.

Kuba aba baturage batarahawe ibikoresho by’ibanze bigatuma babaho mu bibazo byaba iby’isuku n’imibereho, bishimangirwa na bagenzi babo batujwe muri uyu Mudugudu   bo bavuga ko ibikoresho by’ibanze byose babihawe, bakibaza mpamvu abo basanzemo  bo batabihawe  bikabayobera.

Nzabahimana Eliab yagize ati: “Ntawabura gushimira ubuyobozi bw’igihugu ibyiza bugenda butugezaho, yenda kuba aba bagenzi bacu batarahabwa ibikoresho by’ibanze byaba ari amikoro make kuri ubu. ariko twebwe kuba dufite ibikoresho by’ibanze na twe twarahoze mu buzima bubi nka twe biradutangaza kandi bikatubabaza cyane.

Uzi kugira ngo ujye gutereka ku ziko ukabona mugenzi wawe ngo na we akeneye isafuriya yo gutekaho, ukabona aje gucumbikisha umushyitsi kubera ko atamuraza hasi, ubuyobozi nibugoboke aba bavandimwe nk’uko babidukoreye.”

Nzabahimana akomeza avuga ko kuba basaba ubuyobozi ibikoresho atari ukugondoza kuko babaye bafite ubushobozi bakwirwanaho bakaba bagura by’ibanze bakenera.

Yagize ati: “Rwose aho Kagame yadukuye agaha buri wese inzu y’agaciro ka miliyoni zirenga 10 na twe ntitwavuga ko tutagura nibura igikombe, ibase  n’ibindi ariko nk’ibitanda urumva ku muryango w’abantu 8, amasafuriya , ibiryamirwa byose urumva ko ari bije ndende. Kuba hari bamwe barara hasi kandi bibakururira indwara z’uruhu bitewe n’ibiryanyi birimo imbaragasa n’imperi”.

Ubuyobozi bw’Akarere ka Nyabihu na bwo bwemeza ko hari bamwe mu batujwe muri uriya Mudugudu batagira bimwe mu bikoresho by’ibanze, ariko ngo biterwa n’umuterankunga wagiye yubaka izo nzu.

Umuyobozi w’Akarere ka Nyabihu Mukandayisenga Antoinette, yagize ati: “Ni byo ko hari imwe mu miryango yatujwe hano mu buryo bwihutirwa kandi icyambere cyari ukuvana ubuzima bwabo mu kaga. Iyo rero nta bikorersho by’ibanze yahawe n’ubu idafite, hamwe na hamwe rero biterwa n’umuterankunga wubatse izo nzu, hari uza akazana ibikoresho byose bikenewe mu nzu kugeza ku biribwa n’ibindi, aba rero uko amikoro azagenda aboneka   baratekerezwaho kandi ubuyobozi bubari inyuma.”

Umudugu wa Bihinga watujwemo imiryango igera ku 141, ariko kuri ubu igera kuri 41 ni yo itaka kuba itagira ibikoresho by’ibanze.

Bamwe mu batujwe mu nzu zigezweho bavuga ko iyo babonye umushyitsi bajya kumucumbikisha ngo atarara hasi

NGABOYABAHIZI PROTAIS

  • Imvaho Nshya
  • Ukwakira 29, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE