Nyabihu: Abagana gare ya Mukamira barembejwe n’imodoka zibatera ibiziba

  • Imvaho Nshya
  • Ugushyingo 8, 2023
  • Hashize amezi 4
Image

Abagana n’abakoresha gare ya Mukamira bavuga ko batewe impungenge n’uburyo igenda isaza kandi ntiyitabweho, yahindutse ibinogo ku buryo imodoka zibatera ibiziba.

Ikindi bifuza ni uko iyi gare yakongera ikubakwamo utuzu abagenzi bicaramo mu gihe bategereje imodoka.

Iyi gare ikuramo abagenzi bava Rubavu cyangwa se bajyayo kimwe n’abava i Musanze, iyo ukiyinjiramo usanganirwa n’ibinogo kimwe n’ibizenga by’amazi, kuri ubu rero noneho ari mu bihe by’imvura, abagenzi kimwe n’abafite ubundi bushabitsi muri gare bavuga ko bahora mu makimbirane yo kuba imodoka zibatera ibyondo.

Uwitonze Charles yaganiriye na Imvaho Nshya, yavuze ko bibabaza kubona iriya gare ihurirwamo n’imodoka ziturutse mu mpande zose, ariko ikaba irangwa n’umwanda uterwa n’ibizenga by’amazi imodoka zigenda zibatera.

Yagize ati: “Ubu iyi gare uko uyibona ni imwe mu zikoreshwa n’imodoka ziva henshi mu gihugu iziva Muhanga, Rubavu, Musanze, urumva ko nta munota washira hatageze imodoka, reba ibi binogo, imikingo iyo imodoka igezemo rero hari n’ubwo ibura uko ibikatira igatera umugenzi ibyondo cyangwa se akaba yakata nabi akagonga mugenzi we turifuza ko iyi gare ikorwa bundi bushya cyangwa se igasanwa”.

Kankundiye Belise we asanga no kuba utuzu bugamo izuba n’imvura kuba twarasenyutse ntidusanwe ari ikibazo ku bagenzi nanone

Yagize ati: “Iyi gare ibibazo byayo rero ni uruhuri kuko yarirengagijwe cyane mbese ni nka kwa kundi umuntu abaho atagira kirengera, ni gute gare nk’iyi yahozemo utuzu twugamagamo izuba, n’imvura kugeza ubu hakaba nta kazu na kamwe karangwamo, kandi utwo tuzu twagiye dusenyuka buhoro buhoro ubuyobozi burebera, kuko tumwe abashoferi baratugongaga, utundi umuyaga uradutwara, ahubwo njye nibaza ibikoresho byari bitwubatse byariwe na nde”.

 Nsengiyumva Jean Bosco ni umwe mu bashoferi batwara abagenzi muri gare ya Mukamira, akora ingendo Musanze Rubavu, we asanga ikibazo cya za gare mu gihugu kikiri ingorabahizi

Iyo imvura iguye ibinogo byo muri Gare ya Mukamira byuzura amazi, buri modoka

Yagize ati: “Ntabwo ari iyi gare ya Mukamira gusa kuko n’iyo urebye ahandi mu zindi ntara za gare zirashaje, ahubwo njye nibaza ababishinzwe icyo bakora, niba uko ninjiye amafaranga nsabwa nyatanga kuki njyewe batampa ahantu ho gukorera serivise heza, dutanga amafaranga ya gare aho duparika tukanasora nibatabare rero na  bo bajye baduha gare yujuje ibyangombwa, iki kibazo kandi ntawe utakizi, ubu se urambwira ngo Akarere ntikakizi, mbona rimwe na rimwe byirengagizwa”.

Imvaho Nshya yagerageje kumenya amakuru kuri iyi gare niba koko hari icyo Akarere ka Nyabihu gateganya kuba kagira icyo kabikoraho ngo gasubize ibibazo by’iyi gare, maze Umuyobozi w’Akarere wungirije ushinzwe imari n’ubukungu Jean Claude Habanabakize, avuga ko iyi gare itakiri mu maboko y’akarere

Yagize ati: “Gare ya Mukamira se ko ubu akarere karangije kuyigurisha na Rwanda Federation of Transport Cooperatives (RFTC), ubu rero nkaba numva ahubwo ikibazo twayibaza tukumva icyo iteganya kuko gare yavuye mu maboko y’Akarere”.

Umuyobozi wa Jali Imvestimen LTD Nsengiyumva Benoit we avuga ko nta gahunda yo kugira icyo bayikoraho muri ibi bihe bya vuba

Yagize ati: “Gare ya Mukamira ni bwo tukimara kuyigura, kandi hari gahunda yo kuyivugurura, ubu rero nta gahunda dufite yo kuyubaka vuba ahubwo nkeka ko nitumara kurangiza izindi yo tuzayishyira  ku ngengo y’imari yo muri 2023-2024, iyi rero ntabwo yari iri muri gahunda ubu tugiye gushakisha ingengo y’imari, kimwe n’utwo tuzu abagenzi bategeramo imodoka cyangwa  se bugamamo izuba n’imvura tuzabikorera icyarimwe”.

Gare ya Mukamira ihurirwamo n’imodoka zitewara abagenzi bava bajya Musanze na Rubavu, kimwe n’iziva Ngororero kuba rero ihurirwamo n’imodoka nyinshi ibi ngo ni kimwe mu bituma igenda yangirika cyane ko yubatswe mu mwaka wa 2003.

NGABOYABAHIZI PROTAIS

 

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE