Ntawuturusha kumenya u Rwanda twifuza- Dr. Iyamuremye

  • NTAWITONDA JEAN CLAUDE
  • Mata 13, 2022
  • Hashize imyaka 2
Image

Perezida wa Sena Dr. Iyamuremye Augustin yagaragaje ko amateka y’u Rwanda yigishije Abanyarwanda ko Politiki zitandukanye kandi ko habaho ubuyobozi bubi n’ubwiza, bugira uruhare mu kubaka cyangwa gusenya Igihugu, bakaba barasigaranye isomo rikomeye rishamikiye ku kiguzi cy’amahitamo mabi yafashwe n’ubuyobozi bwateguye bukanashyira mu bikorwa Jenoside yakorewe Abatutsi.

Dr. Iyamuremye yabigarutseho kuri uyu wa Gatatu taliki ya 13 Mata 2022, mu muhango wo gusoza Icyumweru cy’Icyunamo, gukomeza kuzirikana iminsi 100 yo kwibuka ku nshuro ya 28 Jenoside yakorewe Abatutsi, no kwibuka by’umwihariko Abanyapolitiki bishwe bahowe ibitekerezo byabo byarwanyaga Politiki y’ivangura n’umugambi wo gutsemba Abatutsi.

Ni umuhango wabereye ku i Rebero kuri uyu wa Gatatu, ahari urwibutso rwa Jenoside rushyinguwemo abasaga 14,000 barimo abazize Jenoside yakorewe Abatutsi bakuwe mu bice bitandukanye by’Umujyi wa Kigali n’Abanyapolitiki bishwe icyo gihe bahorwa ibitekerezo byabo birwanya amacakubiri.

Yagize ati: “Turi hano twibuka ishyano ubuyobozi bubi bwateye. Twiboneye n’amaso yacu aho Politiki mbi yagejeje u Rwanda. Ntawe dukeneye rero ko aza kuduha amasomo y’itandukaniro ry’ubuyobozi bwiza n’ubuyobozi bubi, cyangwa hagati ya Politiki nziza na Politiki mbi. Indangagaciro dusanga mu murange w’Abanyapolitiki twibuka na nyuma y’imyaka 28, ni icyegeranyo cyivugira hagati ya Politiki y’urwango na Politiki nzima ihuriza hamwe Abanyarwanda.”

Yakomeje agaragaza ko uyu munsi u Rwanda rufite ubuyobozi bushingiye ku bumwe, bushyira imbere kubana kw’Abanyarwanda no kubaka Leta igendera ku mategeko hagamijwe gushimangira ko nta gishobora kugarura amacakubiri n’ivangura mu Banyarwanda.

Yavuze ko umusaruro wo gushyira hamwe nk’Abanyarwanda bose ntawusigaye inyuma byatanze umusaruro wigaragaza mu myaka 28 ishize cyane ko ububabare Abanyarwanda banyuzemo bwababereye isomo rikomeye ribafasha kumenya u Rwanda bifuza kubamo urwo ari rwo.

Ati: “Nta we uturusha kumenya u Rwanda twifuza. Abashaka kuturangaza no kudutesha umurongo bazakomeza kunanirwa, kuko ubudatsimburwa bw’Abanyarwanda buzakomeza gutsinda uwo ari we wese washaka kudusubiza inyuma… Kwibuka Abanyapolitiki barwanyije amacakubiri bakitangira ubumwe bw’Abanyarwanda tubivanemo umurage w’imbaraga zo guhangana aho biri ngombwa n’ibibazo bigaragara kandi bishaka kubangamira umutekano n’iterambere ry’Igihugu cyacu.”

Guhakana no gupfobya bitoneka abarokotse Jenoside

Dr. Iyamuremye yasabye buri wese kugira uruhare mu kurwanya no gukumira ihakana n’ipfobya rya Jenoside yakorewe Abatutsi kuko riri mu bitoneka abarokotse, asaba kugera ikirenge mu cy’Abanyapolitiki bemeye gutanga ubuzima bwabo kubera kwitandukanya n’ingengabitekerezo ya Jenoside no kurwanya umugambi wo gutsemba Abatutsi.

Yakomeje avuga ko mu bikorwa ngarukamwaka byo kwibuka Jenoside yakorewe Abatutsi hagenda haboneka abakoresha imbuga nkoranyambaga bagakwirakwiza ibinyoma bisebya ubuyobozi bw’u Rwanda banahembera ingengabitekerezo ya Jenoside ku nyungu bita iza Politiki.

Ati: “Guhakana no gupfobya Jenoside yakorewe Abatutsi nabyita ko ari nko kujomba icyuma mu bikomere by’abarokotse.  Ejo nasomaga ku rubuga rwa Twitter, ubutumwa umudamu wacitse ku icumu yagiraga ati: Nyuma y’imyaka 28, biragoye kumva buri gihe ubu buhamya bwose bujyanye n’ububabare, ubumaritiri bwacu, Mu by’ukuri biragoye kwihangana. Ntutekereze ko tutagerageza, gusa turikomeza mu gihe dushirira imbere. Ariko ikidushengura kikatwica ni abavuga ngo habaye Jenoside ebyiri…”

Dr. Iyamuremye yakomeje ashimangira ko ubutumwa bw’umwe mu barokotse Jenoside bwamukoze ku mutima kuko bugenda bukanagaruka ku ngaruka za Politiki mbi yabaye intandaro ya Jenoside yakorewe Abatutsi n’ubu ikaba igikirikirana abagerageza kuyihakana no kuyitesha agaciro.

Ati: “Ni ngombwa kwibuka ko Jenoside yakorewe Abatutsi yashobotse bitewe n’ubuyobozi bubi bwashyize imbere politiki y’ivangura n’amacakubiri, yari igamije kwigizayo Abatutsi kugeza ubwo hategurwa umugambi wo kubatsemba nk’icyo bitaga igisubizo cya nyuma, cyangwa Apocalypse bivuze imperuka y’Umututsi wese iyo ava akagera, nk’uko Col. Theoneste Bagosora yabyise.”

Yakomeje avuga ko isomo ry’ibanze riva muri ayo mateka ashaririye ari uko Jenoside yakorewe Abatutsi yateguwe kandi ibasha kuba kubera umurongo wa Politiki n’ubuyobozi bubi. Irindi somo ni uko abayobozi bakoresheje amashyaka ya Politiki n’abanyapolitiki ngo basohoze uwo mugambi mubisha wo gucengeza ingengabitekerezo ya Jenoside mu Banyarwanda.

Yasobanuye ko Urwibutso ruruhukiyemo Abanyapolitiki ari kimwe mu bimenyetso by’amateka byagorana kwirengangiza mu rwego rwo kugoreka amateka y’ibyabaye bihishe inyuma ihame ry’uburenganzira bwo gutangaza ibyo batekereza ariko inyuma hihishe inyungu za Politiki.

Yavuze ko kubera uburyo Jenoside yakorewe Abatutsi yabaye amahanga arebera, abayihakana n’abayipfobya batazatinda kubona ko bibeshye ndetse ko banata igihe cyabo.

Yavuze ko nubwo aba banyapolitiki bishwe bahari nk’ikimenyetso simusiga ko Jenoside yateguwe ndetse ikanashyirwa mu bikorwa n’ubuyobozi butashakaga kuvangirwa n’abadahuje ibitekerezo na bwo, iyo bahabwa amahirwe yo gukomeza kubaho Jenoside ntiyari kugira ubukana nk’ubwo yakoranywe.

“[…] Kwica Abanyapolitiki twibuka ni icyemezo abajenosideri bafashe, kugira ngo bavaneho burundu inzitizi iyo ari yo yose, ku mugambi wabo. Jenoside yakorewe Abatutsi ntiba yaragize ubukana ku rwego yagezeho iyo Abanyapolitiki bazima twibuka uyu munsi babaho.”

Yakomeje ashima inzego zitandukanye zikomeje gufatanya mu kwigisha urubyiruko n’abakiri bato amateka y’ibyabaye kugira ngo Jenoside iyo ari yo yose itazongera kuba ukundi. Yanashimye uko urubyiruko rwitabiriye ibikorwa byo kwibuka mu Cyumweru cy’Icyunamo n’uko rwukomeje kwitabira mu minsi 100 yo kwibuka ku nshuro ya 28 Jenoside yakorewe Abatutsi.

Minisitiri w’Intebe Dr. Ngirente Edouard, ari mu bitabiriye umuhango wo kwibuka abanyapolitiki bishwe muri Jenoside yakorewe Abatutsi
  • NTAWITONDA JEAN CLAUDE
  • Mata 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE