NISR yatangaje amataliki y’Ibarura rusange ry’abaturage rya 5

  • NTAWITONDA JEAN CLAUDE
  • Werurwe 14, 2022
  • Hashize imyaka 2
Image

Ikigo cy’Igihugu cy’Ibarurishamibare NISR cyasohoye amataliki ibarura rusange rya 5 ry’abaturage n’imiturire rizakorerwaho, biteganyijwe ko rizatangira taliki ya 16 kugera ku ya 30 Kanama 2022.

Ikigo cy’igihugu cy’ibarurishamibare cyasohoye amataliki y’ingenzi n’urutonde rw’ibibazo bizabazwa n’abakarani mu gihe iri barura rizaba ritangiye gukorwa, harimo no kwandika nomero kuri buri nzu z’abaturage bizatangira ku italiki 11-14 Kanama 2022, kuva ku ya 16 kugera kuri 30 hazakorwa igikorwa nyirizina cy’ibarura, aho umukarani azagera muri buri rugo.

Umuyobozi w’ishami rishinzwe ibarura muri NISR, Habarugira Venant yatangaje ko ibikenewe byose mu gukora ibarura byarangije gutegurwa kandi n’ibibazo bizabazwa abaturage byateguwe.

Yongeyeho ko hakozwe igerageza mu Midugudu 600 hirya no hino mu gihugu kandi byabafashije  kuba bagira ibyo bahindura, ndetse hashyirwa imbaraga nyinshi mu gukoresha ikoranabuhanga.

Habarugira avuga kandi ko abarimi bazakora ubukarani bazakoresha ikoranabuhanga NISR rizashyirwa muri telefone zigezweho, rikazihutisha gukusanya ibyavuye hirya no hino mu gihugu.

Ibarura rusange ry’abaturage n’imiturire mu Rwanda, ryakozwe muri Kanama 1978 ryagaragaje ko abaturage bose bari 4, 831,527, abatuye mu mijyi bari 222,727 bangana 4.6% naho icyo gihe abari batuye mu cyaro bari 4, 608,800 bivuze 95.4%.

Muri Kanama 1991 hakozwe irindi barura, ryagaragaje ko abaturage bose bari 7, 157,551, abatuye mu mijyi bari 391,194 (5.5%) naho abari batuye mu cyaro bari 6, 766,357 (94.5%.).

Muri Kanama 2002 hakozwe irindi barura rusange ry’abaturage rya 3 aho abaturage bose bari 8, 128,553, abatuye mu mijyi bari 1, 372,604 bangana na 16.9%, mu gihe abari batuye mu cyaro bari 6, 755,949 byari ku ijanisha rya 83.1.

Ibarura rusange 4 ry’abaturage n’imiturire riheruka ni iryo mu 2012 ryagaragaje ko mu Rwanda abaturage bose bari 10, 515,973. 

Abatuye mu mijyi bari 1, 737,684 ni ukuvuga 16.5%, naho abatuye mu cyaro bari 8, 778,289 bangana 83.5%. 

Ikigo cy’Igihugu cy’Igihugu cy’Ibarurishamibare kigaragaza ko imibare ya 2021 Abanyarwanda bashobora kuba barageze kuri 12,955,736; imibare gitangaza hashingiwe ku muvuduko w’ubwiyongere bw’abaturage mu Rwanda.

Abakarani b’ibarura rusange ry’abaturage n’imiturire rya 5 ni abarimu bigisha mu mashuri abanza bagera mu bihumbi 28, batoranyijwe mu basaga ibihumbi 62 bari basabye gukora aka kazi k’ubukarani. Biteganyijwe ko urutonde rwabo ruzatangazwa muri uku kwezi kwa Gatatu.

Ibarura rusange ry’abaturage n’imiturire riteganyijwe kuva ku italiki ya 16-30 Kanama 2022
  • NTAWITONDA JEAN CLAUDE
  • Werurwe 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE