Nigeria: Drone yahitanye abasivile 85

Abaturage bagera kuri 85 bishwe n’igitero cy’akadege katagira umupilote (drone) cyibasiye ahari hateraniye imbaga nyamwinshi y’abasenga mu Majyaruguru y’Uburengerazuba bwa Nigeria.

Ibiro Ntaramakuru by’Abafaransa AFP byatangaje ko ubuyobozi bwemeje iby’iki gitero kuri uyu wa Kabiri, Perezida ahita ategeka ko hakorwa iperereza ryihuse ku makosa nk’aya yatumye abantu bahasiga ubuzima.

Ikigo cy’igihugu gishinzwe ubutabazi cyatangaje ko nibura abantu 66 bakomerekeye muri iki gitero kandi ko  imirambo 85, harimo iy’abana, abagore ndetse n’abasaza, yashyinguwe, mu gihe hakomeje gushakishwa abandi baba bahasize ubuzima.

Nubwo Perezida wa Nigeria, Bola Tinubu, yategetse “iperereza ryimbitse kandi ryuzuye kuri iki kibazo.” Iperereza nk’iri rikunze kubaho ariko ibivamo bikagirwa ibanga ntibishyirwe ahagaragara.

Umukuru w’ingabo za Nigeria, Lt. Gen. Taoreed Lagbaja, yasabye imbabazi z’icyi gitero cya drone ubwo yasuraga uyu mudugudu, avuga ko byakozwe hagamijwe kureba uburimanganya bushobora gukoreshwa   n’amabandi.”

Mu ijoro ryo ku Cyumweru habaye imyigaragambyo mu Mudugudu wa Tudun ubwo abaturage bizihizaga umunsi mukuru w’isabukuru y’Intumwa Muhamadi, abayobozi batangaza ko igisirikare cyari cyizeye ko izo mvururu zatewe n’agatsiko k’amabandi.

Ikigo gishinzwe umutekano cya SBM Intelligence giherereye mu mujyi wa Lagos kivuga ko kuva mu 2017, abasivili bagera kuri 400 bishwe n’ibitero by’indege, aho ingabo zavuze ko byari bigamije kwibasira   imitwe yitwaje intwaro yari yarateje imidugararo  mu Majyaruguru y’igihugu.